Sètge de Mafeking
![](http://upload.wikimedia.org/wikipedia/commons/thumb/3/38/Mafikeng_Second_Boer_War.jpg/220px-Mafikeng_Second_Boer_War.jpg)
Lo sètge de Mafeking es un combat que se debanèt dau 13 d'octòbre de 1899 au 17 de mai de 1900 durant la Segonda Guèrra dei Boers. Iniciat un jorn après la declaracion de guèrra, veguèt l'enceuclament de la vila per una tropa boer comandada per lo generau Piet Cronje (8 000 òmes). Pasmens, l'ataca se turtèt a un ret defensiu preparat tre lo 19 de setembre per la garnison dau coronèu Robert Baden-Powell (1 500 òmes). Lei Boers refusèron d'atacar una defensa ben preparada e assaièron sensa succès d'obtenir la capitulacion de la vila gràcias a de bombardaments. Lei Britanics repostèron amb d'atacas localas destinadas a secutar seis adversaris. Utilizèron tanben divèrsei fintas per escondre son dispositiu e empachar l'organizacion d'una ataca generala còntra sei fortificacions. Pauc a pauc, lei dos camps acceptèron de conclure de trèvas localas per permetre l'organizacion de servicis religiós ò de partidas de criquet. Lei Boers aprofichèron aquela situacion per retirar 4 000 òmes dau sètge.
Finalament, lei Boers assaièron de prendre la vila lo 12 de mai de 1900. D'efiech, èran menaçats per l'arribada de renfòrç britanics. La presa de la vila èra alora vengut un objectiu per redurre lei riscs de perseguida ò per prendre una posicion defensiva qu'auriá permés d'alentir l'avançada britanica. Dins aquò, l'ataca foguèt arrestada sensa dificultat e s'acabèt per la captura de la màger part deis unitats aguent participat a l'assaut. Lo rèsta dei tropas boers se retirèt cinc jorns pus tard. Durant leis operacions, lei Britanics avián perdut 800 òmes còntra 2 000 per seis adversaris.
Lo sètge de Mafeking e la resisténcia de sa garnison aguèron un ròtle important per l'opinion publica britanica durant lo conflicte. La rompedura de l'enceuclament foguèt considerat coma una victòria majora e Baden-Powell venguèt un eròi nacionau e foguèt promougut generau. Quauqueis ans pus tard, son prestigi personau li permetèt de fondar l'escotisme a partir deis ensenhaments tirats de l'utilizacion de joves durant lo sètge coma estafeta. Pasmens, per l'Estat-Major britanic, lo sètge foguèt puslèu percebut coma una nosença. Baden-Powell foguèt criticat per aver amassat una quantitat considerabla de viures dins la vila e refusat d'organizar una sortida generala dei defensors[1]. Après la batalha d'Elands River, onte abandonèt una garnison britanica enceuclada, tot comandament li foguèt retirat.
Liames intèrnes
[modificar | Modificar lo còdi]Bibliografia
[modificar | Modificar lo còdi]- (en) Thomas Pakenham, The Boer War, Cardinal, 1979.
Nòtas e referéncias
[modificar | Modificar lo còdi]- ↑ D'efiech, dins lo cas d'una presa de la vila per lei Boers, lei viures aurián permés d'avitalhar l'armada boer durant un certan periòde. Pasmens, lei Boers avián pas conoissença d'aquela situacion.