Philippe William Luce

Ch't' articl'ye fut c'menchie en Jèrriais

Philippe William Luce (17 Septembre 1882 – 20 Juilet 1966) fut né dans La Rue de la Golarde, St Louothains (i' prînt san nom d’plieunme Ph'lippe d'la Golarde d'chu c'mîn) et ‘tait l'fréthe à E.J. Luce (Elie).

P. W. Luce tchittit Jèrri en 1902 pouor aller à Edmonton, Albèrta, mais restit à Winnipeg et dévînt rapporteux pouor lé “Winnipeg Telegram”. I' dêlouogit à New Westminster, Colombie Britannique, et travaillit pouor lé “Daily News” jusqu'en 1911, don en Annonc’cie jusqu'en 1914. Et pis, i' s'otchupit comme fèrmyi ès vaques mais èrtouônnit au journalisme à Vancouvèr pouor lé “Vancouver Herald”. I’ découvrit en 1923 qu’i’souffrait d'la maladie d'chucre et i’s’èrtithit, mais l’întroduction d’l’însulinne lî pèrmînt eune vie productive.

I’ rentrit en Jèrri en 1909 et en 1920 et i’ fondit La Sociêté des Îles d’la Manche dé Vancouver en 1940 pouor obténîn des sou pouor les êvacuées. À la fîn, il êcrivit sa Nécrologie pouor la Gâzette du Sé et mouothit à Vancouvèr.