Tony Kaye

Tony Kaye
Fødd	11. januar 1946 (78 år)
Fødestad	Leicester i England
Fødenamn	Anthony John Selvidge
Opphav	Storbritannia
Aktiv	1968 til i dag
Sjanger	Progressiv rock, rock
Instrument	Orgel, tangentinstrument
Tilknytte artistar	Yes, Flash, Badger, Detective, Badfinger, Circa, Yoso
Verka som	musikar, pianist

Tony Kaye (fødd Anthony John Selvidge, 11. januar 1946) er ein engelsk klaverspelar, mest kjend for tida si som pianist og organist i progressiv rock-bandet Yes i periodane 1968 til 1971 og 1983 til 1995. Kaye var den originale pianisten og organisten i Yes, og vart i 1971 erstatta av Rick Wakeman. Etter den første tida med Yes starta han prog-rockgruppa Badger. Seinare var han med på å starte banda Flash og Detective før han i 1981 spelte på det siste albumet til Badfinger. For tida spelar han i bandet Circa: som blant anna har med den tidlegare Yes-medlemmen Billy Sherwood. Både Kaye og Sherwood er òg med i bandet Yoso, saman med blant andre den tidlegare Toto-vokalisten Bobby Kimball.

Tidlege år, Yes og Badger

Han var med i ei rekkje jazzband på 1960-talet før han i 1968 vart invitert av Chris Squire til å bli med i eit nytt band han hadde starta, nemleg Yes. Kaye spelte på dei tre første albuma til Yes, Yes, Time and a Word og The Yes Album før han vart sparka fordi han ikkje ønskte å spele moderne synthesizerar og Mellotron, noko Wakeman var kjend for å gjere.

Saman med David Foster, som hadde skrive ein del songar saman med Yes, starta han i 1972 bandet Badger, som gav ut to album. Konsertalbumet One Live Badger i 1973 og White Lady i 1974. Han turnerte med David Bowie i 1975 og 1976, og vart så med i bandet Detective. Dei gav ut albuma Detective og It Takes One To Know One i 1977 og dessutan ei promo-plate kalla Live from the Atlantic Studios i 1978.

Badfinger, Detective og Cinema/Yes

Kaye hadde no flytta til Los Angeles, og vart med Badfinger på turné i 1979. Han var òg med å spele inn albumet Say No More med bandet i 1981. Då Badfinger la bandet på is i 1982 var Kaye usikker på om han skulle fortsetje vidare som soloartist, eller takke ja til invitasjonen frå Chris Squire om å bli med i eit nytt band han kalla Cinema. Dette bandet hadde òg Alan White på trommar og Trevor Rabin på gitar. Han valde å bli med i Cinema, og vart dermed i 1983 med på å gjenopplive Yes då Jon Anderson kom med i bandet.

Etter fire album og tolv år til med Yes, slutta han. Han tilbaud seg å hjelpe til i kulissene dersom dei trong han, men det vart ikkje noko av. Han jobba ikkje noko særleg i musikkbransjen på slutten av 1990-talet, men dei siste åra har han vore med på prosjekt som The Neil Deal, eit hyllest-band til ære for Neil Young, og han er for tida med i bandet Circa: som han har gjeve ut to album saman med. I 2008 var han igjen på turné med Badfinger.

Kjelder

• Denne artikkelen bygger på «Tony Kaye (musiker)» frå Wikipedia på bokmål, den 27. juli 2012.

Bakgrunnsstoff

• Tony Kaye-diskografien
• Where Are They Now? Arkivert 2008-05-09 ved Wayback Machine.
• The Neil Deal
• Tony Kaye på MySpace