Inger Bjørnbakken

Inger Bjørnbakken
Statsborgarskap	Noreg
Fødd	28. desember 1933 Bærum kommune
Død	13. februar 2021 (87 år) Bærum kommune
Idrett	alpint
Tok del i	Vinter-OL 1960, Vinter-OL 1956
Utmerkingar	Aftenpostens Gullmedalje, Holmenkollmedaljen, Sportsjournalistenes statuett

Inger Bjørnbakken (28. desember 1933–13. februar 2021) var ein norsk skirennar frå Bærum som representerte Bærums skiklub. Ho vart i 1958 verdsmeister i slalåm i Bad Gastein i Austerrike. Åra 1956-59 vann ho åtte norske meisterskap i fire ulike øvingar.

Aktiv

Bjørnbakken vart nummer fem i storslalåmtevlinga i sin NM-debut i Drammen vinteren 1953. To år seinare vann ho si fyrste NM-medalje då ho tok sølvmedaljen under noregsmeisterskapen på Voss. I 1956 sigra ho i slalåmøvinga under NM i alpint på Norefjell, og fekk i tillegg ein bronse i storslalåm. Dei tre neste sesongane sikra ho seg ytterlegare sju norske meistertitlar i alpinløypene.

Bjørnbakken deltok for Noreg under Vinter-OL 1956 i Cortina d'Ampezzo, der ho kom på sjetteplassen i slalåmrennet og vart nummer 14 i storslalåm. To år seinare vann ho slalåmrennet under verdsmeisterskapen i Bad Gastein. Med sluttida 105,6 sekundar var ho 1,4 sekund føre Josefa Frandl frå Austerrike og 1,8 sekund framom Annemarie Waser frå Sveits, dei to andre medaljevinnarane. Astrid Sandvik fylgde opp den sterke norske innstasen med å hamne på fjerdeplassen i øvinga. Bjørnbakken vart elles nummer ti i storslalåm i meisterskapen. Ved sesongslutt mottok ho Morgenbladets gullmedalje og Sportsjournalistenes statuett for VM-gullet; inga kvinne hadde fått korkje utmerkingane tidlegare. I sin siste sesong reiste ho til dei olympiske leikane 1960 i Squaw Valley. Ho vart der nummer 14 i slalåm og 20 storslalåm.

Bjørnbakken vann sju renn i Holmenkollen Kandahar i perioden 1955 til 1958, fire av dei slalåm. Ho vart tildelt Holmenkollmedaljen i 1958, saman med Håkon Brusveen.

Medaljar og besteplasseringar i noregsmeisterskap

• 1953: Nr 5 i storslalåm
• 1954: Nr 4 i slalåm
• 1955: Sølv i slalåm, bronse i storslalåm
• 1956: Gull i slalåm, bronse i storslalåm
• 1957: Gull i slalåm, bronse i storslalåm
• 1958: Gull i storslalåm, utfor og kombinasjonen, bronse i slalåm
• 1959: Gull i slalåm, storslalåm og kombinasjonen, sølv i utfor

Bjørnbakken omkom då heimen hennar på Skui i Bærum brann ned.

Kjelder

• Sportsrevy, aktuelle årgangar

Bakgrunnsstoff

• (en) Inger Bjørnbakken – Profil og resultatoversikt hos FIS
• (en) Inger Bjørnbakken – Profil og resultatoversikt i olympiske konkurransar på sports-reference.com.