Håkon Austbø

Håkon Austbø
Statsborgarskap	Noreg
Fødd	22. oktober 1948 (76 år) Kongsberg kommune
Yrke	pianist, professor
Språk	norsk
Far	Magne Austbø
Nettstad	http://www.austbo.info/

Jon Håkon Austbø (fødd 22. oktober 1948 i Kongsberg) er ein norsk klassisk pianist. Han er soneson av Johan Austbø og svoger til Pål Steigan.

Biografi

Håkon Austbø var elev hjå Hildegunn Reuter, og han hadde opptredenar med Harmoniens Orkester i 1963. Debutkonserten hans i Universitetets Aula i 1964 vekte stor oppsikt. Austbø studerte i Paris i åra 1966–71, frå 1969 til 1971 med komponisten og organisten Olivier Messiaen. I 1971 vann han den opne franske Messiaen-pianokonkurransen. Sidan studerte han ved Julliard School of Music i New York og Staatliche Hochschule für Musik i München.

Austbø har vunne fleire internasjonale prisar, og var frå 1974 busett i Nederland, der han var dosent ved musikkonservatoriet i Utrecht. Han underviste sidan ved Sweelinck-konservatoriet i Amsterdam. No er han busett i Noreg att, og sidan januar 2007 har han vore professor ved Universitetet i Stavanger, på institutt for musikk og dans. For det mangeårige arbeidet sitt med musikken til komponisten Aleksandr Skrjabin har han fått vervet som visepresident i det internasjonale Skrjabin-selskapet i Moskva.

Austbø er særleg kjend for tolkingane sine av Olivier Messiaen og Aleksandr Skrjabin. I 1998 vann han Edison-prisen for innspelinga si av Catalogue d'oiseaux og Petites Esquisses d'oiseaux av Messiaen. Han vart også tidleg kjend som kammermusikar gjennom Trio du Nord saman med Ole Bøhn og Hege Waldeland.

Utmerkingar

• Kritikarprisen i 1989
• Spellemannprisen 1989 i klassen klassisk musikk / samtidsmusikk for Skrjabin – pianosonater
• Spellemannprisen 1991 i klassen klassisk musikk / samtidsmusikk for Verker av Franck, Chausson, Debussy, Poulenc saman med Truls Mørk
• Spellemannprisen 1994 i klassen klassisk musikk / samtidsmusikk for Messiaen – Vingt Regards
• Gammleng-prisen 2009 i klassen klassisk.

Kjelder

• Knut Olav Åmås [red.]: «Austbø, Håkon» i Hvem er hvem? (Aschehoug, 2008)
• «Håkon Austbø» på Wikipedia på bokmål og riksmål, innhenta 28.06.2009.
  • «Håkon Austbø – piano Arkivert 2007-05-05 ved Wayback Machine.» – biografi på Proarte.no.
  • «Håkon Austbø Arkivert 2008-04-08 ved Wayback Machine.» – biografi på Levendeklassisk.no

Bakgrunnsstoff

• Nettsida til Håkon Austbø
• Hyller mesteren med hovedverk av Erik Bjørnskau på Aftenposten.no (05.03.2008)