Wehdel
Dit Woort hett noch annere Bedüden: kiek dorför ünner Wehdel (Mehrdüdig Begreep).
| Wapen/Flagg | Koort | |
|---|---|---|
|
|
| |
| Basisdaten | ||
| Flach: | 17,58 km² | |
| Inwahners: | 2.152 (29. Februar 2012) | |
| Inwahnerdicht: | 122,4 Inwahners pro km² | |
| Hööchd: | 12 m över NN | |
| Postleettall: | 27619 | |
| Vörwahl: | 04749 | |
| Geograafsche Laag: | Koordinaten:53° 30′ N, 8° 48′ O53° 30′ N, 8° 48′ O | |
 | ||
|
| ||
Wehdel is en Dörp in de Gemeen Schippdörp in’n Landkreis Cuxhoben, Neddersassen. To dat Dörp höört ok de Oort Heidkultur to.
Geografie
[ännern | Bornkood ännern]Wehdel liggt op de Geest, an’n Rand na dat Moor hen. De Oort is so bi twee Kilometer von de Rohr, de in’n Süden von’n Oort twüschen Sülversee un Bülter See ehren Born hett un denn in’n Süüdwesten von’t Dörp langsflütt. De Geest is in’n Noorden so bi dree Kilometer weg.
Dicht bi sünd ok de Naturschuulrebeden Fleinsee/Oolluunbarger See, In’n Gliesch un Sülversee un Laaschmoor.
De Naveröörd sünd Oolluunbarg in’n Noorden, Geestenseth in’n Oosten, Wolljes in’n Süüdoosten, Loh in’n Süden, Heerst, Stinst un Donnern in’n Süüdwesten un Sellst in’n Westen.
Historie
[ännern | Bornkood ännern]Dat eerste Maal in de Oorkunnen kummt de Oort so üm 1300 vör.
1874 hebbt se in en Hümpelgraff en Peschiera-Pook funnen. 1909 hett Hans Müller-Brauel in Wehdel 113 Hümpelgräver fatstellt.
Bet 1851 weer de Oort Deel von dat Gericht Beverst. In de Franzosentied von 1810 bet 1813 hett Wehdel to de Mairie Ringst in’n Kanton Beverst tohöört. Wehdel hett von 1851 bet 1859 denn to dat Amt Beverst un bet 1885 to dat Amt Leh tohöört. Na 1885 weer dat in’n Kreis Geestmünn. 1932 is dat Deel von’n Landkreis Wersermünn un 1977 von’n Landkreis Cuxhoben worrn.
1967 hett sik Wehdel mit Oolluunbarg to een Gemeen tohoopslaten. Dat is ok de Grund, worüm de Oortsbörgermeester von Wehdel ok för Oolluunbarg mit tostännig is.
Mit de Gemeenreform in Neddersassen to’n 1. März 1974 is de Gemeen Wehdel Deel von de Gemeen Schippdörp worrn.
In’n Eersten Weltkrieg sünd 20 Soldaten ut Wehdel fullen oder vermisst, un in’n Tweten 96[1].
Inwahnertall
[ännern | Bornkood ännern]| Johr | Inwahners |
|---|---|
| 1824[2] | 40 Füürsteden |
| 1848[3] | 244 Lüüd, 47 Hüüs |
| 1. Dezember 1910[4] | 608 |
| 1925[5] | 742 |
| 1933[5] | 761 |
| 1939[5] | 822 |
| 29. Februar 2012[6] | 2.152 |
Religion
[ännern | Bornkood ännern]Wehdel is evangeelsch-luthersch präägt un höört to dat Kaspel Oolluunbarg.
Wapen
[ännern | Bornkood ännern]Dat Wapen von Wehdel wiest links op sülvern Grund en gröön Ekentelg, mit dree Bläder un een Ecker un rechts op roden Grund en sülvern Borgtoorn mit sülvern Wellenlienen in’n Schildfoot.
Börgermeesters/Oortsbörgermeesters
[ännern | Bornkood ännern]Börgermeesters:
- 1961-: Udo von Soosten
Oortsbörgermeesters:
- -2011: Claus Jüchtern
- 2011-: Otto Döscher
Kultur
[ännern | Bornkood ännern]In Wehdel an de Ooluunbarger Straat steiht en Denkmaal för de Fullenen ut de twee Weltkrieg’.
Verenen
[ännern | Bornkood ännern]De Schützenvereen Wehdel is 1898 grünnt worrn un de Turn- un Sportvereen 1904. De Karnevalsvereen Hol Fast Wehdel hett sik 1952 grünnt un fiert elk Johr en Karnevalsümtog.
Infrastruktur
[ännern | Bornkood ännern]Verkehr
[ännern | Bornkood ännern]Wehdel liggt an de Landsstraat 143, de in’n Oosten na Geestenseth un an de L 128 ran löppt un in’n Westen na Sellst.
Dat Dörp hett mit’n Bahnhoff Wehdel en egen Bahnhoff an de Bahnlien Bremerhoben–Buxthu.
Scholen
[ännern | Bornkood ännern]Wehdel hett de Börgermeester-von-Soosten-School (nöömt na Udo von Soosten), wat en Grundschool is. Ans gifft dat noch en Kinnergoorn.
Lüüd
[ännern | Bornkood ännern]De Politiker Udo von Soosten is 1923 in Wehdel boren un de Politiker Karl Müller hett von 1929 af an in Wehdel en Good bewirtschaft.
Footnoten
[ännern | Bornkood ännern]- ↑ http://www.denkmalprojekt.org/2009/wehdel_wk1u2_ns.htm
- ↑ C. H. Jansen: Statistisches Handbuch des Königreichs Hannover. 1824, Sied 642: http://books.google.de/books?id=tG0AAAAAcAAJ&pg=PA642
- ↑ Friedrich W. Harseim, C. Schlüter: Statistisches Handbuch für das Königreich Hannover. 1848, Sied 149: http://books.google.de/books?id=eOI-AAAAcAAJ&pg=PA149
- ↑ http://www.gemeindeverzeichnis.de/gem1900/gem1900.htm?hannover/geestemuende.htm
- ↑ a b c http://www.verwaltungsgeschichte.de/wesermuende.html
- ↑ http://www.schiffdorf.de/staticsite/staticsite.php?menuid=3&topmenu=90
Weblenken
[ännern | Bornkood ännern]
- Websteed to dat Dörp (hoochdüütsch)
Bramel | Geestenseth | Laven | Schippdörp | Sellst | Spaden | Wehdel | Wehden