Stotel
| Wapen/Flagg | Koort | |
|---|---|---|
|
|
| |
| Basisdaten | ||
| Flach: | 16,88 km² | |
| Inwahners: | 2.589 (31. Dezember 2016) | |
| Inwahnerdicht: | 153,4 Inwahners pro km² | |
| Hööchd: | 4 m över NHN | |
| Postleettall: | 27612 | |
| Vörwahl: | 04744 | |
| Geograafsche Laag: | Koordinaten:53° 27′ N, 8° 36′ O53° 27′ N, 8° 36′ O | |
 | ||
|
| ||
Stotel (hoochdüütsch Stotel) is en Dörp un Oortschop in de Gemeen Lox in’n Landkreis Cuxhoben, Neddersassen.
De lüttje Oort Speckje höört al von öllers bi Stotel mit bi.
Geografie
[ännern | Bornkood ännern]De Oort liggt op en Geestinsel, de twüschen Luun un Werser liggt. De Luun flütt direkt an’n Oort langs. De Werser liggt en poor Kilometer in’n Westen un dor liggt noch de Masch von Land Wöörden twüschen. Bi Stotel liggt ok de Stoteler See, de as Baggersee bi’n Bo von de A 27 anleggt worrn is. In’n Süden liggt dat Stoteler Moor.
Blangen de Luun löppt dat Water ut dat Rebeed deelwies ok över’n Hahnenknoop-Hetthorner Moorkanaal af.
De Naveröörd sünd Well in’n Noorden, Ness un Lox in’n Noordoosten, Düring in’n Oosten, Hetthorn un Hahnenknoop in’n Süüdoosten, Holt un Speckje in’n Süüdwesten, Maihusen un Wiemsdörp in’n Westen un Overwarf un Fleest in’n Noordwesten. De fröhere Stoteler Slüüs liggt in’n Noorden an de ole Münn von de Luun.
Historie
[ännern | Bornkood ännern]
Stotel kummt 1105 as Statle toeerst in en Oorkunn von’n Bremer Arzbischop Friedrich I. vör. De Naam warrt so düüdt, dat he sik ut Stod- (fast Land) un -loh (Holt) tohoopsett.[1]
Von Belang weer de Oort in de eerste Tied vör allen as Seet von de Greven von Stotel. De Greven sünd 1350 utstorven un de Greevschop is an dat Bremer Doomkapitel fullen. De Borgruin von Stotel ut de Tied von de Greven is 2006 opdeckt worrn.
In’n Eersten Weltkrieg sünd 37 Soldaten ut Stotel fullen oder vermisst un in’n Tweten Weltkrieg 51.[2]
Verwaltungsgeschicht
[ännern | Bornkood ännern]In de Franzosentied hett de Oort toeerst 1810 bet 1811 binnen dat Königriek Westfalen to de Mairie Stotel in’n Kanton Stotel höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Stotel in’n Kanton Bremerleh.
De Oort hett vör 1779 to dat Amt Stotel tohöört un denn bet 1831 to dat Amt Stotel-Vieland. Na 1831 weer dat in dat Amt Leh un denn von 1885 bet 1932 in’n Kreis Geestmünn. 1932 is dat Deel von’n Kreis Wersermünn worrn un 1977 von’n Landkreis Cuxhoben.
1968 is Stotel mit de Gemenen Hahnenknoop, Hetthorn, Langendammsmoor un Schwegen un de Rebeden Neenlannermoor (vörher Gemeen Neenlann) un Braamsterweiden (vörher Gemeen Braamst) to de vergrötterte Gemeen Stotel tohoopleggt worrn.
De vergrötterte Gemeen Stotel weer von 1971 bet 1974 Maat von Samtgemeen Lox. To’n 1. März 1974 sünd mit de Gemeenreform in Neddersassen Gemeen un Samtgemeen oplööst worrn un Stotel is as Oortschop mit egen Oortsraad un Oortsbörgermeester Deel von de Gemeen Lox worrn. Siet 1981 sünd Oortsraad un Oortsbörgermeester dör en Oortsvörsteiher aflööst.
Inwahnertall
[ännern | Bornkood ännern]| Johr | Inwahners |
|---|---|
| 1791[3] | 114 Füürsteden |
| 1812[4] | 521 |
| 1824[5] | 120 Füürsteden |
| 1848[6] | 694 Lüüd, 128 Hüüs |
| 1. Dezember 1871[7] | 772 Lüüd, 145 Hüüs |
| 1. Dezember 1885[8] | 714 Lüüd, 139 Hüüs |
| 1. Dezember 1905[9] | 757 Lüüd, 154 Hüüs |
| 1. Dezember 1910[10] | 926 |
| 1925[11] | 801 |
| 1933[11] | 891 |
| 1939[11] | 907 |
Religion
[ännern | Bornkood ännern]
Stotel is evangeelsch-luthersch präägt un billt mit de Margarethen-Kark en egen Kaspel.
För de Kathoolschen is de Johannes-de-Döper-Kark in Lox tostännig, de 1965 grünnt worrn is. Vör 1965 weer de Nikolaus-Kark in Wulsdörp tostännig. De Johannes-de-Döper-Kark höört siet 1. November 2006 to de Karkengemeen Hillig Hart Jesu in Geestmünn.
De Doden warrt ok op’n Karkhoff Stotel in de Borgstraat begraven. De Jöödsche Karkhoff besteiht vondaag blots noch as Denkmaal.
Wapen
[ännern | Bornkood ännern]Dat Wapen von Stotel wiest op blauen Grund en sülvern Spangenhelm mit rood-gollen Helmdeek un gollen Büffelhöörn. Twüschen de Höörn krüüzt sik twee sülvern Slötels.
Utklamüsert hett dat Wapen de Heraldiker Albert de Badrihaye. Vörlaag weer dat Segel von dat Amt Stotel. De Helm un de Höörn kaamt ut dat Wapen von de Greven von Stotel, de Slötels ut dat Wapen von dat Arzbisdom Bremen.
Börgermeesters/Oortsbörgermeesters/Oortsvörsteihers
[ännern | Bornkood ännern]Börgermeesters:[1]
- 1901–1945: Hinrich Bellmer
- 1945–1946: Willi Grünefeld
- 1946–1947: Georg Schröder
- 1947–1963: Johann Lahmann
- 1963–1972: Gerhard Glockzin
- 1972–1974: Walter Bachmann
Oortsbörgermeesters:[1]
- 1974–1976: Bruno May
- 1976–1981: Heinz Kiehl
Oortsvörsteihers:[1]
- 1981–1986: Heinz Kiehl
- 1986–1987: Heinz Friese
- 1987–1992: Gerhard Krause
- 1992–: Fritz Grieger
Kultur
[ännern | Bornkood ännern]En Denkmaal för de Fullenen ut de twee Weltkrieg’ steiht in Stotel op’n Karkhoff.
Verenen
[ännern | Bornkood ännern]De Schüttenvereen Stotel un Ümgegend is 1860 grünnt worrn.
Weertschop un Infrastruktur
[ännern | Bornkood ännern]
Stotel hett en egene freewillige Füürwehr, de an’n 10. November 1895 grünnt worrn is. De Heimaat- un Börgervereen Stotel is an’n 18. Mai 1973 grünnt worrn.[1]
To Anfang de Johren 1970 weer op dat Stoteler Hoge Feld en Trabantenstadt to Bremerhoben mit Geschäften, Restaurants un Wahnungen plaant. De eersten Plaans harrn 23 Wahnhüüs mit dree Etaaschen un dree Hoochhüüs mit acht Etaaschen vörsehn. De Plaans sünd wedder ümsmeten worrn un na de ne’en Plaans schullen 16 Wahnhüüs mit veer Etaaschen un dree Hoochhüüs mit bet to 15 Etaaschen boot warrn. Wielt de Boarbeiden noch in’e Gang weren, is de Boünnernehmer pankrott gahn. De Wahnhüüs mit veer Etaaschen sünd to’n groten Deel von annere Ünnernehmers trechboot worrn, aver dat ene 45 Meter hoge Hooghuus mit 15 Etaaschen is in’n Rohbo stahn bleven un nie trech worrn (de annern beiden Hooghüüs weren noch nich över de Bokuhl rut). Dat hett en Reeg Prozesse üm dat Gebüüd geven, bet dat 2001 afreten worrn is.
Banken
[ännern | Bornkood ännern]De Spoor- un Dorlehnskass Stotel (later Volksbank Stotel) is 1908 grünnt worrn.[1] Se is vondaag Deel von de Volksbank Bremerhoben-Cuxland.
De Filiaal von de Kreisspoorkass Wersermünn (vondaag Werser-Elv-Spoorkass) is 1960 inwieht worrn.[1]
Verkehr
[ännern | Bornkood ännern]An Stotel langs löppt de Landsstraat 135, de in’n Noorden in de Bundsstraat 6 övergeiht un över Wulsdörp na Bremerhoben rin geiht un in’n Süden twüschen Braamst un Hagen langs na Bremen-Noord. De L 135 warrt krüüzt von de L 143, de in’n Noordoosten över Lox un Bexhöv na Sellst löppt un in’n Westen in de Bundsstraat 437 övergeiht, de dör’n Wersertunnel föhrt.
De nächste Autobahn is de Autobahn 27 (Afsnidd Bremerhoben–Bremen). De Opfohrt 11 Stotel liggt so een Kilometer in’n Süüdwsten von Stotel an de L 143/B 437.
De nächste Bahnhoff is so bi söss Kilometer wied weg in’n Noordoosten de Bahnhoff Lox an de Bahnlien Bremen–Bremerhoben. Von 1911 bet 1964 harr de Oort ok en Bahnhoff an de Nedderwerserbahn.
Scholen
[ännern | Bornkood ännern]In Stotel gifft dat Kinnergoorns un de Grundschool Stotel.
Lüüd
[ännern | Bornkood ännern]De Offzeer Wilhelm Dieckmann is 1893 in Stotel boren un de Bremer Fabrikant Johann Böse 1739. De plattdüütsche Schriever Gustav Holthusen is dor 1848 boren.
Literatur
[ännern | Bornkood ännern]- Heinrich Schriefer: Hagen und Stotel. Geschichte der beiden Häuser und Ämter. Verlag der Nordsee-Zeitung, Geestmünn 1901
Footnoten
[ännern | Bornkood ännern]- ↑ a b c d e f g Heiner Frerichs: 900 Jahre Stotel im Wandel der Zeit. Chronologie der Ortschaft Stotel.
- ↑ Onlineprojekt Gefallenendenkmäler
- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 221
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 102
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 584
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 135
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 152
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 165
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 52
- ↑ Inwahnertallen op gemeindeverzeichnis.de
- ↑ a b c Inwahnertallen op verwaltungsgeschichte.de
