Silla
![](http://upload.wikimedia.org/wikipedia/commons/thumb/7/77/Three_Kingdoms_of_Korea_Map.png/250px-Three_Kingdoms_of_Korea_Map.png)
Silla is een vun de Rieken in Korea in de Tieden vun de Antike un dat Middeloller. Silla lä in den Südosten vun de Halfinsel vun Korea un hett sik vun dor ut mit Gewalt utbreet un dorbi de annern dree Staaten, de dat in Korea dortiets geev, bit to'n Jahr 668 ünnerkregen un in'n Dutt slahn.
Grünnt wurrn is dat Riek in dat Jahr 57 v. Chr. vun Hyekgeose. Dat warrt seggt, in dat tweede Jahrhunnert nah Christus bestünn Silla ut eenen Bund vun seß Dörper. Eerst as König Naemul dat Königdom as Arvdeel för sienen Söhn inricht harr un eerst recht, as dat Riek vun Gaya in dat 6.Johrhunnert ünnerkregen weer, is Silla to een richtig Riek wurrn.
660 weer to'n eersten Mal in de Geschicht vun Korea de ganze Süden vun dat Land in een Hand in dat Königriek vun dat Vereente Silla. Hööftstadt weer Gyeongju, de dat hüdigendags noch gifft. In dat 10. Johrhunnert leven dor mehr as 1 Million Minschen un dat weer een vun de gröttsten Metropolen vun Asien (Hüde leevt dor um un bi 280.000 Minschen). Endgüllig 676 hett Silla ok dat nöördliche Naberriek Goguryeo unnerkregen.
In dat 10.Johrhunnert is dat Riek vun Silla ünnergahn, as de leste König Gyeongson sien Macht in dat Jahr 936 in de Hannen vun den König Wanggeon vun Goryeo lä.