Siedland

Dat Siedland is de Deel von de Masch, de dicht an’n Rand na de Geest liggt un deper is as de Masch, de dichter bi de Küst oder bi’n Stroom liggt, de de Masch billt hett.

De Masch besteiht ut Bodden, de sik dör dat Sediment von en Stroom oder von de See billt hett, as dat Water de sieden Rebeden an’n Rand jümmer wedder överswemmt hett. Dorbi hett sik dicht an dat Över besünners veel Sediment aflagert. De Rebeden, de von dat Över wieder weg weren, sünd nich so faken överswemmt worrn. Dorüm hett sik langs dat Över en Överwall billt. Wenn sik achter den Överwall dat Water staut hett, hett sik in dat Siedland faken ok Moor un Brookbusch billt.

Dat Sediment von’n Överwall harr mehrstentieds mehr Sand, dat Siedland mehr Toon. De Högenünnerscheed twüschen Överwall un Siedland kann von en poor Dezimeter bet to en poor Meter recken.

Dat hett veel Waterbokunst bruukt, bet de Minsch dör Dieken, Gravens un Schöppwarken den gröttsten Deel von de Siedlannen oorbor maakt hett.