São Vicente (Kap Verde)
![](http://upload.wikimedia.org/wikipedia/commons/thumb/a/aa/Locator_map_of_S%C3%A3o_Vicente%2C_Cape_Verde.png/220px-Locator_map_of_S%C3%A3o_Vicente%2C_Cape_Verde.png)
São Vicente is en Eiland vun de Republiek Kap Verde in’n Atlantik. Se tellt to de wat lütteren Eilannen un billt för sik en Verwaltenseenheit (concelho).
Geografie
[ännern | Bornkood ännern]São Vicente liggt twüschen de Eilannen Santo Antão un Santa Luzia, üm un bi 640 km wiet weg vun’t afrikaansch Fastland. Dat Eiland warrt to de nöördlichen Ilhas de Barlavento (port.: „Eilannen över’n Wind“) rekent.
Öörd
[ännern | Bornkood ännern]De Middelpunkt för’t Leven op dat Eiland liggt in de Stadt Mindelo, wat denn ok de Hööftstadt vun São Vicente is. Dor leevt ruchweg 98 % vun de 68.000 Inwahners vun São Vicente[1]. De Haven vun Mindelo harr in verleden Tieten grote Bedüden för de Schipperee twüschen Afrika un Süüdamerika. De Porto Grande gellt as de schönste un sekerste Haven vun de Inselgrupp un weer fröher de gröttste Haven twüschen Lissabon un dat Kap vun’t Gode Hapen. Ut disse Tieten stammt ok noch de Roop vun de Stadt, de inst för sien Nachtleven mit Seelüüd un Prostitutschoon bekannt weer. En kulturellen Middelpunkt mit Nachtleven un Musikszeen gifft dat ok vundaag noch, man anners as in verleden Tieten.
Vun Mindelo föhrt Straten in verscheden Richten. Na Süüdwestento kummt een na dat Fischerdörp São Pedro an de Küst, dat wegen den tyypschen starken Wind sünners geern vun Bülgenrieders för jemehrn Sport opsöcht warrt. Op de Noordoostsiet gegenöver warrt de Küst vun en langtogen Bucht mit Sandstrand söömt. In’n Noorden liggt dat Fischerdörp Baía das Gatas, dat togliek ok en Ferienoort is. In’n Süüden vun de Bucht liggt de Ferienoort Calhau, de ok vun de Eenheimschen an de Wekenennen geern besöcht warrt. Wietere Öörd vun São Vicente sünd ünner annern Mato Ingles, Seixal, Madeiral un Topim[1].
Landschop
[ännern | Bornkood ännern]![](http://upload.wikimedia.org/wikipedia/commons/thumb/2/2b/Monte_Verde.jpg/220px-Monte_Verde.jpg)
Dat dröge Eiland is dör Vulkanismus tostannen kamen un wiest en bargige Landschop op. Se is an vele Steden präägt vun Dalen, de mit Sand, Kies un Steenschutt füllt sünd. Doröver henweg kiekt dree middelbargige, deelwies schroffe Felsmassiven. De hööchste Barg is de Monte Verde (port.: „Gröön Barg“) inn Noordoosten vunt Eiland mit 750 m Hööch. Wietere högere Bargens sünd de Topona (699 m), de Fateixa (571 m), de Goa Alto (538 ), de Tope de Caixa (535 m) un de Pico de Vento mit 437 m Hööch[1]. De Monte Verde is vundaag Deel vun en Natschonalpark. Dör de Hööch blifft hier faken de Passatnevel hangen, de för’n beten Fuchtigkeit sorgen deit. An de Hoochflachen is dat doröm ok möglich, Ackerbo to maken un Grööntüüch antoplanten. De Rest vun’t Eiland is teemlich ööd.
Historie
[ännern | Bornkood ännern]![](http://upload.wikimedia.org/wikipedia/commons/thumb/2/22/Old_postcard_SaoVicente1.jpg/220px-Old_postcard_SaoVicente1.jpg)
São Vicente is an’n 22. Januar 1462 opdeckt worrn, an’n Dag vun’n hilligen Vinzenz vun Valencia. Dat Eiland barg so wenig Water, dat se eerst nich besiedelt weer, man en poor Weiden för’t Veeh sünd vun Inwahners vun’t Navereiland Santo Antão nütt worrn.
De Naturhaven vun’t Eiland weer bit in’t 19. Johrhunnert vun Hoochseepiraten utnütt, üm sik to versteken oder torüchtotehn. Man, in de 1850er Johren, as de Dampschippfohrt opkamen de, is de Haven gau to een vun de gröttsten Umslagsteden för Kohl worrn. De Havenstadt Mindelo is in de Tiet vun’n Kohlenhannel entstahn un nee opbleiht in de 1880er Johren as de gröttste Ümschaltstatschoon vun britische Telegrafensellschoppen. De histroosche Stadtkarn is dorüm präägt vun portugeesche un britische Kulturelementen. De Stadt hett sik wieter to’n natschonalen Middelpunkt vun Kultur un Weertschop vun dat lütte Land entwickelt un hett en intressantet künstlerisch-intellektuell Leven tostanenn bröcht.
Kultur
[ännern | Bornkood ännern]To de bekannsten Künstler vun São Vicente tellt de Singersche Cesária Évora, de ok internatschonal bekannt worrn is. Bekannte kapverdische Schrievers, de vun dat Eiland kamt, sünd to’n Bispeel Germano Almeida, Corsino Fortes, Manuel Lopes, Onésimo Silveira oder de beropene Dichter Sergio Frusoni. Wietere Künstlers sünd ü. a. Manuel de Novas, Tchalê Figueira, Luís Ramos Morais oder Vasco Martins.
En Baía das Gatas finnt jeed Johr en Musikfest statt.
Weertschop un Tourismus
[ännern | Bornkood ännern]![](http://upload.wikimedia.org/wikipedia/commons/thumb/7/7b/Sao_pedro_airport.jpg/220px-Sao_pedro_airport.jpg)
Dat stäädtsch prägte Eiland leevt vör allen vun’n Haven, vun de lichten Industrie un vun ehr Hannels- un Verwaltensfunkschonen. De Tourismus is opstunns noch nich so dull utprägt, warrt aver wieter opboet. Lüüd, de sik geern an’n Strand leegt, finnt hier wiete Sandstrännen, de noch nich so överlopen sünd. Un sünners ok Watersportlers finnt op São Vicente gode Bedingen vör.
Dat Eiland is över den Haven mit de annern Eilannen vun Kap Verde verbunnen un kann över regelmatige Fährverbinnen anstüert warrn. An’n Luftverkehr is São Vincente dör den Flaaghaven São Pedro (IATA-Kood VXE) anbunnen.
Literatur
[ännern | Bornkood ännern]- A Poética de Sérgio Frusoni - Uma Leitura Antropológica (Mesquitela Lima: Lissabon, 1992: Gedichten in’t Kreol vun São Vicente mit portugeesche Översetten)
- Left-dislocation and topicalization in capeverdean creole. (Braga, Maria Luiza: Dokterarbeit, University of Pennsylvania, 1982)
- Textos Crioulos Cabo-Verdianos - Sergio Frusoni (In 'Miscelânea luso-africana' 1975, rutgeven vun Marius F. Valkhoff)
- Vangêle contód d'nôs móda (Sergio Frusoni, 1979, Nee Testament in’t Kreol vun São Vicente)
Borns
[ännern | Bornkood ännern]- ↑ a b c Kapverdische Inseln, Dumont Reisetaschenbuch, 3. Oplaag, 2007, ISBN 978-3-7701-5968-0
Ilhas de Barlavento:
bewahnt:
Santo Antão |
São Vicente |
São Nicolau |
Sal |
Boa Vista
nich bewahnt:
Santa Luzia |
Branco |
Raso |
Ilhéu de Sal Rei |
Ilhéu do Baluarte |
Ilhéu Rabo do Junco |
Ilhéu dos Pássaros
Ilhas de Sotavento:
bewahnt:
Brava |
Fogo |
Santiago |
Maio
nich bewahnt:
Ilhéus do Rombo (Ilhéu Grande |
Ilhéu de Cima) |
Ilhéu Laja Branca |
Ilhéu de Santa Maria
Koordinaten:16° 51′ N, 24° 58′ W