Platen (Backen)
![](http://upload.wikimedia.org/wikipedia/commons/thumb/b/b0/Uncooked_stuffed_mushrooms_on_a_baking_tray%2C_2006.jpg/220px-Uncooked_stuffed_mushrooms_on_a_baking_tray%2C_2006.jpg)
En Platen is en veerkantig Stück Blick mit en höger Rand för’n Backaven. Dor kummt dat Backels op un warrt op en Scheen in’n Aven rinschaven. Normalerwies sünd en poor Schenen verscheden hoog an de Siedenwannen von’n Aven anbröcht.
Fröher weren Platens vör allen ut Iesen, man vondaag maakt se de mehr ut Aluminium oder Stahl, beschicht mit Emaille oder mit Polytetrafluorethylen as Anti-Anback-Laag. Hett de Platen keen Anti-Anback-Laag warrt faken Backpoppeer bruukt, dat dat Backels nich anbackt oder anbrennt. Üm den hitten Platen ut’n Aven to halen warrt Avenhanschen bruukt.
För de Grött von Platens gifft dat keen Norm, de överall gellt. Dat kann vörkamen, dat welk Platens in welk Avens nich passt. Dat gifft ok Platens, de in de Breed verstellt warrn köönt, bi de de Bodden ut twee Delen maakt is, de inenanner schaven warrn köönt. Disse Platens sünd denn nicht dicht un natten Kraam kann dördrüppeln.