Mayra Andrade
Mayra Andrade (* 13. Februar 1985 in Havanna, Kuba) is en kapverdische Singersche.
Andrade weer op Kuba boren, man vun kapverdische Öllern, so dat se sülvst ok’n Kapverdesche is. Ofschoonst se noch teemlich jung is, hett se all in vele Länner leevt. So is se mit ehr Öllern na Kap Verde togen, na Senegal un Angola un hett ok al in Düütschland leevt. Ehr aktuelle Wahlheimat is Frankriek, wo se in Paris wahnt.
Se weer eerst sössteihn Johr oolt, as se 2001 bi de „Jeux de la Francophonie“ in Kanada de Goldmedaille as beste Singerin wunnen hett. Dorna güng dat mit ehr Loopbahn gau na baven.[1] 2007 hett de Singersche ehr eerst Album ünner den Titel Navega rutbröcht, woför se in dat Johr batz den Pries vun de düütsche Schallplattenkritik kregen hett. Se singt dorop vör allen in kapverdisch Kreol. In ehr Musik sleiht se en Weg twüschen Latin un Jazz in, wobi se brasiliaanschen Influss („Tunuka“) mit Flamenco („Lapidu na bo“) verbinnt un togliek ok de tyypsche Melancholie vun de traditschonellen kapverdischen Musik in Leder as „Dispidida“ un „Navega“ infangt, de faken mit dat portugeesche Fado vergleken warrt. Mayra Andrade höört blangen Cesária Évora un Lura intwüschen to de bekanntsten Singersches vun de lütten Inselgrupp in’n Atlantik.
2005 is se vun Charles Aznavour fraagt worrn, wat se nich mit em op sien ne’e Platt en Duett mit em singen müch. Dat hett se denn ok maakt.
2010 is se in den düütschen Kortfilm Das Rauschen des Meeres as Schauspelersche to sehn wesen. To den Film hett se ok Musik maakt. En wietere Filmrull speel se in den Film 7 días en La Habana (dt.: 7 Tage in Havanna) vun 2012, un 2017 weer se in en Gastrull in de portugeesche Feernsehreeg Ouro Verde to sehn.
Diskografie
[ännern | Bornkood ännern]- 2007: Navega
- 2009: Stória, Stória …
- 2010: Studio 105
- 2013: Lovely Difficult
- 2019: Manga