Karl Curdt

Karl Curdt (* 1. März 1885 in Schippdörp; † 17. Oktober 1959 in Bremerhoben) weer en düütschen Politiker von de SPD.

Curdt is 1885 in Schippdörp boren un hett Mürger lehrt. He weer al fröh aktiv in de Arbeiderbewegung un de Gewerkschaft. 1919 is he Maat von’n Gemeenutschuss von Schippdörp worrn. Von 1927 bet 1933 weer he Börgervörsteher in Wersermünn. Nadem de Natschonalsozialisten 1933 de Macht övernahmen hebbt, hett Curdt all sien öffentliche Ämter verloren.

1945 weer Curdt Liddmaat von’n Verwaltungsutschuss von Wersermünn, de von de amerikaansche Militärregerung ernannt worrn is. Nadem Wersermünn 1947 Deel von dat Land Bremen worrn is un den Naam Bremerhoben kregen hett, weer Curdt een von de 20 Afornten ut Bremerhoben, de an’n 7. Februar 1947 in de Breemsche Börgerschop wählt worrn sünd. Dor is he aver blots för en poor Maand, bet to de nächste Wahl Afornten bleven. He is denn 1948 in de Bremerhobener Stadtverorntenversammlung wählt worrn un weer von’n 23. Januar 1948 bet 1951 de eerste Stadtverorntenvörsteher (sien Nafolger weer Carl Stelljes). In de Stadtverorntenversammlung is he bet 1955 bleven. Von 1951 bet 1955 weer he ehrenamtlichen Stadtraad för Goorn- un Karkhoffswesen.