Karkweyh

Karkweyh is en Oortsdeel vun de Gemeende Weyhe in den Landkreis Deefholt in Neddersassen, nich wiet af vun de Bremer Grenz. In de Gemeen Weyhe is Karkweyh dat Dorp mit de meisten Inwahners. An’n 31. Dezember 2005 weern dat 9.317 Lüde.

Geografie

Laag

Karkwey liggt in de Midden vun de Gemeen Weyhe. De ehre annern Oorstdeele liggt all um Karkweyh umto.

Ströme un Beken

In’n Osten vun Karkweyh flutt de Hache. Se billt to’n groten Deel de Grenz na Suudweyh, wat ok na Weyhe henhören deit. De Ochtem flutt ut den Karkweyher See, wo de Hache un de Süster Beeke rinfleten doot. De Ochtem flutt denn wieter na Noordwesten to.

Dörper in'e Naberschop

Dörper in’e Naberschop sünd - vun Norden ut mit den Loop vun’e Klock uptellt, de Dörper Dreye, Suudweyh, Lahusen un Leeste, de all to de Gemeen Weyhe tohören doot.

Historie

Bit to’n 1. März 1974 bestunn de sülvstännige Gemeen Karkweyh. De hett sik tohopensett ut de Orstdeele Karkweyh, Lahusen un Dreye. To düsse Tied sünd de Gemenen Karkweyh, Suudweyh un Leeste tohopenfaat wurrn to de Eenheitsgemeen Weyhe.

1998 is de Kooperative Gesamtschool Karkweyh upmaakt wurrn. In de Gemeen Weyhe gifft dat al siet 1973 de Kooperative Gesamtschool in Leeste.