Jacob Zuma

Jacob Zuma, 2009

Jacob Gedleyihlekisa Zuma (* 12. April 1942 in Nkandla, KwaZulu-Natal) is de Präsident vun Süüdafrika sien regeern Partei ANC un vörmoligen Viezpräsidenten vun de Republiek vun Süüdafrika. Na den Sieg vun den ANC bi de Wahlen in’n Süüdafrika in’t Vörjohr 2009 weer af to sehn, dat he de neegste Präsident vun Süüdafrika weern scholl. An'n 9. Mai 2009 is he denn ok insett wurrn in sien Amt as Präsidenten. Zuma sien Stammnaam is Msholozi. So nömmt em ok siene Mackers, wenn se vun em snacken doot. Bekannt is he ok unner de Bookstaven JZ (utspraken Jay Zee, as in dat amerikaansche Engelsch)

Schandaal üm Zuma

Ofschoonst Minschen ok över de Grenzen vun de polit’schen Parteien hen em woll lieden möögt, is he ümstreden, siet dat sien Finanz-Raatgever anklaagt un veroordeelt is vunwegen Korruptschoon un Bedrog. Düsse Ümstänn hefft in’n Juni 2005 dor to föhrt, dat Zuma as Viezpräsident vun Süüdafrika afdanken möss. Kort na sien Afdanken as Viezpräsident vun Süüdafrika is Zuma anklaagt wurrn vunwegen Korruptschoon. Man vun de Anklaag is nich veel wurrn. In’n Dezember 2005 stünn Zuma wedder vör Gericht. Dütmol güng dat vör den Hogen Gerichtshoff in Johannesborg dor üm, dat he en junge Fro Gewalt andaan hebben scholl. Dat hannel sik dor üm Fezeka Kuzwayo bi, de Dochter vun en vun Zuma siene Frünnen ut de Dage vun den Striet gegen de Apartheid. Kuzwayo weer HIV-positiev. Zuma hett dor vun wüßt. An’n 8. Mai 2006 hett de Gerichtshoff de Anklaag afdaan. De Richter weer tosamen mit de Verdeedigung to de Ansicht kamen, Zuma un de junge Fro harrn dat beide up Sex afsehn harrt. Bi dat Verhöör hett Zuma seggt, he harr woll Sex ohn Schutz mit de Fro harrt, de em nu verklagen dö, man he weer ja achterher unner de Bruse gahn. Dor harr he doch dat Risiko vun HIV wat mit afminnert. Wat he dor seggt hett, dor hett he denn oorntlich wat för insteken mösst vun den Richter, man ok vun Gesundheitslüde un Aktivisten gegen AIDS. De Tekner Zapiro tekent em nu jummers bloß mit en Brusenkopp achtern an’n Dööz.

Zuma siene Lüde in den ANC

Anners as Nelson Mandela un Thabo Mbeki höört Zuma to den Stamm vun de Zulu. Mank de ANC-Politikers is he de meist bekannte Zulu. Binnen den ANC steiht he den lunken Flögel vör un dor steiht he den vörmoligen Präsidenten Mbeki just mit gegen över. De hett dat mit de Weertschop holen un is amenne ankeken wurrn as een, de liberale Politik maken dö. De Lüde, de achter Zuma stünnen, hefft em ok Stütt un Stöhn geven, nadem he as Viezpräsident vun Süüdafrika Bott geven möss. Se hefft dor ok för sorgt, dat he sien Rull as Viezpräsident vun den ANC beholen konn. An’n 18. Dezember 2007 hett dat slumpt, un he is in Pietersburg (Polokwane) mit 505 to 329 Stimmen gegen Mbeki to'n ne’en Präsidenten vun den ANC wählt wurrn.