Horst Wolter
.jpg)
Horst „Luffe“ Wolter (* 8. Juni 1942 in Berlin) is en ehmalger düütsch Footballspeler.
Leven
[ännern | Bornkood ännern]Horst Wolter betekent sück sülvst as „Rucksackberliner“ un is in de Mark Brannenborg boren.[1] 1952 hett he mit sien Öllern de dormalige DDR verlaaten, wo he vörher ünner annern Liddmaat vun de Jungen Pioniere weer, wahn sietdem in Berlin-Charlottenburg un hett en Lehre as Backer in Berlin maakt; dorher stammt ok sien Ökelnaam „Luffe“, as man in Bronswiek traditschonell Brötkers betekent. Nahmiddags traineer he bi den SC Charlottenburg as Rechtsbuten. Dör de intensive körperlich Düppelbelastung wessel he sien Positschoon tietwies up Doorhöder, wiel he dor weniger loopen muss.[1]
Loopbahn
[ännern | Bornkood ännern]
Wolter keem 1959 vun den Berliner SC Charlottenburg to Eintracht Braunschweig, tonächst as Rechtsbuten in de so nöömt Sonderjugend. Siet 1960 speel he as Doorhöder eerst in de A- Jöögd un denn af 1961 in de Böverliga Nord, dormals de hööchste düütsch Speelklass, bevör man de Bundsliga inführt hett. To disse Positschoon weer he dör Tofall kommen, wiel de bitherige Doorhöder Heinz Winnecke de Eintracht verlaaten dee un kien Ersatz dor weer.[2] An‘n 3. Dezember 1961 geev Wolter sien Debüt in de Böverliga Nord bi en 3:1 Sieg gegen Eintracht Nordhorn. In de Böverliga Nord keem Wolter to fief Insätze för de Eintracht ut Bronswiek. Wolter hett tüschen 1963 un 1977 as Doorhöder 243 Spelen in de Football-Bundsliga för Eintracht Braunschweig (195) un för Hertha BSC (48) maakt. 1967 wurr he as Stammdoorhöder vun dat Bronswieker Team Düütsch Footballmeester. Insgesamt kreeg de Mannschap, för de Wolter dat Door höden dee, blots 27 Gegegndoren un hett dormit en Bundsliga-Rkord upstellt, de eerst 1988 vun Werder Bremen ünner Otto Rehhagel mit den dormaligen Stammdoorhöder Oliver Reck ünnerboden wurr. 1975 wurr he mit Hertha BSC, wo he denn in de laat 1980er Johren ok as Manager tätig weer, överraschend Viez-Meester. 1977 hett he Hertha verlaaten un speel noch för een Saison bi den VfL Seesen.
Wolter hett tüschen 1967 un 1970 blots 13 Lännerspelen för den DFB maakt,[3] wiel he achter Sepp Maier immer as Ersatzdoorhöder sett weer.[1] He wurr mit dat Natschonalteam bi de Football-Weltmeesterschap 1970 in Mexiko Dart. Dat 1:0 in dat Spiel um Platz dree gegen Uruguay weer sien letzt Lännerspeel. He is dormit de eenzig düütsch Doorhöder, de bi en Weltmeesterschap ahn Gegendoor bleev.
Tosommen mit de Mannschap, de den darten Platz bi de Weltmeesterschap 1970 haalt harr, kreeg he dat Sülvern Lorbeerblatt.[4]
1971 wurr Wolter wegen sien Bedeeligung an den Bundsliga-Schandaal to en Geldstraaf vun 4400 DM veroordeelt. Grund weer, wat in den Afstiegskamp 1971 passeert weer, in den dat Manipulatschonen geven harr. Insgesamt hemm 16 Bronswieker Speler den DFB tegenöver ingestahn, dat se in dat Speel gegen Overhuus, dat 1:1 utgung, woll kien Manipulatschoon utöövt harrn, den Bronswiekern wurr aber vun Arminia Builefeld en tosätzliche Siegprämie vun tonächst 120.000 DM (later up 170.000 DM erhöht) verspaaken. 100.000 DM wurrn vöraf utbetahlt, 40.000 DM nah dat Speel.
En an’n 15. Mai 1974 to de Football-WM in Düütschland herutbrocht Sünnerbreefmark vun de Düütsch Bundspost (Michel-Nr. 811) wiest, wu Horst Wolter en Ball afwehrt, aber en beten wat afännert, wiel traditschonell levend Personen nich up en Breefmark afbildt wurrn. [5]
Nah sien Loopbahn
[ännern | Bornkood ännern]Neben de Karriere hett Wolter noch en Utbillen as Bankkoopmann maakt, later weer he van 1986 bit November 1990 Manager vun Hertha BSC. Dornah weer he as Versekerungsmakler tätig. 2000 wurr bi hüm Lymphdrüsenkrebs faststellt, wat he aber överstahn hett. Wolter leevt in Bad Harzburg.[1] Dor is he ok Vörsitter vun den Wertschapsbiraat vun den Goslarer SC.[6]
Weblinks
[ännern | Bornkood ännern]- Horst Wolter in de Datenbank vun Weltfussball.de
- Horst Wolter in de Datenbank vun fussballdaten.de
- Horst Wolter in de Datenbank vun transfermarkt.de
- Indrag bi den DFB
- Horst Wolter in de Datenbank vun kicker.de
Enkeld Nahwiesen
[ännern | Bornkood ännern]- ↑ a b c d Interview in: RevierSport 29/2013, S. 54 f.
- ↑ Wir sind Eintracht, InterviewVörlaag:Toter Link afropen an’n 16. April 2013.
- ↑ Matthias Arnhold (15. Juli 2020): Horst Wolter - International Appearances. RSSSF.com. Afropen an’n 16. Juli 2020.
- ↑ Unterrichtung des Bundestages durch die Bundesregierung vom 29. 9. 1973 - Drucksache 7/1040 - Anlage 3 Seiten 54 ff.
- ↑ Postfrisch – Das Philatelie-Journal März/April 2007, S. 33, Herausgeber. Deutsche Post AG.
- ↑ Homepage vun den Vereen, afropen an’n 30. April 2021