Fedderlohmöhlen

Wapen/Flagg	Koort
Basisdaten
Bundsland: Neddersassen Landkreis: Rodenborg Samtgemeen: Bootel Gemeen: Karkwals
Inwahners:
Postleettall:	27386
Vörwahl:	04269
Geograafsche Laag:	53° 2′ N, 9° 26′ O

Fedderlohmöhlen (hoochdüütsch Federlohmühlen) is en lütten Oort in de Gemeen Karkwals (Samtgemeen Bootel) in’n Landkreis Rodenborg, Neddersassen. De Oort höört von öllers bi Karkwals mit bi.

Geografie

Fedderlohmöhlen liggt an’n Fedderlohmöhlenbeek, de later in de Rodau münnt. Üm den Oort rüm gifft dat veel Holt. In’n Noordwesten liggt dat Naturschuulrebeed Groot un Witt Moor.

De Naveröörd sünd de Hartmannshoff in’n Noorden, Hassel in’n Noordoosten, Riekenbossel in’n Oosten, Lürken in’n Süüdoosten, Op’n Sand un Wittenmoor in’n Süden, Karkwals in’n Süüdwesten un Westerwals in’n Westen.

Historie

De Watermöhl von Fedderlohmöhlen is wohrschienlich al üm 1600 rüm anleggt worrn. Dat hüdige Gebüüd is von 1789. De Möhl is bet 1974 mit Waterkraft lopen un denn noch bet 1985 elektrisch. Na disse Tied stünn de Möhl leddig. De Möhl is von 1999 bet 2001 denn wedder restaureert worrn.

Verwaltungsgeschicht

In de Franzosentied von 1810 bet 1814 hett de Oort to de Mairie Karkwals in’n Kanton Rodenborg höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Amtsvaagdie Karkwals in dat Amt Rodenborg tohöört. Na 1885 weer dat in’n Kreis Rodenborg, de 1977 mit’n Landkreis Bremervöör to’n ne’en un grötteren Landkreis Rodenborg tohoopgahn is.

In dat 19. Johrhunnert hett Fedderlohmöhlen to de Buurschop Karkwals höört un later to de Gemeen Karkwals. Mit de Gemeenreform in Neddersassen an’n 1. März 1974 is de Gemeen Karkwals mit Riekenbossel to de ne’e un gröttere Gemeen Karkwals tohoopgahn.

Inwahnertall

Johr	Inwahners
1791-00-001791	1 Füürsteed
1812-00-001812	16
1824-00-001824	1 Füürsteed
1848-00-001848	11 Lüüd, 1 Huus
1871-12-011. Dezember 1871	11 Lüüd, 2 Hüüs
1885-12-011. Dezember 1885	27 Lüüd, 4 Hüüs
1905-12-011. Dezember 1905	19 Lüüd, 3 Hüüs

Religion

Fedderlohmöhlen is evangeelsch-luthersch präägt un höört to dat Kaspel von de Bartholomäus-Kark in Karkwals.

För de Kathoolschen is de Corpus-Christi-Kark in Rodenborg tostännig.

Weertschop un Infrastruktur

Verkehr

Fedderlohmöhlen is över lüttjere Straten anbunnen an de Kreisstraten K 206 un K 209. De K 209 löppt in’n Süüdwesten na Karkwals un in’n Noordoosten över Riekenbossel an de Bundsstraat 440 un wieder na Bootel. De K 206 geiht in’n Süüdwesten över Karkwals na Süderwals un in’n Noordoosten an de B 404 un na Hast un Worth. De K 206 warrt in Karkwals von de K 205 krüüzt, de in’n Oosten na Wittörp geiht un in’n Noordwesten na Westerwals un an de B 215. De B 215 föhrt in’n Süüdwesten na Veern un in’n Noordoosten na Rodenborg. De B 440 geiht in’n Noordwesten na Rodenborg un in’n Süüdoosten na Visselhöövd.

De nächste Autobahn is de Autobahn 27 (Afsnidd Bremen–Wasra). De Opfohrten 25 Veern-Noord un 26 Veern-Oost doot so 16 Kilometer in’n Süüdwesten von Fedderlohmöhlen liggen. De Opfohrt 51 Posthusen op de Autobahn 1 (Afsnidd Hamborg–Bremen) liggt 22 Kilometer in’n Noordwesten an de L 155.

De nächste Bahnhoff is so bi 13 Kilometer wied weg in’n Noorden de Bahnhoff Rodenborg an de Bahnlien Hamborg–Bremen. Fröher hett dat ok op’n Bahnhoff Westerwals an de Bahnlien Veern–Rodenborg Personenverkehr geven. Disse Bahnhoff leeg söss Kilometer in’n Westen.

Scholen

De Kinner gaht na de Grundschool Karkwals.