Edmund Muskie
![](http://upload.wikimedia.org/wikipedia/commons/thumb/6/61/Edmund_Muskie.jpg/220px-Edmund_Muskie.jpg)
Edmund Sixtus Muskie (Marciszewski) (* 28. März 1914 in Rumford, Oxford County, Maine; † 26. März 1996 in Washington D.C.) weer en US-amerikaansch Politiker ut den US-Bundsstaat Maine. He amteer as Gouverneur vun Maine, as US-Senator un as Butenminister vun de USA. Dorneben hett he ok för dat Amt vun den Viezpräsident vun de USA kandideert.
Fröhe Johren un politischer Upstieg
[ännern | Bornkood ännern]Muskie hett 1936 dat Bates College un 1939 de juristisch Fakultät vun de Cornell University afslooten. Wiels den Tweeten Weltkrieg deen he in de US Navy. Nah den Krieg is he de Demokraatsche Partei in den traditschonell republikaanschen Bundsstaat Maine bitreden. Tüschen 1946 un 1952 weer he Afordneter in dat Repräsentantenhuus vun Maine. Van 1952 bit 1956 hörr he den Democratic National Committee an. 1954 wurr he to'n nee'n Gouverneur vun Maine wählt.
Gouverneur vun Maine
[ännern | Bornkood ännern]Sien nee Amt hett Edmund Muskie an' 5. Januar 1955 antreden. Nahdem he 1956 weer wählt wurrn weer kunn he bit to'n 2. Januar 1959 amteeren. Wiels disse Tiet wurr de Schoolpolitik vun dat Land dör en höhgeren Etat verbetert. Dat Glieker gull ok för dat Gesundheitswesen. Dormals wurr ok dat Ministerium för Hannel un Industrie grünnd. De Utbau vun den Straatenbau wurr dör den Verkoop vun Staatsanleihen in Hööcht vun 25 Millionen Dollar vörandreven. De Mehrwertstüer wurr um een Perzent höhger sett un de Amtstiet vun de Gouverneure vun Maine vun twee up veer Johr hoochsett. Nah sien Wahl in den US-Senat is Muskie an' 2. Januar 1959 vun sien Amt torüchtreden. Dat weer nipp un nau 5 Daag för den eegentlichen Afloop vun sien Amtstiet. Disse Lücke muss vun Senatspräsident Robert Haskell överbrückt wurrn, de de Amtstiet vun Muskie afsluuten dee.
Senator, Präsidentschapskandidat un Butenminister
[ännern | Bornkood ännern]![](http://upload.wikimedia.org/wikipedia/commons/thumb/8/80/President_Ronald_Reagan_receives_the_Tower_Commission_Report_with_John_Tower_and_Edmund_Muskie.jpg/220px-President_Ronald_Reagan_receives_the_Tower_Commission_Report_with_John_Tower_and_Edmund_Muskie.jpg)
1958 wunn Muskie de Wahl gegen den Republikaner Frederick Payne un wurr Senator. In de Johren 1964, 1970 un 1976 wurr he weer wählt. Somit hett he sien Staat tüschen 1959 un 1980 in' Kongress vertreden.
1968 weer he de demokraatsche Kandidat för de amerikaansch Viezpräsidentschap an de Siet vun Hubert Horatio Humphrey. Wiel de Wahlen in dit Johr aber vun den Republikaner Richard Nixon wunnen wurrn, bleev disse Kandidatur ahn Spood. 1972 is sien Bewarf um de US-Präsidentschap all in de Vörwahlen scheitert. De Grund dorför weern Sabotageaktschonen (nömmt "Röttenficken") vun den in den Watergate-Schandaal verwickelten Donald Segretti. Sien Hööchpunkt weer en fälscht Breef vun den demokraatschen Kandidaten Muskie (mit sien Breefkopp), de mit Lögengeschichten an Journalisten un Kongressafordnete schickt wurr. Se mussen eerst mühsam dementeert wurrn. En anner fälscht Breef wurr so manipuleert, as of Muskie sien frankokanaadsch Wähler mit dat Schimpwoort Canucks bedoch. Bi wiedere Manipulatschonen wurr Muskies Staff diskrediteert. As Muskie bi en Wahlveranstaltung de Dinge richtigstellen wull, hebbt sien Nerven verseggt un he fung an to huulen. Dormit weer de Kandidatur vun Muskie vörbi.
De Funktschoon as Butenminister vun de USA harr Muskie van' 8. Mai 1980 bit 18. Januar 1981 ünner Präsident Jimmy Carter inne. In dat Kabinett hett he dormals de Nahfolge vun Cyrus Vance antreden; nahdem Carter de Wahl gegen Ronald Reagan verloren harr, is Muskie ut de Regeeren utscheeden.
Edmund Muskie is 1996 storven. He weer mit Jane Grey verheiradt, mit de he fiev Kinner harr.
Weblenken
[ännern | Bornkood ännern]- National Governors Association
- Edmund Muskie in dat Biographical Directory of the United States Congress (engelsch)
- Edmund S. Muskie Archives and Special Collections Library