Edgar Evans
![](http://upload.wikimedia.org/wikipedia/commons/thumb/5/52/Edgar_Evans.jpg/220px-Edgar_Evans.jpg)
Edgar Evans (* 7. März 1876 in Middleton, Rhossili, Wales; † 17. Februar 1912 in de Antarktis, vermootlich an den ünneren Beardmore-Gletscher) weer en walisischer Marineünneroffizier in den Deenstrang vun en First Class Petty Officer un Deelnehmer an de beid Antarktis-Expeditschonen vun Robert Falcon Scott.
Leven
[ännern | Bornkood ännern]Evans weer de Söhn vun den Seemann Charles Evans (1839–1907). Nah den Besöök vun de St. Helen’s Boys School in sien Heimatoort is he 1891 in dat Öller vun 15 Johren de Royal Navy bitreeden. Af 1899 hett he sien Deenst up de HMS Majestic versehn, wo he Robert Falcon Scott kennenlehrt hett, de dor as Torpedo-Leutnant deen. Dor kreeg Evans sien Ökelnaam „Taff“.
1901 bit 1904 nehm Edgar Evans an de Discovery-Expedition, Scott sien eerst Reis in de Antarktis, deel. Nah sien Rückkehr hett he an' 13. Dezember 1904 sien Cousine Lois Beynon heiraadt, un in de folgen Johren keemen sien dree Kinner to Welt.
1910 wurr Evans utwählt ok an Scott sien tweet Antarktisreis, de Terra-Nova-Expedition, deeltonehmen. Teel weer de Eroberung vun den Süüdpool. Tosommen mit Scott, Wilson, Bowers un Oates hörr Edgar Evans to de Grupp, de an' 18. Januar 1912 den Pool recken dee. Roald Amundsen und de sien Grupp weern aber all fiev Week ehrder dor ween.
Evans weer den Strapazen vun den Rückweg nich mehr wussen un is as Eerst vun de Expeditischoonsdeelnehmer storven. Up den Henweg harr he sück bi den Umbau vun en Schledden en Snittbesehren an de Hand totrucken. Den Wunn heel aber wohrschienlich wegen utbreeken Skorbut nich af, sonnern keem in jaggt un fung an to eitern. An' 4. Februar 1912 full Evans in en Gletscherspalt. Wohrschienlich truck he sück dorbi en Besehren an sien Kopp to. In de Folg stell sück en flinken geistigen un körperlichen Verfall in. So geschwächt brook Evans, de nich mehr in dat Schleddengeschirr mittruck, an' 16. Februar 1912 dicht bi den Beardmore-Gletscher tosommen. De anner Mannschapsliddmaaten mussen ümkehren un hüm up den Schledden laden. In de Nacht is he denn storven, ahn dat Bewusstween weer torüch to kreegen hemm. Wu un wor he bestatt wurr, is nich överleefert, wiel dat in dat Daagbook vun Scott kein Upteeken doröver gifft un all anner Liddmaaten vun de Grupp ok bi disse Expeditschoon to Dood keemen.
Nah Evans is da Evans-Firnfeld in de Antarktis nömmt.
Literatur
[ännern | Bornkood ännern]- Isobel Williams: Captain Scott’s Invaluable Assistant Edgar Evans. The History Press, 2012, ISBN 0-7524-5845-0 (engelsch)
Weblenken
[ännern | Bornkood ännern]- Edgar Evans, Körtbiografie up de Homepage vun dat Polar Museum an dat Scott Polar Research Institute der University of Cambridge
- Antarctic Explorers: The TERRA NOVA Expedition 1910-13 (engelsch)