Amtsgericht Winsen

Dat Amtsgericht Winsen is een von de söss Amtsgerichten in’n Landgerichtsbezirk Lümborg. Dat hett sien Seet in Winsen in’n Landkreis Horborg.

Överornt Gerichten

Dat Amtsgericht Winsen sünd in’n Instanzentog dat Landgericht Lümborg, dat Oberlandsgericht Celle un de Bundsgerichtshoff in Karlsruhe överornt.

Gerichtsbezirk

To’n Gerichtsbezirk höört en groten Deel von’n Landkreis Horborg, utbenahmen de Stadt Bookholt un de Gemenen Hullnst, Jesborg, Vosshusen, Rosengoorn un Töst, de all to’n Gerichtsbezirk von dat Amtsgericht Töst tohöört.

Geschicht

Mit dat hannöversche Gerichtsverfatensgesett von’n 8. November 1850, dat an’n 1. Oktober 1852 in Kraft gahn is, sünd Verwaltung un Justiz kumplett trennt worrn un de Amtsgerichten sünd as ünnerst Gerichten inricht worrn. Dat Amtsgericht Winsen is dor denn nee schapen worrn un weer tostännig för dat Amt Winsen, dat Amt Parrns un de Stadt Winsen.

Mit dat Groot-Hamborg-Gesett 1937 hett de Amtsgerichtsbezirk Winsen de Öörd Bullenhusen un de Delen von Over, de op dat linke Över von de Elv liggen deen, von dat Amtsgericht Horborg-Willemsborg övernahmen.

Direkter von dat Gericht is Stand 2014 Albert G. Paulisch.

Amtsrichters

~1858: Johann Jacob Gerdes
–1867: Friedrich Wilhelm von Bobers
1867: von Bülow
1867–1875: Schreiber

Gerichtsgebüüd

Dat Gericht is in dat Slott Winsen ünnerbröcht. Deelwies is dat Gericht ok in dat ole Fängnis blangen dat Slott ünnerbröcht. Nadem dat Amtsgericht 1852 grünnt worrn is, is dat in dat Slott intagen. In dat Slott hebbt to de Tied ok al de Amtlüüd von dat Amt Winsen seten. Nadem dat Amt Winsen 1885 in’n Kreis Horborg opgahn is, is de Verwaltung na Horborg tagen un dat Gericht weer alleen in’t Slott. Na’n Tweten Weltkrieg is de Verwaltung von’n Kreis Horborg denn von Horborg na Winsen ümtagen un dat Gericht müss sik dat Slott mit de Kreisverwaltung delen. Nadem de Kreisverwaltung 1961 in dat ne’e Kreishuus un toletzt 1994 dat Katasteramt uttagen is, bruukt dat Gericht dat Slott nu ganz alleen.

Kiek ook bi

List von de Amtsgerichten in dat Königriek Hannover

Weblenken

Websteed von dat Amtsgericht Winsen (hoochdüütsch)
Översicht över de Rechtsspröök von dat Amtsgericht Winsen (hoochdüütsch)

Koordinaten:53° 22′ N, 10° 12′ O

Amtsgerichten in’n Landgerichtsbezirk Lümborg