Vaksin
![](http://upload.wikimedia.org/wikipedia/commons/thumb/9/90/Flickr_-_Official_U.S._Navy_Imagery_-_A_Sailor_administers_a_smallpox_vaccine..jpg/517px-Flickr_-_Official_U.S._Navy_Imagery_-_A_Sailor_administers_a_smallpox_vaccine..jpg)
Vaksin adolah bahan antigenik nan digunoan untuak mandapekan kakebalan ka suatu panyakik. Maagiah vaksin (imunisasi) dilakuan untuak mancegah atau mangurangi pangaruah infeksi panyabab panyakik-panyakik tatantu. Vaksin biasonyo manganduang agen nan manyarupoi mikro organisme nan mambuek panyakik yang alah dilamahkan atau mati, dari toksinyo, atau dari salah ciek protein pamukaannyo. Agen marangsang sistem imun untuak mangenali agen sabagai ancaman, mahancuannyo, jo untuak labiah mangenali dan mahancuaan mikroorganisme nan takaik jo agen nan mungkin basarobok di maso depan. Vaksin dapek basifaik profilaksis (misalnyo untuak mancegah atau mampabaiki efek infeksi di maso nan ka datang dek patogen alami atau "lia") atau terapeutik (misalnyo vaksin untuak kanker).[1][2][3][4]
Maagiah vaksin disabuik vaksinasi.Vaksinasi marupokan meetode paliang efektif untuak mancegah panyakik manula. Kakebalan karano vaksinasi tajadi manyaluruah di dunia sabagian gadang batangguang jawek ateh pemberantasan cacar jo pambatasan panyakik sarupo polio, campak, jo tetanus. Efektivitas vaksinasi alah dipalajari dan diverifikasi sacaro luweh, misalnyo vaksin tabukti efektif tamasuak vaksin influenza,[5] vaksin HPV,[6] jo vaksin cacar aia.[7] Organisasi Kesehatan Dunia (WHO) malaporkan bahwa vaksin berijin saat iko kini tasadio untuak duo puluah limo infeksi nan dapek dicegah.[8]
Vaksin barasa dari kato vaccinia, yaitu panyabab infeksi cacar sapi nan katiko diagiahan ka manusia, akan manimbuaan pangaruah kakebalan kapado cacar.
Jenis vaksin
[suntiang | suntiang sumber]Vaksin dibuek mangunoan babarapo proses babeda. Vaksin iko diklasifikasian manuruik mode antigen nan takanduang didalamnyo di antaronyo vaksin manganduang virus hiduik nan alah dilamahan (dilamahan atau diubah bia indak manyababkan panyakik); organisme atau virus nan indak aktif atau tabunuah; racun nan indak aktif (untuak panyakik bakteri di mano racun nan dihasilkan dek bakteri, dan indak bakteri itu surang); atau hanyo segmen patogen (tamasuak vaksin subunit dan konjugat)
Vaksin hiduik nan dilamahan
[suntiang | suntiang sumber]Vaksin iduik nan dilamahan (live attenuated vaccine) manganduang mikroorganisme nan hiduik dan dilamahan yang mahasilkan infeksi tabateh nan cukuik untuak mamicu respons imun, tetapi indak cukuik untuak manyababkan keadaan panyakik nan sabananyo.[9] Untuak mancapai kondisi lamah sarupo iko, agen panyabab panyakik dikultur baulang kali pado inang asing. Salanjuiknyo akan diparoleh mutan nan kurang virulen yang disasuaikan jo inang asing, dan mutan ko dapek digunoan untuak vaksinasi. Contoh vaksin hiduik: vaksin polio oral (OPV), campak (measles), rotavirus, damam kuniang (yellow fever).[10]
Vaksin inaktif
[suntiang | suntiang sumber]Vaksin nan tabunuah atau indak aktif (killed/inactivated vaccines) bakarajo dengan bantuan babagai metode kimia, radiasi, atau paneh. Patogen indak aktif sahinggo indak dapek mareplikasi di inang nan digunoan sabagai agen vaksinasi. Vaksin bakteri umumnyo manggunoan mikroorganisme mati, sadangkan vaksin virus tadiri dari agen nan indak aktif.[9] Contoh vaksin nan alah dimatian: vaksin pertusis utuh (whole-cell pertussis) dan inactivated polio virus (IPV).[10]
Vaksin toksoid
[suntiang | suntiang sumber]Vaksin toksoid bararti vaksin nan manganduang toksoid atau toksin nan alah diinaktifkan. Contohnyo vaksin tokoid ko iolah toksoid tetanus jo difteri toksoid.[10]
Vaksin subunit
[suntiang | suntiang sumber]Vaksin subunit maganduang antigen murni daripado manggunoan saluruah mikoorganisme. Antigen nan dimurnian bisa barupo toksoid. fragmen subseluler, atau molekul pamukaan, nan diangkuik dek pambawok nan babeda. Respon imun tahadap vaksin subunit babeda badasakan antigen nan digunoan. Antigen protein biasonyo manimbuakan respons imun adaptif bagantuang sel T, sadangkan antigen polisakarida mahasilkan respons indak bagantuang sel T.[9] Contoh vaksin subunit: acellular pertussis (aP), Haemophilus influenza type b (Hib), pneumococcal (PCV-7, PCV-10, PCV-13), jo hepatitis B (HepB).[10]
Vaksin konjugat
[suntiang | suntiang sumber]Vaksin terkonjugasi dapek didefinisian sabagai subkelas vaksin subunit karano pambawo protein digunoan untuak mambawo antigen babasis polisakarida.
Imunologi vaksin
[suntiang | suntiang sumber]Vaksin nan alah dimasuakan ka dalam badan dapaek marangsang bangkiknyo sistem imun dan tahap akhirnyo adolah dibantuaknyo antibodi jo tabantuaknyo sel-sel memori untuak malawan panyakin nan divaksin. Proses iko malibaikan sistem imun bawaan dan sistem imun adaptif. Antigen nan masuak akan ditangkok dek sel dendritik dan mangalami pangolahan antigen. Salanjuiknyo tajadi reaksi barantai nan mahasilkan sel pambantu dan sel memori. Sel pambantu dalam hal iko manginduksi aktivasi sel B dalam mahasilkan antibodi.[11]
Bahan
[suntiang | suntiang sumber]Vaksin dapek barupo galur virus atau bakteri nan alah dilamahkan, sahinggo indak manimbuakan panyakik. Vaksin dapek juo barupo organisme mati atau hasil-hasil pamurniannyo (protein, peptida, partikel sarupo virus). Vaksin akan mampasiapkan sistem imun manusia atau hewan untuak batahan malawan sarangan patogen tatantu, tautamo bakteri, virus, atau toksin. Vaksin bisa pulo mambantu sistem imun untuak malawan sel-sel (kanker).
Sekarang ko alah tadapek babagai macam vaksin untuak bamacam-macam panyakik, walaupun damikian vaksin alum ado untuak babarapo panyakik pantiang, sarupo panyakik malaria, HIV[12], atau damam badarah.
Vaksin biasonyo maganduang ciek atau labiah adjuvan, nan digunoan untuak maningkekan respon kakebalan. Toksoid tetanus, misalnyo, biasonyo diadsopsi ka tawas. Bahan iko manyajikan antigen sadamikian rupo untuak mahasilkan aksi nan labiah gadang daripado toksoid tetanus cair biaso.
Vaksin jugo maganduang bahan pangawet untuak mancegah kontaminasi jo bakteri atau jamua. Sampai babarapo taun tarakhir, thimerosal pangawet digunoan dalam banyak vaksin nan indak maganduang virus hiduik. Pado taun 2005, ciek-cieknyo vaksin anak-anak di AS nan maganduang thimerosal dalam jumlah labiah gadang adolah vaksin influenza,[13] nan saat iko kini direkomendasian hanyo untuak anak-anak dengan faktor risiko tatantu.[14] Vaksin influenza dosis tunggal nan dibarikan di Inggris indak macantuman thiomersal (namonyo di Inggris) dalam bahan-bahannyo. Pangawet dapek digunoan pado babagai tahap produksi vaksin, jo metode pangukuran paliang canggih mungkin mandeteksi jajak pado produk jadi.
Efektivitas
[suntiang | suntiang sumber]Dalam sijarah, vaksin adolah nan taefektif untuak malawan jo mamusnahan panyakik infeksi. Bagaimanopun, katarbatasan dari efektifitasnyo ado.[15] Kadang-kadang, palinduangan gagal, karano sistem kakebalan badan indak mambarikan respon nan diinginan atau malah indak marespon samo sakali kapado antigen nan dibarian dek vaksin. Kurangnyo respon sistem kakebalan badan tasabuik tajadi karano faktor-faktor klinis sarupo misalnyo diabetes, panggunoan steroid, infeksi HIV atau umua. Bagaimanapun hal iko juo tajadi karano faktor genetik, jikok sistem kakebalannyo indak mamiliki galur sel B nan dapek mahasilkan antibodi nan bareaksi efektif dan mangikek antigen dari patogen.
Bahkan jiko nan divaksinasi magambangkan antibodinyo, proteksinyo mungkin indak cukuik; kakebalan mungkin bakambang talalu lambek, antibodi mungkin indak dapek manumpas antigen sapanuahnyo, atau bisa juo tadapek babagai galur patogen, indak sadoalahnyo bagantuang pado sistem reaksi kakebalan. Bagaimanapun, bahkan hanya sabagian, talambek, atau kakebalan nan lamah, sarupo tajadi pado kakebalan silang pado suatu galur daripado galur target, mungkin maringanan infeksinyo, nan manurunan tingkek kamatian, manurunan banyaknyo nan sakik (morbiditas) dan mampacapek payambuhan.a
Pado 1958, tadapek 763,094 kasus campak di Amerika Serikat; jo 552 di antaronyo maninga.[16][17] Sasudah pamakaian vaksin baru, jumlah kasus manurun hinggo kurang dari 150 kasus per tahun.[17] Di awal 2008, tadapek 64 kasus nan didugo campak, 54 pandarito mandapekannyo dari lua AS, dan hanyo 13% nan bana-bana kanai di AS; 63 dari 64 urang tasabuik alum pernah divaksinasi campak atau indak yakin alah divaksinasi sabalumnyo.[17]
Manumbuahan kakebalan
[suntiang | suntiang sumber]Sistem kakebalan manganali partikel vaksin sabagai agen asing, mahancuakannyo, dan "mangingek-ingek"-nyo. Katiko di kamudian hari agen nan virulen manginfeksi badan, sistem kakabalan badan alah siap:
- Manetralkan bahannyo sabalum bisa mamasuki sel; jo
- Mangenali dan mahancuakan sel nan alah tainfeksi sabalum agen iko dapek bakambang biak
- jikok tetap sakik, mako sakiknyo akan jauah labiah ringan
Vaksin nan dilamahkan digunoan untuak malawan tuberkolosis, rabies, dan cacar; agen nan alah mati digunoan untuak magatasi kolera dan tifus; toksoid digunoan untuak malawan difteri dan tetanus.
Efek samping
[suntiang | suntiang sumber]Tadapek babarapo efek sampiang sasudah manarimo vaksin sarupo mual, pusiang, jo muntah. Hal tasabuik tajadi karano badan akan marespon seolah-olah tajadi infeksi.[18]
Maskipun baitu, vaksin sajauah iko indak virulen sabagaimano agen "sabananyo", dan mako dari itu harus dipakuaik jo vaksinasi ulang babarapo kali tiok taun. Suatu caro untuak untuak mangatasi hal iko adolah jo vaksinasi DNA. DNA nan manjadi suatu bagian virus atau bakteri nan dapek dikenali dek sistem kakebalan dimasuakan jo diekspresian dalam sel manusia/hewan. Sel-sel iko salanjuiknyo mahasilkan toksoid agen panginfeksi, tanpa pangaruah babahayo lainnyo. Pado taun 2003, vaksinasi DNA masih dalam pacobaan, namun manunjuakan hasil nan manjanjikan.
Pambarantasan panyakik
[suntiang | suntiang sumber]Babagai panyakik sarupo polio alah dapek dikandalian di negara-negara maju dan jugo Indonesia melalui panggunoan vaksin sacaro massal (rubella dilaporkan alah musnah di AS). Cacar nanah alah barasil dimusnahan di saluruah dunia, makonyo indak ado lai vaksinasi cacar nanah (harap bedaan jo cacar aia).
Sapanjang mayoritas masyarakaik alah diimunisasi, panyakik infeksi akan sulik mawabah. Pangaruah iko disabuik kakebalan kalompok. Babarapo kalangan, tarutamo nan malakuan praktik pangobatan alternatif, manulak untuak maimunisasi dirinyo atau kaluarganyo, badasakan kayakinan bahwasanyo efek samping vaksin marugian inyo. Paro pandukuang vaksinasi rutin manjawek jo mangecekan bahwa efek samping vaksin nan alah barijin, jikok ado, jauah labiah ketek dibandiangkan akibaik infeksi panyakik, atau sangaik jarang, dan baranggapan bahwa hituangan untuang/rugi haruslah badasakan kauntuangan kapado kamanusiaan sacaro kasaluruhan, indak hanyo kauntuangan pribadi nan diimunisasi. Risiko utamo rubella, misalnyo, adolah tahadap janin wanita hamil, tatapi risiko iko dapek sacaro efektif dikurangi jo imunisasi anak-anak agar indak manular kapado wanita hamil.
Sistem pambarian vaksin
[suntiang | suntiang sumber]Tadapek babarapo caro baru dalam pagambangan pado sistem pambarian vaksin, nan diharokan akan labiah efisien dalam pambariannyo. Metode-metode nan mungkin tamasuak liposome jo ISCOME (immune stimulating complex).[19] Sistem pambarian vaksin nan baru adolah pambarian malalui oral, sarupo vaksin polio (jugo vaksin kolera). Dengan pambarian malalui oral, mako indak ado risiko mengkontaminasi darah.
Sijarah
[suntiang | suntiang sumber]Edward Jenner manyadari bahwa urang-urang nan alah takanai infeksi cacar sapi (cowpox) sabalumnyo, mako indak akan takanai smallpox (variola vera). Pado taun 1796, Edward Jenner manggunoan jawi nan diinfeksi jo cacar sapi (variolae vaccinae) untuak mambuek vaksin nan malindungi masyarakaik dari smallpox.[12] Inyo manginokulasi saurang anak nan kanai cowpox nan salanjuiknyo manginfeksinyo jo smallpox. Anak tasabuik tatap sihaik, karano alah takanai cowpox sabalumnyo. Inokulasi cowpox manyababkan nan sakik labiah saketek daripado inokulasi smallpox.
Liek pulo
[suntiang | suntiang sumber]Rujuakan
[suntiang | suntiang sumber]- ↑ "Therapeutic cancer vaccines". J. Clin. Invest. 125 (9): 3401–12. September 2015.
- ↑ "Prophylactic vaccines are potent activators of monocyte-derived dendritic cells and drive effective anti-tumor responses in melanoma patients at the cost of toxicity". Cancer Immunol. Immunother. 65 (3): 327–39. March 2016.
- ↑ "HPV prophylactic vaccines: lessons learned from 10 years experience". Future Medicine. 10 (8): 999–1009. 2015.
- ↑ "Development and implementation of papillomavirus prophylactic vaccines". J. Immunol. 192 (9): 4007–11. May 2014. doi:10.4049/jimmunol.1490012. PMID 24748633.
- ↑ Seasonal influenza vaccines. Curr. Top. Microbiol. Immunol. Current Topics in Microbiology and Immunology. 333. 2009. hlm. 43–82. ISBN 978-3540921646. PMID 19768400.
- ↑ "Evaluating the impact of human papillomavirus vaccines". Vaccine. 27 (32): 4355–62. July 2009. doi:10.1016/j.vaccine.2009.03.008. PMID 19515467.
- ↑ Liesegang TJ (August 2009). "Varicella zoster virus vaccines: effective, but concerns linger". Can. J. Ophthalmol. 44 (4): 379–84. doi:10.3129/i09-126. PMID 19606157.
- ↑ World Health Organization, Global Vaccine Action Plan 2011-2020., Geneva, 2012.
- ↑ a b c "Active and passive immunity, vaccine types, excipients and licensing.=Occup. Med". 57. 2007: 552–556. doi:10.1093/occmed/kqm110. PMID 18045976.
- ↑ a b c d "MODUL 1 – Tipe Vaksin - DASAR KEAMANAN VAKSIN WHO". Archived 2021-01-25 di Wayback Machine. in.vaccine-safety-training.org. Diakses tanggal 2021-01-17.
- ↑ Vartak, Abhishek; Sucheck, Steven J. (2016-04-19). "Recent Advances in Subunit Vaccine Carriers". Vaccines. 4 (2).
- ↑ a b Stern AM, Markel H (2005). "The history of vaccines and immunization: familiar patterns, new challenges". Archived 2010-11-25 di Wayback Machine. Health Aff. 24 (3): 611–21.
- ↑ "Institute for Vaccine Safety – Thimerosal Table". Diarsipkan dari versi asli tanggal 2005-12-10.
- ↑ Wharton, Melinda E.; National Vaccine Advisory committee "U.S.A. national vaccine plan"[pranala nonaktif permanen]
- ↑ Grammatikos, Alexandros P.; Mantadakis, Elpis; Falagas, Matthew E. (June 2009). "Meta-analyses on Pediatric Infections and Vaccines". Infectious Disease Clinics of North America. 23 (2): 431–57.
- ↑ Orenstein WA, Papania MJ, Wharton ME (2004). "Measles elimination in the United States" Archived 2020-04-02 di Wayback Machine.. J Infect Dis. 189 (Suppl 1): S1–3.
- ↑ a b c "Measles—United States, January 1 – April 25, 2008". Morb. Mortal. Wkly. Rep. 57 (18): 494–8. May 2008.publikasi akses terbuka - bebas untuk dibuka
- ↑ Media, Kompas Cyber (2017-09-02). "Mengenal Berbagai Efek Samping Imunisasi: Bahaya Atau Tidak? - Kompas.com". KOMPAS.com (dalam bahasa Inggris). Diakses tanggal 2021-01-02.
- ↑ Morein B, Hu KF, Abusugra I (2004). "Current status and potential application of ISCOMs in veterinary medicine". Adv Drug Deliv Rev. 56 (10): 1367–82.
Pautan lua
[suntiang | suntiang sumber]![]() |
Ado kategori tantang Vaksin di Wikimedia Commons |