Mitologi Batak
Mitologi Batak adolah kapicayoan asali nan daulu dianuik dek urang Batak di Sumatera Utara, iyolah sabalun datangnyo agamo-agamo Kristen Protestan, Kristen Katolik, ataupun Islam.[1] Ado baragam versi tarombo (tambo) Batak nan tatulih pado pustaha (buku-buku kuno) nan ditaliti para sijarawan, namun pado umumnyo manyabuik tokoh-tokoh di bawah ko.[1]
Dalam kapicayoan ko, dewa tatinggi nan mambuek alam rayo jo sagalo isinyo adolah Debata (Ompung) Mulajadi na Bolon, nan batahta di ateh langik.[1][2][3] Salain sabagai panguaso dunia ateh, Debata Mulajadi na Bolon marupoan juo panguaso dunia tangah sarato dunia mukalauik aluih, tapi disabuik jo namo lain.[1] Sabagai panguaso dunia tangah disabuik Silaon na Bolon, dan sabagai panguaso dunia mukaluik aluih disabuik Pane na Bolon.[1] Ciptaan patamo Debata Mulajadi na Bolon adolah Manukmanuk Hulambujati, iyolah saikua ayam ajaib nan baparuah basi bakuku galang bakilauan.[2] Manukmanuk Hulambujati kudian batalua tigo talua, lalu tiok talua mamuncuaan dewa-dewa nan banamo Debata Batara Guru, Debata Sorisohaliapan, jo Debata Balabulan, nan kudian dipanggia sacaro basamo-samo jo sabuikan Debata na Tolu.[2]
Si Boru Deak Parujar anak dari Debata Batara Guru adolah nan patamo turun ka muko bumi, iyolah di Pusuk Buhit.[2][3] Di bumi Si Boru Deak Parujar kawin jo Raja Odapodap,[3] nan barasa dari talua Manukmanuk Hulambujati juo.[2] Anak patamo kaduonyo bantuaknyo sarupo talua bulek indak sarupo jo manusia, lalu disuruah tanam dek Debata Mulajadi na Bolon, kudian manjadi tanam-tanaman di saluruah pamukoan bumi.[2] Mangko tanam-tanaman dipandang sabagai sudaro tuo manusia.[2] Salanjuiknyo lahia lai anak kamba, dinamoan Raja Ihat Manisia jo Boru Ihat Manisia.[2]
Satalah Raja Ihat Manisia jo Boru Ihat Manisia dewasa,[3] kaduonyo lalu kawin dan manurunan saluruah manusia lainnyo tamasuak muyang urang Batak nan banamo Si Raja Batak.[2][3] Si Boru Deak Parujar jo Raja Odapodap pulang baliak ka langik satalah kaduo anaknyo kawin, dan sajak tu ubuangan antaro langik jo bumi taputuih indak sarupo daulunyo.[2][3]
Caliak pulo
[suntiang | suntiang sumber]Rujuakan
[suntiang | suntiang sumber]- ↑ a b c d e Tobing, Ph.O.L. (1956). The Structure of the Toba-Batak Belief in the High God. Amsterdam: Jacob van Kampen. p. 35, 137. https://books.google.co.id/books/about/The_structure_of_the_Toba_Batak_belief_i.html?id=aHEiAAAAMAAJ&redir_esc=y.
- ↑ a b c d e f g h i j Siburian, Robert (2008). "Kearifan Ekologi Dalam Budaya Batak Sebagai Upaya Mencegah Bencana Alam". Dalam Manusia Indonesia, Lembaga Ilmu Pengetahuan Indonesia. Vol. XXXIV No. 1. Yayasan Obor Indonesia: 73-76.
- ↑ a b c d e f Bonnefoy, Yves; Doniger, Wendy (1993). Asian Mythologies. Ed. berilustrasi. University of Chicago Press. p. 166. ISBN 0226064565, 9780226064567. https://books.google.co.id/books?id=r4I-FsZCzJEC&pg=PA166&dq=si+boru+deak+parujar&hl=id&sa=X&ved=0ahUKEwiy0dTx7-XOAhWKM48KHTj_CvAQuwUIKjAB#v=onepage&q=si%20boru%20deak%20parujar&f=false.