A. Roesma
A. Roesma | |
|---|---|
| Lahia | 13 Juli 1896 |
| Maningga | 25 Oktober 1964 (umua 68) |
| Kabangsaan | Indonesia |
| Alma mater | Nederlandsch-Indische Artsen School, Surabaya |
| Karojo | Pengajar, dokter |
| Dikana dek | Presiden (Rektor) Universitas Andalas (Unand) kedua |
| Pasangan |
|
| Anak | Dari Annita Schonstadt
|
Prof. dr. Aleina Roesma atau nan bagala Datuk Indo Kayo (lahia di Palembayan, 13 Juli 1896 – maningga di Padang, 25 Oktober 1964 pado umua 68 taun - ) [1][2] adolah surang guru jo ahli kasehatan Indonesia. Inyo marupokan presiden (rector) ka-2 di Universitas Andalan (Unand), Padang, Sumatera Barat. A. Roesma mancapai jabatan presiden (rektor) manggantikan, Prof. Dr. M. Syaaf, pado taun 1958. Inyo manjabaik jabatan rektor salamo 6 tahun, dan kamudian digantikan dek Prof. Drs. Harun Alrasjid Zain pado taun 1964.[3]
Kaluargo
[suntiang | suntiang sumber]Aleina Roesma lahia di Palembayan, Agam, Sumatera Barat pado 13 Juni 1896. Inyo adolah anak surang dari pasangan Ahmad Datuk Maroehoem Basa jo Radjimah. Ayahnyo, Ahmad pado umua mudo dipiliah manjadi verpleger (perawat laki-laki) dari pamarentah Hindia Belanda. Pado suatu wakatu Ahmad ditawari dek Kepolisian Hindia Belanda untuak manjadi polisi di Tanah Datar, dan salapehnyo inyo dipiliah untuak mamandang Demang (bupati) partamo di Bangko, Sarolangun, Karesidenan Jambi.[4] Dikampuang Palembayan, inyo kamudian diangkek manjadi Datuak Maroemhoem Basa. Ahmad kawin jo padusi sakampuangnyo yang banamo Radjimah (putri Upiak Lisah) nan mano Aleinan Roesma adolah anak tungga dari urang ko.
Radjimah, amaknyo A. Roesma maningga pado taun 1922 nan mano caritonyo agak sadiah. Ibu A. Roesma yang taragak ka anaknyo mambaranikan diri naiak kapa KPM ka Batavia. Amaknyo tau kalau A. Roesma basakola di STOVIA tapi indak bisa manamuinyo do. Tanyato wakatu itu, A. Roesma alah pindah ka NIAS di Surabaya. Wakatu di Batavia Radjimah jatuah sakik nan kamudian dirawat di CBZ (RSCM) nan kamudian maningga disitu. Dipakirokan inyo kanai panyakik TBC yang banyak kanai ka warga Minang nan tingga di rumah gadang.
Sataun kamudian, Ahmad (ayah Roesma) babini baliak jo Aisyah, putri Angku Lareh dari Sipisang, disabalah kampuang Palembayan. Dari pakawinan iko inyo punyo 4 urang anak yoitu Ahdjidar, Ahdjidir, Durmawel jo Bismar. Durmawel Ahmad ko nan kamudian manjadi Mayor Jenderal TNI, kamudian Sekretaris Kopkamtib, nan kamudian tarakhir sabagai Direktur Umum Bank Indonesia.[4]
Riwayaik iduik
[suntiang | suntiang sumber]A. Roesma dahulunyo disakolahan dek ayahnyo di Europeesche Lagere School (ELS) di Fort de kock atau kini labiah dikenal urang Bukiktinggi jo inyo dulu tinggal basamo urang padagang di janjang 40. Sasudah inyo luluih dari sakolah ELS inyo malanjuikkan sakolahnyo di STOVIA, Batavia tapi cuman sampai di tingkek 2 karano inyo dulu basalisiah jo dosen anatominyo yang mangecean salamo inyo sakolah disitu jan baharok ka bisa lulus. Dek karano itu, kasudahannyo Roesma pindah ka NIAS (Nederlandsche Indische Artsen School) di Surabaya nan kamudiannyo luluih pado 24 Desember 1923.[4]
A. Roesma baliak ka kampuang halamannyo di taun 1925 nan kamudian babini jo Badariah Malik nan bagalah dek urang Balando “de roos van Padang”. Kamudian Roesma basamo bininyo barangkek ka Batavia untuak manjalani wahjib karajo di CBZ (RSCM), nan sasudah tu ka Palembang sudah tu ka Banjarmasin (1927). Salasai wajib karajo, inyo bakarajo sabagai dokter pakebunan di parusahaan Japang di Hajup Estate, Tanjung Borneo (Kalimantan).
Pado taun 1933 A. Roesma malanjuikkan sakolahnyo ka Medische Fakulteit, Leiden Universiteit, Balando. Hal iko dikaranokan wakatu di Kalimantan, Controleur Balando indak katuju barubek ka urang nan cuman taman Indisch Arts mode A. Roesma ko, dek karano itu pulo inyo malanjuikkan sakolahnyo ka Balando nan sasudah tu nyo tamat pado tauun 1935.[4]
Pado taun 1951 sasudah pindah ka Kota Padang, inyo khawatir akan ado katabalakangan pandidikan pamuda-pamudi Minang baliak katiko tajadinyo pagolakan PRRI nan mangakibatkan bubarnyo Universitas Andalas.
Pado taun 1958, sasudah ABRI turun di Padang, Roesma basamo bantuan Panglimo ABRI mambangun baliak Universitas Andalas diawali dari Fakultas Hukum. Samaso itu, Roesma bolak-baliak ka Universitas Indonesia untuak mamintak supayo mangirim spesialis yang baru luluih dari Fakultas Kedokteran, tarutamo yang barasa dari Minang. Awalnyo cuman babarapo nan pulang, sarupo Prof. Hanif (internist), Dr. Sjamsir Daili (Pediatri) dari UI dan Dr. Kardiman Thalut (bedah) dari UGM.
Pado tanggal 1 Oktober 1958, A. Roesma manjadi Ketua Presidium jo tokoh lain sarupo Dr. Lim Giem Tjang, Dr. Roemawi jo babarapo dekan fakultas lain. Pado taun 1 Agustus 1959, Roesma diangkek manjadi pagawai pamarentah oleh Departemen Pendidikan nan bagala Profesor di Fakultas Kedokteran Universitas Andalas, kamudian pado bulan Mei 1963 Roesma dilantiak manjadi Rektor Universitas Andalas (1960-1963).[4]
Kiprahnyo diawal maso kamerdekaan
[suntiang | suntiang sumber]Diawal maso kamerdekaan, Roesma maraso risau mancaliak anak-anak mudo nan indak bisa basakola karano di Sumatera sakolah cuman sampai MULO. Kalau anak Sumatera nio malanjuikkan sakolah harus pai ka Jawa, sahinggo inyo takuik indak akan ado lai urang Minang nan mamimpin bisuak. Dek karano itu, basamo babarapo guru Roesma barembuk mandirikan SMT (Sakolah Menengah Tinggi) nan balokasi di jl. Birugo, di depan kantor polisi Bukik Tinggi. Sajak badiri, Roesma manjadi Direktur SMT ABC (kini dikenal sabagai SMA ABC). Salain itu, Roesma tapiliah manjadi Ketua PNI di Bukiktinggi. Dek karano unsua komunih alah manyusup ka Bukiktinggi, Roesma ikuik dicilok wakatu paristiwa Madium nan kamudian dibaok ka lereang gunuang Marapi.[4]
Pranala lua
[suntiang | suntiang sumber]- "Sejarah Singkek Fakultas Ekonomi" Situs resmi Fakultas Ekonomi Universitas Andalusia. Diakses 17 Juli 2013.
Caliak juo
[suntiang | suntiang sumber]Referensi
[suntiang | suntiang sumber]- ↑ https://www.geni.com/people/Aleina-Roesma/6000000042057727920
- ↑ https://aswilblog.wordpress.com/2021/05/04/prof-dr-aleina-roesma-pejuang-pendidikan-di-ranah-minang-yang-dilupakan/
- ↑ Marthias Dusky Pandoe, Julius Pour. "Jernih melihat cermat mencatat: antologi karya jurnalistik wartawan senior Kompas" Penerbit Buku Kompas. Diakses 17 Juli 2013.
- ↑ a b c d e f https://aswilblog.wordpress.com/2021/05/04/prof-dr-aleina-roesma-pejuang-pendidikan-di-ranah-minang-yang-dilupakan/