Fiteny tsirkasiana

Ny fiteny tsirkasiana na fiteny tserkesy dia fizaràn' ny fianakaviam-piteny kaokaziana avaratra-andrefana, fitenin' ny vahoaka Tsirkasiana. Misy fiteny tsirksiana roa, voafaritry ny fenitry ny literatiora ao aminy, dia ny fiteny adigeana (кӀахыбзэ; fantatra ihany koa amin' ny anarana hoe fiteny tsirkasiana andrefana), misy mpiteny 500 000 any ho any, sy ny fiteny kabardiana (къэбэрдейбзэ; fantatra koa amin' ny hoe fiteny tsirkasiana atsinanana), misy mpiteny iray tapitrisa. Ireo fiteny roa ireo dia tena ahafahan' ny mpiteny azy an-daniny sy ankilany mifankahazo fiteny, saingy misy ihany ny tsy fitoviany izay iheverina azy ireo ho fitenim-paritra miavaka tsara. Ny firaketana an-tsoratra voalohany indrindra natao amin' ny fiteny tsirkasiana dia natao amin' ny tarehin-tsoratra arabo, noraketin' ilay mpanao dia lavitra tiorka atao hoe Evliya Çelebi tamin' ny taonjato faha-17.

Misy marimaritra iraisana eo amin' ny mpahay teny momba dia mihevitra ny fiteny adigeana sy ny fiteny kabardiana ho fiteny roa miavaka tsara. Na izany aza, ny teny ampiasaina eo an-toerana hanondroana ireo fiteny ireo dia manao azy ireo ho fitenim-paritra. Miantso ny tenany hoe адыгэ / adyge ("Adigeana") amin' ny fitenin-drazany ny vahoaka Tsirkasiana. Any amin' ny faritra atsimo-andrefana amin' i Rosia eorôpeana dia misy ihany koa ny faritra antsoina hoe Adygea (rosiana: Адыгея / Adygeya), voahodidina ao anatin' i Krasnodar Krai, izay nomena anarana avy amin' ny anaran' ny Tsirkasiana anondroany ny tenany.

Amin' ny teny rosiana, ny fizaràn' ny fiteny tsirkasiana dia raisina ho vondrom-piteny sady antsoina hoe адыгские / adygskie (midika hoe "fiteny adigeana"), fa ny fiteny adigeana kosa dia antsoina hoe адыгейский / adygeyskiy (midika hoe "fitenin' ireo ao amin' ny [Repoblikan' i] Adygea). Ny teny hoe tsirkasiana sy tserkesy indraindray dia ampiasaina amin' ny fiteny maromaro ho mitovy amin' ny hoe "fiteny kaokaziana avaratra-andrefana" amin' ny ankapobeny na ny "fiteny adigeana" manokana.