Carlo Maria Maggi
![]() |
Quest articol chì l'è scrivud in lombard, con la Noeuva Ortografia Lombarda |
![](http://upload.wikimedia.org/wikipedia/commons/thumb/a/aa/2146_-_Milano_-_Piazza_Mercanti_-_Monumento_a_Carlo_Maria_Maggi_%281890%29_-_20_May_2007_-_Foto_Giovanni_Dall%27Orto.jpg/200px-2146_-_Milano_-_Piazza_Mercanti_-_Monumento_a_Carlo_Maria_Maggi_%281890%29_-_20_May_2007_-_Foto_Giovanni_Dall%27Orto.jpg)
![](http://upload.wikimedia.org/wikipedia/commons/thumb/4/4a/Rime_varie_di_Carlo_Maria_Maggi.tif/lossy-page1-220px-Rime_varie_di_Carlo_Maria_Maggi.tif.jpg)
Carl Maria Maggi (Milan, 3 Magg 1630 – 22 april 1699) l'è stad un famos poeta e autor de comedie in milanes, famos anca per havé inventad el personagg del servidor Meneghin che l'è poeu diventà la mascara pussee popolara del carnaval ambroeusian e fin el soranom de tucc i milanes. De sorapu l'è considerad el pader de la leteradura milanesa moderna.
Vita
Fioeul unegh del Giovann Battista Maggi, agiad mercant de or e seta, e de l'Angela Riva, el Carl Maria Maggi el nass a Milan el 3 masg 1630 in de la cà de Porta Romana, de denanz al monaster del Lentasi.[1] El se laurea in utroque a Bologna in del 1649 e donca, despoeu un quai viagg in part d'Italia, el se stabiliss definitivament in patria, indova el 14 setember 1656 el sposa l'Anna Maria Monticelli, che ghe darà vundes fioeui. El viv a Milan in fina al 22 april 1699, circondad de la stima di concitadin che 'n apprezzaven la dotrina e la retituden con la quale el trgn i important ufis de secretari del Senad, de insegnant de letere latine e greche in di Scoeule Palatine, de curador di confin e de soraintendent a l'Universitaa de Pavia.
Granda fama, in patria e foeura, per i oeuvre leterarie per i quai el gh'ha volt onor e grand lod e l'è stad fad member de tante academie, in tra i quai la Crusca e l'Arcadia. De giovin el compon melodram, che poeu el refiuda (Augusto in Egitto, Bianca di Castiglia, ecc.). El scriv anca prolegh, intermezz, scene, La Griselda, tragedia derivada de la novella del Boccaccio, du dram sacher, Teopisto, e Il ritorno d'Azoto (in su la parabola del fioeul prodegh), la Ifigenia derivada de l'Euripide e la Troade derivada del Seneca. Ma de tute i so produzzion teatrai se regorden specialment i comedie in vers, in di quai un quai personagg el parla in lombard: Il Mancomale, Il barone di Birbanza, I consigli di Meneghino, Il falso filosofo. Ie compon in di ultem agn de vita. Quei comedie chì hann el merit de render popolara la figura del Meneghin, vegnud poeu la mascara milanesa. El Maggi el compon anca lireghe in latin, in grech e in spagnoeul, tante in talian, in tra i quai minga poche de sogget moral e religios. El comenza cont el seguì el gust del so temp; la so fama de poeta l'era inscì granda ai so dì, che el Muratori el dubita minga de paragonàll al Dant e al Petrarca. Incoeu el Maggi ghe par verseggiador corret, ma fregg e se 'n regorda squas domà i lireghe ispirategh de l'amor de patria. Pussee vive inn i poesie burlesche, tante di quai in lombard. In prosa el scriv orazzion latine e taliane, letere e la traduzzion del frances de du liber spirituai, i Sentimenti di pietà e Il ritiramento delle dame. A quest'ultem el sgionta, coma appendis, un quai so Trattenimenti per le dame (Milan 1687).
Oeuvre
El Maggi l'ha scrivud sia in talian, che in latin e fin in spagnoeul.
In milanes el Maggi l'ha scrivud tante poesii e cinch comedi, con protagonista la mascara de Meneghin Pecenna.
I consili del Meneghin
![](http://upload.wikimedia.org/wikipedia/commons/thumb/e/e9/Collezionedellemiglioriopere02.pdf/page15-220px-Collezionedellemiglioriopere02.pdf.jpg)
In del pass de la comedia "I consigli di Meneghino", se ved l'esit "necessitàe" inscambi de "necessitaa", drovad al dì d'incoeu. L'inizzi:
“ | I Maggiorengh de cà ghe van per comandà; |
” |
—I consigli di Meneghino |
El concors di meneghin
In quest pass de la comedia "Il concorso de' meneghini", gh'è na bella difesa del parlà milanes. L'inizzi:
“ | Fei vegnì dent tugg trì Toson bon de cìarvell, e mei de coeur |
” |
—Il concorso de' meneghini |
Il barone di Birbanzia
![](http://upload.wikimedia.org/wikipedia/commons/thumb/e/e9/Collezionedellemiglioriopere02.pdf/page129-220px-Collezionedellemiglioriopere02.pdf.jpg)
“ | PROLOGO. Meneghino. |
” |
—450 |
Racconto di una paura dei ladri in casa
In de la poesìa "Racconto di una paura dei ladri in casa", el Maggi el descriv i efet de vegh i lader in cà. L'inizzi:
“ | Par favv on pó de coeur, se n'hì besogn contra i pagur che van attorna adess, |
” |
—Racconto di una paura dei ladri in casa |
Il manco male
![](http://upload.wikimedia.org/wikipedia/commons/thumb/e/e9/Collezionedellemiglioriopere02.pdf/page233-220px-Collezionedellemiglioriopere02.pdf.jpg)
“ | No , bellissimi sciori, Ma belli insci via là, |
” |
—Il manco male |
Trateniment de l'autor in villa
In de la poesia "Trattenimento dell'autore in villa", el Maggi el conta su una giornada intrega passada in campagna. L'inizzi:
“ | Sont a Lesma sol solett par fà i cunt cont i Massé; |
” |
—Trattenimento dell'autore in villa |
Edizzion
La catada pussee granda di so oeuvre l'è quella del Ludovico Antonio Muratori (Milan 1700), che la ciapa denter rime varie, letere familiar e olter scricc. In de l'istess ann se meten foeura a Venezia anca i so scricciure milanes restampade poeu cont el titol de Commedie e rime in lingua milanese (Milan 1701). Ind el 1728 se caten su i componiment latin in di Anecdota posthuma miscellanea. Antonio Cipollini, cont un studi in su l'autor (Milan 1900) el da una Scelta di poesie e prose edite e inedite.
Bibliografia
- Emilio De Marchi, Carlo Maria Maggi, Saggio, Milano 1885 e 1930;
- Antonio Cipollini, I mss. milanesi e le poesie inedite mondane e sacre di Carlo Maria Maggi, Milano 1895;
- Antonio Cipollini, Carlo Maria Maggi e le Consulte inedite, Milano 1899;
- Federico Barbieri, Le rime e le commedie meneghine di Carlo Maria Maggi, Milano 1917;
- Luigi Medici e Gian Antonio Maggi, Carlo Maria Maggi, Milano 1930.
- Vincenzo Mengaldo, La «discoverta» del Maggi, in Belfagor, vol. 21, nº 5, 1966, pp. 563-592, JSTOR 26141767.
- Circolo Filologico Milanese, Carlo Maria Maggi e la Milano di fine '600, Milano, Di Baio Editore, 1999. ISBN 88-7080-679-0.
- Carlo Maria Maggi, Rime varie, In Firenze, nella Stamperia di S.A.S., 1688.
Interproget
Ligam de foeura
- Carl Maria Maggi, in su Treccani.it – Enciclopedie on line, Istitut de l'Enciclopedia Italiana.
- ↑ Claudio Beretta, Letteratura dialettale milanese: itinerario antologico-critico dalle origini ai nostri giorni, Hoepli, 2003.