Garesce
GR
|
Sa pagina l'è šcricia en garescén |
Garesce cumüne | ||
---|---|---|
(IT) Garessio
| ||
| ||
![]() | ||
Localizaçión | ||
Stâto | ![]() | |
Región | ![]() | |
Provìnsa | ![]() | |
Aministraçión | ||
Scìndico | Luciano Sciandra (lìšta cìvica "Garessio Aperta") da-o 10-6-2024 | |
Teritöio | ||
Coordinæ: | 44°12′N 8°01′E | |
Altitùdine | 621 m s.l.m. | |
Superfìcce | 131,29 km² | |
Abitanti | 2 932[1] (31-10-2020) | |
Denscitæ | 22,33 ab./km² | |
Comùn confinanti | Bardnei (SV) Carisan (SV), Cašteveiu ed Róca Barbena (SV) e Erli (SV), Neijén (SV), Urmea, Pamparau, Roburent, Prióra, Viura | |
Âtre informaçioìn | ||
CAP | 12075 | |
Prefìsso | 0174 | |
Fûzo oràrio | UTC+1 | |
Còdice ISTAT | 004095 | |
Cod. cadastrâ | D920 | |
Targa | CN | |
Cl. scìsmica | zöna 3 (sismicitæ bàssa)[2] | |
Cl. climàtica | zöna F, 3 085 GG[3] | |
Nomme abitanti | Garescén Garescìn (a Arbenga) Garaššin o Garascìn (a Urmea) | |
Sànto patrón | Sàn Ròcu Madòna du Ruzàriu | |
Cartògrafîa | ||
![]() | ||
Scîto instituçionâle | ||
Garesce (šcriciu ascì Garéshe[4], Garešše o Garescie intu dialöttu d'Urmea, Garesci in genuveize[5], Garess in piemunteize e "Garessio" in italian) l'è in cumüne ed 2932 person-ne (nümeri du 2019) ch'u s'tröva in Pruvéncia ed Cuni, in s'ii cunfén cun a Ligüria.
Geugrafia
[modìfica | modìfica wikitèsto]![](http://upload.wikimedia.org/wikipedia/commons/thumb/4/4e/PmColleSanBernardo02.jpg/300px-PmColleSanBernardo02.jpg)
Garesce u s'tröva int'l'ota valada du fiüme Tane, inta pruvéncia ed Cuni, in Piemonte. U teritóriu du cumüne l'è a cavalu tra u teritóriu da Ligüria e cuu padan, intu cö de Orpe Ligüri. E muntagne ciü' impurtanti du paize i sôn: u Bricu ed Mindén (1879 m), cun ina cruje ota ciü' ed 20 metri, l'Anturótu (2144 m), u Galé (1708 m) e u Berlén (1789 m).
Pöi u i è a Cóla du Quasu (1131 m) ch'a pórta versu a Val Bòrmida (Carisan), a Cóla ed S.Bernordu (957 m), ch'a sepora a valada ed Tane da cula du Neva, e a Cóla ed Cazótu (1381 m), ch'a pórta versu Pamparau.
E frasiui
[modìfica | modìfica wikitèsto]E frasiui ed Garesce i sôn: Capé, Cerjöra (cun e burgoi Geja, Cruje, Riò e Barache), Duersci, E Vóte,Garesce 2000, Mindén, Mursöccu, Cianbernordu, Ciangranôn, Trapa, Urtiè, Valdinfernu, Vasurda e Burguratu. U centru ed Garesce, invece, l'è divizu in tre burgoi: U Pônte, U Puzö' e U Burgu.
I cunfén
[modìfica | modìfica wikitèsto]U cumüne u cunfén-na cun Bardnei (SV) e Carisan (SV) a ešt, cun Cašteveiu ed Róca Barbena (SV) e Erli (SV) a süd-ešt, Neijén (SV) a süd, Urmea a óvešt, Pamparau e Roburent a nord-óvešt, Prióra e Viura a nord-ešt.
Štoria
[modìfica | modìfica wikitèsto]![](http://upload.wikimedia.org/wikipedia/commons/thumb/5/5b/Garessio_A062c013_0173.jpg/260px-Garessio_A062c013_0173.jpg)
U paleuliticu e u periudu ruman
[modìfica | modìfica wikitèsto]I primi insediamenti intu teritóriu ed Garesce i sôn štoi intu paleuliticu, quande cheich grüpu d'ómi l'ha cumensau a štò inte gróte ch'u i era inta zóna, cume per ejempiu cule du Gray e ed Valdinfernu, grasie a in ambiente natürò favurevule aa casa inti bóšchi e aa pöšca in Tane.[6]
Dópu su periudu, ina prima štrutüra d'in vilage l'è fórsci štò cumensò dai Ligüri "Bagienni" cume "castelliere", a mônte d'l'antica Ceive ed San Cuštansu. Cun a cunquišta da Ligüria da pòrte di Ruman, Garesce l'è štau culegau au duminiu du "Municipium" d'Arbenga. Du periudu ruman i sôn ascì e lapidi ed Trapa e Mindén, ch'i servivi per ariurdose di mórti, inseme a cheich tômba.
Intu štesu periudu l'è štau faciu u pônte ed Ciangranôn. Paröggiu Garesce l'era dventau in póštu impurtante ed cumerciu land'i s'incuntrovi e vie ed cumünicasiôn tra u Piemônte e a Ligüria.
U Mediuevu
[modìfica | modìfica wikitèsto]Ina vóta che l'Imperu Ruman l'è finiu intu 476, u teritóriu cumünò l'è reštau culegau cun a rivera per u cumerciu e a pulitica.
Infati u nóme latén "Garexium" l'è štau per a prima vóta regištrau versu u VII seculu: u paize l'era in pusedimentu du Cunventu ed San Pé ed Tuirán, inta Vale Varatela, cum'u s' capisce da ina cópia di docümenti ed l'epuca, šcricia pöi turna intu XIV seculu.[6]
E du burgoi ciü' antiche i sôn, zgôndu i docümenti, cule ed Cerjöra e da Purenca, a prima inta Vale Neva, a zgônda coštruía daturnu a ina prima furtificasiôn insima a ina cóšta ed muntagna suvre a Tane.
E invajui
[modìfica | modìfica wikitèsto]Intu periudu ch'u vegne dópu, a valada a s'tröva deštacò daa rivera e, cume l'otru reštu du Basu Piemonte, a patisce de növe invajui di borbari, cume cule di Longobardi, a cumensò dau 568. Dau IX seculu int'l'ota Valada ed Tane i sôn rivoi de bande ed Saraceni, sute au duminiu di Franchi, e i lasci diversci söggni in s'uu teritoriu, cume a ture ed Borchi, suvre aa frasiôn cun l'ištesu nóme, au cunfén cun u cumüne d'Urmea.[7]
U jvilüpu
[modìfica | modìfica wikitèsto]Cun a növa divijiôn du teritóriu du 951, u teritóriu urmeašcu e garescén u turna sute a l'influensa da Ligüria e u pasa sute au duminiu di Arduén. A partì da l'anu mile, intu paize u s'vughe in fórte jvilüpu d'l'architetüra, cují i vegni facie diverse geje e ascì di cunventi, cume a Certuza ed Cazótu, ai cunfén cun Pamparau.
L'è impurtante ascì u 1064, quande u centru du paize u vegne uficialmente numinau int'in atu püblicu. U nóme latén u vegne da "garrigus", terèn nen cultivau e dau sufisu -exium, ch'u vö dì in póštu ed pasage.[8]
U burgu ed Garesce l'è štau pöi indicau, u šmia, intu 1183 int'l'atu ed fundasiôn da Certuza, ma per avei in centru ben jvilüpau u ventrà špetò u XII seculu, cun a fundasiôn du burgu du Pônte, daturnu aa veia ceive ed San Zuane.[6]
Zgôndu a tradisiôn du paize peró, cula ed San Cuštansu au Puzö' a srè štò a geja ciü' veia, anche se a burgò l'è documentò sulu intu 1269.[9]
L'ingresu intu Marchesau ed Seva
[modìfica | modìfica wikitèsto]![](http://upload.wikimedia.org/wikipedia/commons/thumb/d/d4/P%C3%B2rta_R%C3%AAuza_%28Gar%C3%A9sce%29.jpg/220px-P%C3%B2rta_R%C3%AAuza_%28Gar%C3%A9sce%29.jpg)
Dópu diverse vicende, a cumünitui ed Garesce a cumensa a avei di rapórti cun cula ed Seva, tantu che versu u 1276 u marcheize Giorgio II u Nanu u cuncede i štatüti cumünoi, che aura i sôn intu cujidetu "Libre da Chen-na",in cangiu di ajüti militoi doi daa pupulasiôn inti agni pasoi.[10]
U paize u rešta sempre in pôntu d'incôntru fundamentò per u cumerciu, tantu che zà dau 1216 l'era štau firmau in acórdu tra i aminištratù ed Cijàn, i marcheiji ed Sücarè e i šgnuri ed Garesce, che pöi l'è štau rinuvau dai pudeštoi cumandoi dai marcheiji ed Seva intu 1288 e intu 1350.[11]
A lù u s'deve ascì a furtificasiôn du burgu ed Cerjöra, guvernau da ina vinten-na ed cunscié versu u 1390, cun a coštrusiôn d'ina ture d'avištamentu, lande aura u i è u campanén da geja, e d'ina furma ed centüra ed miragne.[12]
Sute ai növi šgnuri u vegne ingrandiu ascì u cašté suvre au Burgu, cuštruíu versu u XII seculu, che pöi u dventa ün-na de ciü' impurtanti rescidense di marcheiji.[13]
Dau Quatsentu-Sinsèntu[14] peró i vegni infeudoi i Špinóla[15] ed Genuva, ch'i sôn per i rapórti tra Garesce e a Repüblica, tantu da ese mensiunoi in diversci docümenti štórici[16] cume aminištratù ed Seva, Bagnašcu e Garesce.[17]
U paize u dventa ina pórta per i cumerci versu i pórti da Ligüria ed Punente e, grasie ae tensciui menu fórti tra i šgnuri du póštu, u i è ascì in növu periudu de jvilüpu d'l'architetüra, duüiu ascì a l'influensa di Savóia.[18]
L'ópera ed difeiza a cuntinua ascí int' su periudu, tantu che ai abitanti a vegne rinuvò ina franchigia particulò intu 1456, ch' a permötova l'ezensiôn daa manutensiôn di terapien ed cunfén ch' i prutegi u centru du paize; infati a pòrte ciü' antica de miragne l' è inta zóna nord du centru.[19]
Sulu intu 1480 a štrutüra a cumensa a ese cumpleta, mentre che e pórte da sitoi i sran facie sulu int' in zgôndu mumentu (a pórta nord-ovest "Porta Rose" l'è štò facia au prensipiu du Sinsentu)[20][21] e i han segnau a štrutüra tipica du paize int' l'etoi muderna, pöi mudificò cun a dištrüsiôn d' ina pòrte da cénta da pòrte di marcheiji ed Santa Cruje intu 1634.[7]
L'etoi muderna
[modìfica | modìfica wikitèsto]Per tütu su seculu u i è l' ešpansiôn du teritóriu föra du centru, cóza ch'a fa cumensò de rüze cun i paize daturnu e cun i marcheiji Del Carretto da rama ed Savôn-na, tantu che i šcôntri cun a cumünitoi ed Viura i han purtau a cheich prucesu a nuvembre du 1435.
Intu 1555 u teritóriu du paize l' è štau divizu in 13 zóne, cun diverse burgoi: u Burgu, u Pônte e u Puzö', ciü' e frasiui ed Mursöccu, Cerjöra, Purenca e Ciangranôn, za inseríe inti štatüti e, per a prima vóta, ascí u Bricu, a Rlöcca (che aura a fa pòrte du Burgu), u Burgöttu, Burguratu e Föra du Burgu.[15]
I növi insediamenti i dimuštri che a pupulasiôn a cuntinua a cörsce a Garesce, a partì dau XV-XVI seculu, e per cunseguensa u s' riva aa dišcüsiôn in s' aa rendita du feudu, che per ciü' da metoi a vegne incasò dai marcheiji, e per u reštu da l' aminištrasiôn du cumüne.
Versu a fén du Sinsentu, pöi, u i è de dišcüsiui ins' l' üzu de paštüre da pòrte di abitanti dópu a növa faze d'ešpansiôn de pruprietoi ed Garesce. Cum l' è šcriciu inti ati du 1571, infati, l'ešpansiôn du Cumüne a štova purtandu ascí au dijbóšcamentu de zóne ed cunfén per fò póštu a de növe cultivasiui.[15]
I feudatori genuveiji i cunteštovi a divijiôn di terèn e de paštüre ch'i interesovi ascí e zóne ed Mindén e da valada ed Cazótu. Tütu lulí l'ha purtau aa fén du duminiu di Spinola e u cumandu l'è pasau inte man da famía türineize di Biandrate Aldobrandini da l' anu 1616 e di Dal Pozzo (a partí dau 1648).
Int'su növu periudu a Garesce u i è štau in növu jvilüpu ecunómicu, grasie au rinövu di acórdi cun a Ligüria: i sôn štoi mantgnüi i rapórti de šcangiu cun Arbenga (i garescén i han utgnüu l'ezensiôn dai pedagi per entrò inta sitoi dau 1608), ma i frequentovi ascí i mercoi d'Arasce e d'Inea.[15]
Ciü' prublematici i eri i acórdi cun Bardnei, Sücarè e a Ceive, ed lande u ventova pasò per andò versu i paize da Rivera. Ai aminištratù l'era cunteštau u diritu ed fose pagò de tase per u pasage de mercansie e paröggiu u i era de növe prutešte.
E rüze i s' sôn calmoi sulu intu '700, dópu ina lônga serie ed cuncesiui ed teritóriu da pòrte di šgnuri e cheich acórdu cun e cumünitoi vjén-ne, cume cula d'Erli, ch'a cunfinova cun e burgoi ed Cerjöra. Cun Erli i sôn štoi turna bütoi in dišcüsiôn i acórdi du 1437 per i cunfén tra i dui paize, per via de prutešte ed cui ed Cerjöra intu 1753; prutešte pöi rizólte cun ina "ricugnisiôn" intu 1765.[15]
L'etoi cuntempuranea
[modìfica | modìfica wikitèsto]A cumensò dau 1741, sute ai Savoia, Garesce l'è diventau a sede d'ön di mandamenti da pruvéncia ed Munduíu, ma pöštu i sôn rivoi i surdoi franseiji.
Intu 1794 u i è štau in primu pasage di surdoi ed Napuleôn, ch'i han purtau dištrüsion e mórte, mentre che l'ecunomia da sitoi l'è finia in ruvén-na. In òtru fatu impurtante l'è l'atacu in saa cóla ed S.Bernordu, purtau avanti dau generò Roguet, atacu culegau aa bataia da Löa du 1795.[12]
I diji ascí che Napuleôn in persôn-na l'age dau u nome aa frasiôn ed Valdinfernu, che prima l'era Vale Umbruza, per via ed chech' turbiera[22] ch'l'era štò višta brüjò inta zóna, zgôndu òtre idee peró u nóme u vegne invece dau tempu förgiu, ch'u rendova dificile a vita di cuntadén da frasiôn.[23]
Sute aa duminasiôn franseize Garesce l'è pasau dau dipartimentu da Val Tane, fén-na au 1814-15, quand'l'è pasau sute au Regnu ed Sardegna.
Intu 1817 Garesce u entra turna a fò pòrte da pruvéncia ed Munduíu, fén-na au 1859, quande u entra int'cula ed Cuni. Intu 1861 u entra intu Regnu d'Italia e u riceve növ'agni dópu u titulu ed sitoi dau Re Vitóriu Emanuele II, ch'u ricunusce ascí u štema cumünò.
Dau 1837 au 1881 i Savóia i tegni u Cašté ed Cazótu cume rejidensa d'ištoi e i dovri i bóšchi daturnu cume rizerva ed casa. Cun e du guere mundioi intu '900 tanci garescén i han cumbatüu per difende a patria. Impurtanti i sôn štoi e asiui di partigian, a cumensò da l'öciu de stembre du 1943, špecialmente inta valada ed Cazótu.
I sôn tanci i partigiân ed Garesce cun midaie d' óru e d' argentu, mentre a sitoi štesa l'è štò midaia ed brônzu per a lóta ed liberasiôn. Ciü' ed 1000 alpini, invece, i sôn partí intu 1942 daa štasiôn ed Garesce per a campagna ed Rüscia e edmà 47 i sôn turnoi. Dópu a guera Garesce u entra intu 1946 inta Repüblica Italian-na, sempre sute aa pruvéncia ed Cuni.
Abitanti
[modìfica | modìfica wikitèsto]Evulusiôn demugrafica
[modìfica | modìfica wikitèsto]Abitanti censæ[24]
![](http://upload.wikimedia.org/wikipedia/lij/timeline/iot0nzv9o0710gd07wsdjie69vpixrj.png)
Minurànse furešte
[modìfica | modìfica wikitèsto]Zgôndu l'ISTAT, ai 31 dejembre du 2017, a Garesce u i'è 272 abitanti furešté.
Pošti d'interese
[modìfica | modìfica wikitèsto]-
U casté ed Valcazotu
-
Burgu ed Garesce, Porta Liazoliorum
-
Garesce, a Pòrta Jhape
Cuštrüsiui religiuze
[modìfica | modìfica wikitèsto]Per quantu u riguorda a religiôn Garesce u fa pòrte da dióceji ed Munduíu, a l'internu ed l'Üniôn Paštürò ed l'ota Vale ed Tane.
E paróchie intu teritóriu cumünò i sôn ônze: Santa Maria Asônta per u Burgu, Santa Caterina per u Pônte, Sant'Antóniu da Paduva per u Puzö', San Pé (Cerjöra), San Nicóla (Mursöccu), San Pé (Vasurda), San Ludovicu (Valdinfernu), Beata Vergine du Bôn Cunscíu (Mindén), Beata Vergine Maria (Capé), Madóna da Vijitasiôn (Duersci) e San Bartulumé e Lurensu (Trapa).
Paróchia du Pônte
[modìfica | modìfica wikitèsto]![](http://upload.wikimedia.org/wikipedia/commons/thumb/4/44/G%C3%A9xa_de_Santa_Cate%C3%ACna_%28Garesce%29.jpg/240px-G%C3%A9xa_de_Santa_Cate%C3%ACna_%28Garesce%29.jpg)
- A geja da paróchia ed Santa Caterina: a paróchia l'è štò ištituia intu 1507, grasie a ina bula du Papa. A cóštrüsiôn l'è štò finía intu 1741, au póštu da veia paróchia, ch'a s'truvova ben ciü' dapè a Tane e l'era per lulí inundò suvente daa pien-na.
- Dizegnò da l'architetu Francesco Gallo ed Munduíu, l'è štò facia cun l'agiütu di garescén tra u 1723 e u 1740, cun ina pianta a cruje greca e ina sula navó centró.
- A l'ešternu l'è fudrò ed mui e dednoi aa faciada u i è u risö' du sagrau du 1825. U campanén (du 1786) l'è štau faciu da l'architetu Giacinto Morari.
- L'Uratóriu ed San Rócu, au Ponte, l'è dedicau au santu patrôn du paize. L'ha ina pianta a cruje greca e a l'internu l'ha ina serie ed pitüre ed valù. L'è lí che tüci i agni u s'fa a muštra di prezepi.
Paróchia du Puzö'
[modìfica | modìfica wikitèsto]![](http://upload.wikimedia.org/wikipedia/commons/thumb/7/72/G%C3%AAxa_de_S%C3%A0n_T%C3%B6gno_da_P%C3%A0dova_%28Gar%C3%A9sce%29.jpg/220px-G%C3%AAxa_de_S%C3%A0n_T%C3%B6gno_da_P%C3%A0dova_%28Gar%C3%A9sce%29.jpg)
A geja paruchiò ed Sant'Antóniu ed Padova, ch' l' è inta burgò du Puzö', l'è štò cuštruía tra u 1651 e u 1668. Indrenta l'ha ina sula lòrga navada e l'ha in atò ed mormu, ricu e impunente.
Ins'aa dricia ed l'atò u i è ina grosa sacreštía e ins'aa sništra u i è a zóna du campanén. I atoi lateroi i sôn dedicoi au Sacru Cö', aa Madóna da Centüra e a Sant'Antóniu. Tüci i han ina štatua. Sute a l'órganu, ins'aa dricia, u i è u batišteru ed mormu, cuštruiu dópu che au 10 de djembre du 1843 l'era štau lvau l'atò da Cruje, za mutu ben rvinau.
Sempre inta štesa pòrte u i è ina nichia cun a Madóna Imaculò, sištemò cume in atò, dedicau au muvimentu de Fie ed Maria (cuštituíe intu 1868). Pöi u i è ancù l'atò ed San Giuzepe, cu da SS. Trinitoi e l'atò de Anime.
Impurtante l'è u ciclu ed afrešchi du 1888 du pitù ed Salüsu Giovanni Borgna, che, per e persôn-ne ch'i sôn inta pitüra, l'ova duvrau cume mudeli i abitanti du póštu. U i è pöi ancù, int'l'abside, e pitüre du "Trionfu ed Sant' Antóniu", da "Nativitoi" e in facia, a "Depujisiôn".[25]
Paróchia du Burgu
[modìfica | modìfica wikitèsto]![](http://upload.wikimedia.org/wikipedia/commons/thumb/0/02/G%C3%AAxa_de_M%C3%A0ia_V%C3%A9rgine_S%C3%B3nta_%28Gar%C3%A9sce%29_-_v%C3%ACsta_%282%29.jpg/220px-G%C3%AAxa_de_M%C3%A0ia_V%C3%A9rgine_S%C3%B3nta_%28Gar%C3%A9sce%29_-_v%C3%ACsta_%282%29.jpg)
- A geja paruchiò ed Maria Vergine Asônta: a s' tröva au Burgu, de d' là du rian ed San Móru. A deriva da in veiu cunventu di Dumenican, fundau aa fén du quatsentu. A cuštrusiôn l'è cumensò intu 1717, ma a geja l' è štò cunsacrò ed ma intu 1728. L'è štò campò zü' dai Franseiji intu 1802 dópu avei mandau via i Dumenican e avei gavau i aredi sacri indrenta e pöi l' è štò catò dau Cumüne intu 1862 e pöi ricunsacrò intu 1878.[26]
![](http://upload.wikimedia.org/wikipedia/commons/thumb/2/2b/G%C3%AAxa_de_S%C3%A0nta_M%C3%A0ia_Extra_Moenia_%28Gar%C3%A9sce%29_-_v%C3%ACsta_%281%29.jpg/220px-G%C3%AAxa_de_S%C3%A0nta_M%C3%A0ia_Extra_Moenia_%28Gar%C3%A9sce%29_-_v%C3%ACsta_%281%29.jpg)
- Geja ed Santa Maria Extra Moenia: l' è a geja ciü' veia du burgu medievò ed Garesce, infati u prensipiu da só cuštrüsiôn l' è int' l' anu mile (grasie au travaiu di froi certuzén da Vale ed Cazótu). Ascí a prima cuštrüsiôn du primu campanén u šmia ch' a sege ed su periudu lì. A geja indrenta l' ha tre navoi e l'ha ancù in bè purtôn góticu. L' è štò rištrutürò diverse vóte, l'è štò dijvöiò ed diverse cóze dai Franseiji e pöi l'è štò rgalò ae Culonie Savuneiji in seguitu.[27]
![](http://upload.wikimedia.org/wikipedia/commons/thumb/3/3c/Uat%C3%B4iu_de_San_Giu%C3%A0nni_Bat%C3%ACsta_%28Burgu_Maz%C3%B9%2C_Garesce%29.jpg/250px-Uat%C3%B4iu_de_San_Giu%C3%A0nni_Bat%C3%ACsta_%28Burgu_Maz%C3%B9%2C_Garesce%29.jpg)
- Uratóriu ed San Zuane Batišta: a geja, da Cunfraternita ed San Zuane, l'è štò cuštrüía a cumensò daa zgônda metoi du 1500 e finía intu 1593, inta zóna du "Bricu". U s'pö' rivò aa geja cun ina impunente šcarinò (ch' a pòrte daa ciasa dednoi aa geja), in pó cun d'l'erba, in pó ed mormu. Indrenta l' ha sulu ina navò e u štergnu l'è legermente in salita, decurau da 18 lünötte, facie inta zgônda metoi du 1600. U i è diverse štatue indrenta, facie int'l' Öciusentu da l' artišta genuveize Picasso.[28]
Ecunumia
[modìfica | modìfica wikitèsto]Fabriche e agricultüra
[modìfica | modìfica wikitèsto]L'ecunumia l'è bazò ins'l'agricultüra, l'alevamentu e e fabriche. L'è impurtante a produsiôn de caštagne söcche, peró in pó menu chej int' i agni pasoi.
L'è famuza l'oiva San Bernordu in Ligüria e in Piemônte, ma ascì int'u reštu d'l'Italia. Da agni per u paize l'è fundamentò a produsiôn ed meijén-ne, grasie a a fabrica Lepetit, driverta int'u 1898, che au prensipiu l'era a Süza (Türén) e a fòva tintüre e incióštru. U i è ascì de pòre eóliche per l'energia eletrica ins' a a cóla ed San Bernordu.
Turijmu
[modìfica | modìfica wikitèsto]Per u turijmu Garesce l'è da sempre in poštu cunuscjüu, cun vijitatù da a Rivera, da Arbenga e da Genuva. Versu u 1930 i sôn štoi driverte e Culógne Savuneiji, da Dioceji ed Savôn-na, ma da diversci agni i sôn sroi. Ins'a a cóla ed "Garesce 2000" u i è e pište da sci a partì dau 1970. U teritóriu du Cumüne l'è traversau da l'Ota Via de muntagne da Ligüria (AV), lande u s'pö' andò a pé o in bici (mountain bike) in s'e e muntagne ch'i sôn inturnu au paize.
Cultüra
[modìfica | modìfica wikitèsto]Dialöttu garescén
[modìfica | modìfica wikitèsto]![](http://upload.wikimedia.org/wikipedia/commons/thumb/5/5d/Posizione_Cerisola.gif/300px-Posizione_Cerisola.gif)
U dialöttu ed Garesce l'è du tipu ligure-alpén (štesa famía d'l'urmeašcu e du brigašcu) cun paróle ch'i vegni špecialmente dau dialöttu d'Arbenga e dai dialötti piemunteiji.
Per lulì l'è cunsciderau in dialöttu ed pasage. L'è particulò u dialöttu int'e Vóte e a Cerjöra, de d'là daa cóla ed San Bernordu, versu a Rivera, ch'u šmia de ciü' a cu d'Erli, ch'l'è du tipu ed cu d'Arbenga. Versu Urtiè u módu ed parlò u s'avjén-na sempre ed ciü' au garescén, anche se l'ha de manere ed dì ed Bardnei e Carisan in val Bormida.
Per sarvò e tradisiui e u parlò du póštu, int'u 2020 l'è štau püblicau dau Romano Nicolino, dau Piero Camelia e dau Rodolfo Pelagatti u disiunoriu italian-garescén e garescén-italian.[29]
Manera de šcrive u dialöttu garescén
[modìfica | modìfica wikitèsto]Au mumentu u n'ezište nen ina manera (o grafìa) uficiò. I vegni duvroi ed sólitu cula du Nicolino (che lé u dóvra int'e puejíe ch'l'a šcriciu)[30], ch'l'è ascì l'ištesa du disiunoriu, o cula du Sergio Aschero, ch'i han cheiche pcióta diferensa rišpetu ae otre.[31]
U mangiò
[modìfica | modìfica wikitèsto]E ricete di nosci veii i son a pulenta "saracena",[32] facia cun patate e furmentén e chindía cun u sügu ed panna, póri e burei, a pulenta ed ciji, ch'a s'ciama ascì "panisa" e pöi a fugasa,du tipu ed cula da Ligüria e i frisciöi ed mei.[8]
Per i dusci e pašte ed meria, facie cun a farén-na ed meria e u büru, e meringhe e i "garessini", pašte söcche cun cacau, sücre, nisöre e giancu d'övu,che u cumüne u prutége cume prudótu d'urigine cuntrulò, "De.Co.", faci zgôndu ina veia riceta dai paštisé du paize.[33] U i è ascì i garescén gianchi, cun e mandure e l'amé.[34]
Int'l'utunu u s'mangia e caštagne rištie, ch'i s'ciami ascí "furioi" ,e i burei, ch'i vegni dai bošchi da zóna.
Fešte e fére
[modìfica | modìfica wikitèsto]- U Murtóriu ed Garesce : raprezentasiôn religiuza da Pasciôn du Crištu, ch'a s'tegne au venerdí santu. Zgôndu ina tradisiôn ed seculi u s'fa ógni quatr'agni o ógni sencu e l'è cürau daa cunfraternita di Batü' Porvi, ch'l'ha sede inta geja ed San Zuane.[35]
- Féra ed San Ròcu:A dedicò au santu patrôn, a s'fa tüci i agni au sözze d'aguštu, cun u mercau tradisiunò e a Mössa.[36]
- Paliu de Burgoi: l'è ina manifeštasiôn ch'a s'fa dau 2012, lande i se šfidi e cuntroi du Burgu, du Pônte, du Puzö' inseme a Vasurda, e otre frasiui, Prióra e a Ciuötta. A partí dau 2022 u Burgu u fa šquadra cun Vasurda e Prióra l'è inseme aa Ciuötta. In ciü' aura u i è ascì Bagnašcu e du cuntroi d'Urmea. A gòra a s'fa in diverse pröve, cume, per ejempiu, a cursa cun i carötti e u zövu du cilíu. [37]
- Sagra da pulenta saracena: l'è dedicò a ün di prudóti tipici ed Garesce e de zóne daturnu, preparau cun furmentén, patate, pecurén e cun ina bagna ed pana, póri e burei. A s'fa tüci i agni aa fén d'aguštu.[38]
Aministrasiôn
[modìfica | modìfica wikitèsto]Perîodo | Prìmmo çitadìn | Partîo | Càrega | Nòtte | |
---|---|---|---|---|---|
1995 | 1999 | Fausto Sciandra | lìšta civica | scendicu | |
1999 | 2004 | Luigi Sappa | lìšta civica | scendicu | |
2004 | 2009 | Valeria Anfosso | lìšta civica | scendicu | |
2009 | 2014 | Renato Chinea | lìšta civica | scendicu | |
2014 | 2019 | Sergio Di Steffano | lìšta civica | scendicu | |
2019 | 2024 | Ferruccio Fazio | lìšta civica | scendicu | |
2024 | aura | Luciano Sciandra | lìšta civica "Garessio Aperta" |
scendicu |
Gemelàgi
[modìfica | modìfica wikitèsto]Cumünicasiôn
[modìfica | modìfica wikitèsto]E Štroi
[modìfica | modìfica wikitèsto]U cumüne ed Garesce l'è traversau daa štrò štatò SS28 da cóla ed Nòva, ch'a culéga a sitoi aa frasiôn ed Trapa versu süd-ovest e a Urmea, per andò pöi versu Imperia, e a nord cun Prióra, versu Séva. Ascì a štrò pruvinciò SP582 a pórta versu a Ligüria e a traversa a valada du Neva fén-na a Arbenga.
Garesce l'è culegau ascì cun Carisan e a Val Bórmida cun a štrò pruvinciò SP213 (SP47 per a pruvéncia ed Savôn-na). A frasiôn ed Capé l'è traversò daa pruvinciò SP178, ch'a culega cun u cumüne ed Pamparau.
A Feruvia
[modìfica | modìfica wikitèsto]-
A Štasiôn ed Garesce
-
A Štasiôn ed Trapa
-
U pônte da Feruvia
Garesce l'è traversau daa Feruvia Seva-Urmea, dicia ascì "feruvia ed Tane". A linea a culega u paize dau 1890 cun i oci cumüni da valada, ma au prensipiu a duova andò fén-na in Ligüria, versu Imperia ó Arbenga. L'è štò srò dau 2012 au 2016, ma aura l'è duvrò per i treni di turišti, infati a Garesce u i è ina štasiôn int'a zóna du Pônte e in'otra a Trapa.
Nòte
[modìfica | modìfica wikitèsto]- ↑ Dètu Istat - Pupulasiôn rejidente a-u 31 utubre 2020 (dàtu pruvvisoriu).
- ↑ Clascificaçion sismica (XLS), in sce protezionecivile.gov.it.
- ↑ Lézze 26 agósto 1993, n. 412, alegòu A, Tabélla di gràddi/giórno di Comùn pe Región e Provìnsa (PDF), in sce efficienzaenergetica.acs.enea.it, 1 màrso 2011, p. 151. URL consultòu o 25 arvî 2012.
- ↑ Grafia pé u garescén ed Sergio Aschero
- ↑ https://conseggio-ligure.org/it/dizionario/deize/garessio/
- ↑ 6,0 6,1 6,2 (IT) Toponomastica Storica di Garessio, in sce storiapatriasavona.it. URL consultòu l'8 novénbre 2021.
- ↑ 7,0 7,1 (IT) Štoria ed Garesce, in sce comune.garessio.cn.it. URL consultòu o 4 dexénbre 2021.
- ↑ 8,0 8,1 (IT) Garesce, ün di burghi ciü bè ed l'Italia, in sce borghipiubelliditalia.it. URL consultòu l'8 òtôbre 2021.
- ↑ (IT) Enrico Lusso, Alle origini dell'insediamento, in Il borgo di Garessio. Dinamiche insediative tra medioevo ed età moderna, Séva, Associazione Culturale Antonella Salvatico - Centro Internazionale di Ricerca sui Beni Culturali, 2019, p. 9.
- ↑ (IT) Enrico Lusso, Il borgo di Garessio. Dinamiche insediative tra medioevo ed età moderna, Séva, Associazione Culturale Antonella Salvatico - Centro Internazionale di Ricerca sui Beni Culturali, 2019, p. 11.
- ↑ (IT) U pònte da Cianca (Cerjöra), in sce garessio.net. URL consultòu o 7 dexénbre 2021.
- ↑ 12,0 12,1 (IT) "Asuciasiôn Oriundi ed Cerjöra", in sce web.tiscali.it. URL consultòu o 7 dexénbre 2021.
- ↑ (IT) Enrico Lusso, Alle origini dell'insediamento, in Il borgo di Garessio. Dinamiche insediative tra medioevo ed età moderna, Séva, Associazione Culturale Antonella Salvatico - Centro Internazionale di Ricerca sui Beni Culturali, 2019, p. 11.
- ↑ (IT) Fešta di burei ed Seva: Garesce, in sce fungoceva.it. URL consultòu o 30 dexénbre 2021.
- ↑ 15,0 15,1 15,2 15,3 15,4 (IT) Bibliugrafia ed Garésce, in sce archiviocasalis.it. URL consultòu o 7 dexénbre 2021.
- ↑ (IT) Giovanni Oliviero, XLII - Convento dei Cappuccini, in Memorie storiche della Città di Ceva, Seva, Teonesto Gareone, 1858, p. 227. URL consultòu o 7 dexénbre 2021.
- ↑ (IT) Giovanni Oliviero, Paesi sui quali estendevasi la giurisdizione marchionale di Ceva, in Memorie storiche della Città di Ceva, Seva, Teonesto Gareone, 1858, p. 343. URL consultòu o 7 dexénbre 2021.
- ↑ (IT) Garesce, edifissi štòrici, in sce archeocarta.org. URL consultòu o 7 dexénbre 2021.
- ↑ (IT) Enrico Lusso, La topografa del borgo nei primi secoli di vita, in Il borgo di Garessio. Dinamiche insediative tra medioevo ed età moderna, Séva, Associazione Culturale Antonella Salvatico - Centro Internazionale di Ricerca sui Beni Culturali, 2019, p. 14.
- ↑ Inta štrutüa muderna, cu'a pitüa a frešcu da Madonna du Rusàriu
- ↑ (IT) Porta Rose, in sce comune.garessio.cn.it. URL consultòu o 7 dexénbre 2021.
- ↑ (IT) Quand'u nóme mènte: a belesa ed Valdinfernu, in sce alpidicuneo.it. URL consultòu o 14 frevâ 2022.
- ↑ (IT) Valdinfernu (o Vale Umbruza), in sce lafiocavenmola.it. URL consultòu o 14 frevâ 2022.
- ↑ Statìstiche I.Stat - ISTAT; URL consultòu o 30-12-2023.
- ↑ (IT) Geja paruchiò ed Sant'Antoniu, in sce comune.garessio.cn.it. URL consultòu o 23 arvî 2022.
- ↑ (IT) Cumüne ed Garesce: geja paruchiò ed Maria Vergine Asônta, in sce comune.garessio.cn.it. URL consultòu o 3 zùgno 2022.
- ↑ (IT) Cumüne ed Garesce: Geja ed Santa Maria Extra Moenia, in sce comune.garessio.cn.it. URL consultòu o 3 zùgno 2022.
- ↑ (IT) Cumüne ed Garesce: San Zuane Batišta, in sce comune.garessio.cn.it. URL consultòu o 3 zùgno 2022.
- ↑ (IT) Paola Scola, Tréi amixi scrivàn 'n diçiunaiu pé sarvà u dialettu de Garesce, in sce lastampa.it, 20 màrso 2020. URL consultòu o 10 arvî 2021.
- ↑ (IT) U dialettu garescìn spiégàu da R.Nicolino, in sce generazionisolidali.it, 14 agòsto 2014. URL consultòu o 10 arvî 2021.
- ↑ (I vegni duvroi a y en soštitusiôn da ü e u n'è a š o a"r evanescente")
- ↑ (IT) Garesce, a perla de Àrpi, in sce weekendpremium.it. URL consultòu l'8 òtôbre 2021.
- ↑ (IT) A gaštrunumia da Vale du Tane, in sce valtanarolife.com. URL consultòu l'8 òtôbre 2021.
- ↑ (IT) Pasticerìa Cagna ed Garesce, "I Garescén", in sce pasticceriacagna.it. URL consultòu l'8 òtôbre 2021.
- ↑ (IT) Murtòriu ed Garesce, in sce lastampa.it. URL consultòu o 20 seténbre 2022.
- ↑ (IT) San Rocu 2019, Garesce, in sce cuneo24.it. URL consultòu o 20 seténbre 2022.
- ↑ (IT) Štoria: Paliu de burgoi, in sce paliodelleborgate.jimdofree.com. URL consultòu o 20 seténbre 2022.
- ↑ (IT) Sagra da pulenta saracena, Gal Mongioie, in sce galmongioie.it. URL consultòu o 20 seténbre 2022.
Otri prugètti
[modìfica | modìfica wikitèsto]Wikimedia Commons a contêgne di files in sce Garesce
Contròllo de outoritæ | VIAF (EN) 240557585 · WorldCat Identities (EN) 240557585 |
---|