Vitsje

Dit artikel is gesjreve in 't Norbiks. Ómdat 't plaatsgebónge is, maogs doe 't ómzètte nao 't Voeres, es te dit dialek sjpriks.

---

Vitsje is 'n buurtsjap va Voere en liekt richting Norbik en Maer, tösje Brook en d'r dörpskern, op de plaatsj oeë 't Noordal en 't Voordal bie-èèn kaome.

Etymologie va Vitsje

• Vitsje zeunt wilgetwijgen, die vreuger gebruukt waoërte um mandele van te make. Ooch bie d'r vakwaerkboew waore die vitsje nuëdèg. D'r naam è gen Vitsje wilt zigke dat me op die plaatsj vitsje voond en dat me dus mèt 'n drassig gebied te make how. Hie mondt de Noor dan ooch oet in de Voor.
• Baove g'n Vitsje loog och 'ne Romeinse villa, oeë later in d'r Merovingische/Karolingische tied 'n Middelieëwse burcht (sala) Op den Saele loog, 'n belangriek centrum in de Luigouw, n.l. 'ne fiscus. De klèngkeender van Karel d'r Groeëte bekrachtigde hie 't Verdraag va Maeërsje in 878. D'r naam Vitsje kan ooch ziene oorsjprong ha in 't Latiense fiscalis: behurend töt d'r fiscus. In dis burcht zów Hubertus gebore en gesjtórve zieë.

Botte va waeg mèt greend

In g'n Vitsje vindt me 'n groeëte greendkoel. Dat maasgreend waoërt in vreuge tieje gebroekt um de waeg te botte. In d'r tied dat de waeg nog neet verhard waoërte mèt asfalt, doog zich in heuvelachtège gebiede 't volgende versjiensel vör. De waeg waoërte begange dör paeërd mèt karre. Op de plaatsje oeë de rajer van de karre voeërte, waoërt d'r groond losgemakt. Bie 'n fleenke raeëgebuuj sjpeulde dae losse groond van d'r häövel aaf. D'r waeëg waoërt op die plaatsje wie langer wie mieë èè-gesjlaeëte, dör erosie. Zoe oontsjtèèt 'n karresjpoor, dat op d'r doeër zoe deep èè-gesjlaeëte is dat 't neet mie te begoeë is vör paeërd en kaar. Dör de waeg te botte (de depe, sjpitse karresjpaoëre op te vulle) mèt 't greend bleef d'r waeëg te begoeë. Soms waor de erosie e-zoe sjtaerk dat me 'ne nuuje waeg moes aanlègke, zoewie op Brook of in d'r Krindel.