Musidora

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Musidora, officieel Jeanne Roques, (23 fibberwarie 1889, Paries - 7 december 1957, ouch dao) waor 'n Frans actrice. Zie is bekind vaan versjèllende geluidloeze films mer häör rol in de film Les Vampires oet 1915 weurt gezeen es häör hoegtepunt. Veur ein generatie in de Europese cinema waor zie de bonze veur de femme fatale. Aon 't begin vaan de tiener jaor vaan de 20e iew begós de cinema op te komme en woort zie ouch ummertouw mie en mie es 'n kuns opziech gezeen. Nao väöl te höbbe opgetrooje in 't theater, naom Musidora häöre kans. In 1914 begós zie in häör ierste films te speule, dèks waore dat klein rölkes. In 1915 braok zie door mèt Les Vampires vaan Louis Feuillade. Dee film woort, boete zien naodrökkeleke stempel op de touwkomstege cinema-thriller, al väöl geassosicieerd mèt surrealisme. Dat gold allein meh mie veur de film dee dao op volgde, Judex (1916). Musidora woort neet veur niks 'n muse veur versjèllende latere surrealistische kunsteneers. André Breton, opriechter vaan 't polletiek surrealisme, nudegde Musidora mie es eine kier oet veur belaangriek evenemènte. Later oontving ze ouch roeze vaan häöm. In de twinteger jaore verleet ze Paries veur de leefde, en vertrok nao Spanje. Dao regisseerde ze zoonder väöl succes e paar Spaonse films. Wie ze trök kaom in Paries in 1926 speulde ze nog in e paar bekindere films mer häöre status begós al aof te numme. In 1927 trouwde ze mèt 'ne jäögvrund dee arts waor op 't platteland. Ze góng ziech weer mie weije aon 't toneel en sjreef zelfs e paar beuk. In 1950 versjeen ze veur de lèste kier op 't wit dook veurtot ze veur altied aofsjeid naom vaan de cinema. Later wèrkde ze nog aof en touw in 't lokèt vaan 'n bekènde cinema in Paries. Vrun vaan häör lete later weite tot zie bekans noets woort herkind. Zie hiemelde in 1957 in e Paries hospitaol.

'n ierbetuin aon Musidora op 'ne Pariese metro

Brón

Franstaolege Wikipedia