Jos Verstappen
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
![](http://upload.wikimedia.org/wikipedia/commons/thumb/a/a3/Jos_Verstappen_A1_test_2005.jpg/225px-Jos_Verstappen_A1_test_2005.jpg)
Jos Verstappen (Mofert, 4 mieërt 1972), voloet Johannes Franciscus Verstappen, is 'ne Nederlands-Limburgse ex-A1-GP- en ex-Formule 1-coureur. Hae waas getrouwdj mit de Belzje, ex-Kartcoureur Sophie Kumpen (de nich van Paul Kumpen, Rallycross kampioen van 't Belsj in 1987, en ziene zoon Anthony Kumpen, 'nen actieve FIA-GT-WK-coureur) mit waem hae twieë kinjer haet: Max en Victoria.
Carrièr
[bewirk | brón bewèrke]Jos Verstappe waerdjen op 4 mieërt 1972 gebaore. Al op 8-jäörige laeftied kreeg d'r 't racevirus te pakke. Oppe daag det Jos zien ieëste hèlge kómmune deej huuerdje d'r bie 't verlaote vanne kirk motergeraochel. Same mit zie vader góng d'r kieke. 't Bleek 'n kartrace te zeen dae in 't dörp georganiseerdj waerdje. Vader en zoon wore geliek verkóch en 't doerdje den ouch neet lang veurdet Jos veur 't ieës zelf op 'ne kart zoot. Na twieë jaor waas Jos riep (en aad genóg) óm wèdstrieje te vare.
De kartcarrière van Jos waerdjen ech serieus in 1982 doe d'r lenjelike wèdstrieje góng vare. 't Ieëste succes koom in 1984 wie 't Nederlands kampioensjap veur juniore waerdje behaoldj. In 1986 haoldje Jos oppernuuts de Nederlandse titel. De grótste kartsuccesse haoldje Jos in 1989. Hae wón det jaor e groeat aantal internationaal races, en waat mieër is, twieë Europese titels.
Inne jaore '90 beènjigdje hae zien loupbaon nao e paar zwaor óngevalle.
Inne periood 1994-2003 reej Jos ouch inne Formule 1, bie versjillige renstalle. d'n Ópvallendjsten tied waas d'n tied bie 't team van Benetton in 1994 wo d'r terechkoom es invaller veure geblesseerdje JJ Lehto. Hae waas daobie d'n twieëdje koeräör van 't team, naeve Michael Schumacher. Zienen ieëste wèdstried verleep neet good; hae woort vanne baan gereje door Eddie Irvine, wobie d'r zelfs euvere kop vloog, meh wiejer óngedeerdj bleef. 't Huuegdjepuntj in dit sezoen waas zien derdje plaats tiejes de Grand Prix van Hóngarieje. Tiejes 'ne pitstop bieje GP van Duutsjlandj in Hockenheim koom bie 't tanke brandjstof euvere heite óngerdeiler vannen auto. d'n Auto, mit Jos d'rin, vadje veur kórten tied vlaam. Hiedoor verbrandje zien naas ómdet 't vezeer van zienen helm aopsting, waat in daen tied gewuuen waas. Vanaaf doe móste koeräörs häör vezeer toe haje bie 't tanke.
Ziene zoon Max Verstappen is ouch coureur. Hae is in 2014 mit 17 jaor es jónkste koeräör oeats gestartj inne Formule 1.