Elfo
Un elfo es un tipo de esente supranatural formida como un umana en mitolojia e folclor germanica (incluinte norsce). En cultures germanica de la eda medieval, elfos pare jeneral como esentes con potias majial e belia supranatural, ambivalente a persones comun e capas de o aida o interfere con los. Ma la detalias de esta credes ia varia multe tra tempo e spasio, e ia flori en cultures precristian e cristian.
La parola "elfo" es trovada en tota linguas germanica e pare sinifia orijinal "esente blanca". Reconstrui la conseta temprana de un elfo depende xef sur testos, scriveda par cristianes, en engles vea e media, deutx media, e norsce vea. Estas asosia elfos con la dio de mitos norsce, con causante maladias, con majia, e con belia e sedui.
Pos la periodo medieval, la parola "elfo" ia tende deveni min comun en la linguas germanica, reponeda par parolas nativa alternativa como zwerc ("nana") en deutx e huldra ("esente ascondeda") en la linguas scandinavian, e parolas prestada como faerie ("fe", de franses vea en la plu de linguas germanica). Ancora,crede en elfos ia permane en la periodo moderna temprana, spesial en Scotland e Scandinavia, do elfos ia es videda como persones majial potiosa, tipal nonvidable, cual abita longo comunias umana normal. Los continua es asosiada con causa maladias e con menasas sesal. Per esemplo, alga baladas moderna temprana en la Isolas Brites e Scandinavia, orijinal de la periodo medieval, descrivente elfos como atenta sedui o saisi umanas.
Con urbani e industri en la sentenios 19 e 20, credes en elfos ia descrese rapida (an si alga persones en Island declara ce la crede en elfos continua. Ma, de la periodo moderna temprana a pos, elfos ia comensa es popular en la leteratur e arte de la elites educada. Esta elfos leteratural ia es imajinada como esentes peti, con "Un sonia de un note de mediaestate" par William Shakespeare como un developa clavin de esta idea. En la sentenio 18, scrivores romantica deutx ia es influeda par esta idea e ia reemportada la parola engles "elf" en la lingua deutx.
De esta cultur elite romanticiste ia veni la elfos de cultur popular cual emerje en la sentenio 19 e 20. La elfos asosiada con natal en cultur popular es un resente tradision, popularida prima en la SUA. Elfos ia reentra la leteratur de fantasia en la sentenio 20 en obras publicada par autores como J. R. R. Tolkien. Estas repopulari la idea de elfos como simil a umanas, con sua asosia con majia e belia. Los resta un parte de libros e juas fantasial oji.
La parola "elfo" en lfn es de elfo en la plu de linguas romanica (e elfe en franses), ma los ia es orijinal derivada de engles elf, de ælf en engles vea, ance videda como alfr en norsce vea, alp en deutx alta vea, tota deriva de la parola de protoindoeuropean *albh- ("blanca"), ance videda en latina albus.