Ражаб Амирханов
Ражаб Амирханов — садлагьай лезги публицист ва шаир-гьикаятчи.
1887 йисуз Ахцегьа дидедиз хьана. Кьве йисан урус мектеб куьтягьна, ам Бакудиз фенай, фялейрин зегьметдик ва инкъилабдин гьерекатрик экечӀна. Урус ва азербайжан чӀалар хъсандиз чирна, Ражаб макъалаяр ва гьикаяяр кхьинал машгъул хьана. 1914 йисуз ам Москвадиз фена университетдик экечӀнай, амма хъуьтӀуьз стӀалжем хьана хуьруьз элкъвенай.
Ражаб Амирханова 1912–1914-йисара Петербургда акъатзавай «Дагъустандин ярар» ва «Мусурманрин газет» газетриз са жерге макъалаяр («Чи зайифвал», «Илим», «Шаирдин кьиникь», «Дагъустанвидин къейдер» ва мсб.) акъудна. И газетрин хсуси мухбир яз, Р. Амирханова лезги халкьдин ва Бакудин фялейрин четин гьалдикай ахъадаказ кхьена, зегьметчи халкьдиз кӀелун-кхьин чируниз ва девлетлуйрин пацукай азад хьуниз эвер гана. «Заз азадвал ва кӀел-кхьин виридалайни багьа я», — малумарна мухбирди вичин са макъалада.
Р. Амирханова лезги литературада садлагьай гьикая — «ШакӀуртдин чар» кхьена, ам 1912 йисуз урус чӀалал «Дагъустандин ярар» газетдиз акъудна. Ражаб Амирханова лезги публицистикадин ва гьикаятдин бине кутуна. Ам 1914 йисуз залан азардик рагьметдиз фена, хайи Ахцегьа кучукнава.
Эдебият
[дуьзар хъувун | вики-текст дуьзар хъувун]- Акимов К. X. Лезгинская национальная проза. — Махачкала, 1998.
- «Лезги газет», 1999-йисан 28-январь.
- Акимов Къ. Х. Лезги зарияр: куьмекчи ктаб. — Магьачкъала, 2001. — 160 ч.