Bréisseler Metro
De Bréisseler Metro ass en ëffentlecht Transportmëttel an der Haaptstadregioun Bréissel, dat vun der Société des transports intercommunaux de Bruxelles (STIB) bedriwwer gëtt. Dëse Metrosystem besteet aktuell aus 4 Linnen, déi op 40 km Schinne fueren, dovu 37,5 km ënnerierdesch.
Den Bréisseler Metro fiert zënter 1976. De Prinzip beim Plangen a Baue bestoung doran, de Bréisseler Tram, dee wäit developpéiert ass, kontinuéierlech an Tunnellen ze verleeën an duerch de Metro z'ersetzen. Well den urspréngleche Projet sech als ze vill ambitiéis erausgestallt huet, gouf d'Metroslinn Grande Ceinture ni fäerdeg. Well d'Aarbechten awer scho ugefaangen haten, fuere verschidden Tramsstrecken duerch d'Metrostunnelen. Déi ginn an deem Kontext Premetro genannt.
2020 gouf de Bréisseler Metro 163 Millioune Mol benotzt.[1]
Linnen
[änneren | Quelltext änneren]Streckeplang
[änneren | Quelltext änneren]
Strecken
[änneren | Quelltext änneren]| Linn | Faarf | Streck (franséisch / hollännesch) | Opgaangen | Längt | Garen |
|---|---|---|---|---|---|
| Linn 1 | Gare de l'Ouest ↔ Stockel / Weststation ↔ Stokkel | 2009 | 12,5 km | 21 | |
| Linn 2 | Leopold II ↔ Elisabeth / Leopold II ↔ Elisabeth | 1988/2009 | 10,3 km | 19 | |
| Linn 5 | Erasme ↔ Herrmann-Debroux / Erasmus ↔ Herrmann-Debroux | 2009 | 17,3 km | 28 | |
| Linn 6 | Roi Baudouin ↔ Simonis (Elisabeth) / Koning Boudewijn ↔ Simonis (Elisabeth) | 2009 | 15,5 km | 26 |
Statiounen
[änneren | Quelltext änneren]De Bréisseler Metro huet am Ganzen 59 Statiounen, wouvun déi meescht ënnerierdesch sinn. Duerch déi Bréisseler Zweesproochegkeet hunn en ettlech Statiounen en hollänneschen an e franséischen Numm.
Geschicht
[änneren | Quelltext änneren]
Déi éischt Pläng fir e Metro zu Bréissel gi bis op 1892 zeréck. Vill verschidde Strecke goufe proposéiert mä ni vun der Bevëlkerung oder der Verwaltung akzeptéiert. Eréischt an den 1950er Jore gouf et konkreet an déi éischt Tunnelle goufe gebaut. Vun 1976 u fiert dunn endlech offiziell e Metro zu Bréissel.
Linn 1
[änneren | Quelltext änneren]D'Aarbechte fir déi Streck hunn 1965 ugefaangen an 1969 sinn déi éischt Trammen ënnerierdesch gefuer. Eréischt 1976 gëtt d'Streck De Brouckère – Tomberg/Beaulieu eng richteg Metroslinn. D'Linn gouf kontinuéierlech erweidert an zanterhier 1A an 1B genannt. No der leschter Erweiderung huet sech d'Streck 1A vun Hermann-Debroux bis op Roi Badouin an d'Streck 1B vu Stockel bis op Érasme erstreckt. Déi zwou Strecken hunn eng gemeinsam Streckeféierung tëscht de Statiounen Mérode a Beekkant. Mat der Reorganisatioun vum Bréisseler Metrosnetz, am Abrëll 2009, verbënnt d'Linn 1, d'Statioune Gare de l'Ouest a Stockel.
Linn 2
[änneren | Quelltext änneren]D'Linn 2 ass eng Linn déi e Krees ëm den Zentrum vu Bréissel bild. E verleeft gréisstendeels op der Streck vun der sougenannter Petite Ceinture. Deen éischten Deel vun der Streck gouf 1970 ageweit. De Krees gouf de 4. Abrëll 2009 zougemaach.
Linnen 5 a 6
[änneren | Quelltext änneren]D'Linne 5 a 6 existéieren eréischt zanter dem 4. Abrëll 2009 mat der Reorganisatioun vum Bréisseler Metrosnetz. D'Linn 5 verleeft vun Hermann-Debroux bis op Érasme. D'Linn 6 verleeft gréisstendeels iwwer d'Streck vun der Linn 2, mä zu Simonis fiert se da viru bis op Roi Badouin. Hir Nummeréierung kënnt dohier, well d'Streckeféierung, vereinfacht gekuckt, un eng "6" erënnert.
Linnen 3 a 4
[änneren | Quelltext änneren]Nieft de 4 Metroslinne gëtt et nach 2 performant Tramslinnen zu Bréissel, déi zum Deel och ënnerierdesch fueren. Déi 2 Linne mat der Bezeechnung Chrono, lafen op enger Nord-Südachs duerch den Zentrum vu Bréissel. Zesumme mat de Metroslinne stelle se déi wichtegst Strecke vum STIB-Reseau.
D'Linn 3 gëtt als Metroslinn ausgebaut, déi no Norden hi bis op Schaerbeek an Evere verlängert soll ginn. Si geet fréistens 2032 a Betrib.[2]
Material
[änneren | Quelltext änneren]D'Metroen zu Bréissel bestinn aus 3 verschidde Modeller: d'M4 (8 Rammen), d'M5 (37 Rammen) an déi méi nei M6-Boa (21 Rammen). (Stand: 2020)[3][4][5]
Kuckt och
[änneren | Quelltext änneren]Um Spaweck
[änneren | Quelltext änneren]| Commons: Bréisseler Metro – Biller, Videoen oder Audiodateien |
Referenzen an Notten
[Quelltext änneren]- ↑ Statistesche Rapport 2020, Répartition du réseau par mode de transport, S. 2
- ↑ lacapitale.sudinfo.be: Le métro Nord prêt pour 2032 au plus tôt (15. Juli 2021)
- ↑ Statistesche Rapport 2013, Parc du matériel roulant en exploitation, S. 91
- ↑ Statistesche Rapport 2020, Parc du matériel roulant en exploitation, S. 12
- ↑ M4, M5 an M6 steet fir Voitureszuel an de Rammen