Volleyball
Volleyball | |
---|---|
![]() | |
![]() | |
Typ | Ballsportaart, Mannschaftssport, Olympesch Sportaart |
Olympesch Sportaart | zënter 1964 |
Federatioun | |
International | Fédération internationale de volleyball |
Lëtzebuerg | Fédération luxembourgeoise de volleyball |
Ursprong | |
Ursprongsland | Vereenegt Staate vun Amerika |
Erfonnt | 1895 |
Erfinder | William G. Morgan |
Aner Informatiounen | |
Spiller (Minimum) | 12 |
Spiller (Maximum) | 12 |
Gebraucht gëtt | Volleyball, Volleyballsterrain |
Aktuelle Weltmeeschter ♂ |
![]() |
Aktuelle Weltmeeschter ♀ |
![]() |
![]() |
Volleyball ass eng Ekippesportaart aus der Grupp vun de “Réckschlospiller”, bei där sech zwou Ekippe vu sechs Spiller op engem Terrain géintiwwerstinn, deen duerch en Netz gedeelt ass.
Zil vum Spill ass et, de Volleyball ënner Asaz vum ganze Kierper iwwer d'Netz op de Buedem vum géignereschen Terrain ze schloen. Gläichzäiteg geet et awer och dorëms, ze verhënneren, datt dem Géigner genee dat selwecht geléngt. All Ekipp däerf de Ball maximal dräimol (an eng Kéier am Block) beréieren, fir en op déi aner Säit ze kréien.
Volleyball kënnt ursprénglech aus den USA a gëtt weltwäit gespillt. De Weltverband (Fédération internationale de volleyball (FIVB)), dee säi Sëtz an der Schwäiz huet, ass mat 218 Natiounen[1] dee Verband mat de meeschte Memberlänner.
Volleyball ass mat geschaten 800 Millioune Participanten, wouvun der geschat ronn 350 Millioune reegelméisseg spillen, de fënneftpopuläerste Sport op der Welt[2].
Terrain
[änneren | Quelltext änneren]![](http://upload.wikimedia.org/wikipedia/commons/thumb/7/7a/VolleyballCourt.png/260px-VolleyballCourt.png)
![](http://upload.wikimedia.org/wikipedia/commons/thumb/8/89/VolleyballNet.png/260px-VolleyballNet.png)
De Volleyballsterrain ass 18 m laang an 9 m breet, sou datt all Ekipp op enger Hallschent vu 9 × 9 m spillt. Déi zwou Hallschente sinn duerch en Netz getrennt dat bei den Hären 2,43 m, bei den Dammen 2,24 m an am Mixed (Loisir) 2,35 m héich ass. D'Netz muss aus engem donkele Fuedem bestoen, et ass 1 m breet an 9,5 bis 10 m laang, sou datt et op all Säit 25 bis 50 cm iwwer d'Säitelinne vum Terrain erausgeet. D'Pottoe fir d'Netz festzemaachen sinn dowéinst och net op der Säitelinn, mä ongeféier e Meter aus dem Terrain eraus placéiert. Fir d'Säitelinne besser siichtbar ze maachen, sinn direkt driwwer zwéi Bänner vertikal um Netz festgemaach. Iwwer dëse Bänner ass nach e Staf, Antenn genannt, dee vertikal 80 cm iwwer d'Netz geet. D'Antennen däerfen zu kengem Zäitpunkt vum Ball beréiert ginn, vue datt se d'Begrenzung vum Terrain duerstellen. D'Netz muss stramm gespaant sinn, well d'Netzberéierung duerch de Ball kee Feeler duerstellt an dësen no enger Beréierung nach däerf weider gespillt ginn.
An dräi Meter Ofstand zur Mëttellinn sinn, parallel zu där, d'Ugrëffslinnen (och nach “3 m Linn” genannt). Nëmme Spiller aus der viischter Linn däerfen bannent der Zone tëscht dësen zwou Linnen attackéieren. Déi hënnescht Spiller däerfen de Ball nëmmen ënner dem Niveau vun der Netzkant spillen oder mussen hanner der Ugrëffslinn ofsprangen. Se däerfen awer virun der Ugrëffslinn opkommen.
Ronderëm den eigentlechen Terrain mussen op d'mannst dräi Meter fräigehale ginn, wou de Ball och nach däerf gespillt ginn. Fir Matcher an der Hal gëtt geroden datt déi op d'mannst 8 Meter héich ass, ouni datt do eppes géif stéieren. Wann ee sech awer zu Lëtzebuerg all ze streng un déi Reegelen hale géif, da kéinten d'Matcher net méi all gespillt ginn. Dowéinst stellt d'FLVB däitlech méi kleng Ufuerderunge fir national Matcher wéi d'FIVB fir internationaler.
Geschicht
[änneren | Quelltext änneren]Volleyball gouf am Dezember 1895 vum William G. Morgan zu Holyoke, USA virgestallt. De Sportdirekter vun der YMCA hat e Spill mam Numm "Mintonette" als Spill fir eeler Memberen entwéckelt. Et huet laang Zäit als duuss Alternativ zum Basketball, deen zu Springfield, wat nëmme 10 Meile Loftlinn ewech läit, entstane war. D'Indoor-Sportaart huet charakteristesch Elementer aus dem Tennis an dem Handball enthalen. De Morgan selwer huet nach déi éischt Reegele verfaasst. Dës Reegele hunn e 25 × 50 Fouss (~ 7,72 m × 15,24 m) groussen Terrain an e 6 Fouss 6 Inch (~1,98 m) héicht Netz virgesinn. Am Géigesaz zu haut war weeder d'Zuel vun de Spiller um Terrain nach d'Zuel vun de Ballkontakter limitéiert. Bei engem falsche Service, hat ee wéi am Tennis, een zweete Versuch zegutt.
En Zuschauer vum éischte Spill an der YMCA zu Springfield huet 1896 den nach haut benotzten Numm "Volleyball" agefouert, dee vum franséische Wuert "volée" kënnt. Ausserdeem goufe bei där Geleeënheet och déi éischt Ännerunge vun de Reegele gemaach.
An de Joren duerno huet sech d'Sportaart iwwer Kanada (1900) an d'ganz Welt verbreet. Se gouf wärend dem Éischte Weltkrich vun amerikaneschen G.I.'s an Osteuropa agefouert, wou Volleyball sech bannent kierzter Zäit zu engem populäre Sport entwéckelt huet. Bis an d'Mëtt vum 20. Joerhonnert hat de Sport sech dunn um ganzen europäesche Kontinent ausgebreet. Déi meescht Techniken an Taktiken aus dem moderne Volleyball goufe vun europäeschen Ekippen agefouert. Beispiller sinn ënner anerem de Block (Tschechoslowakei, 1938), de Libero (UdSSR), d'Manchette (Tschechoslowakei, 1958) an d'Ugrëff aus der hënneschter Rei (Polen, 1974).
Déi féierend Natiounen am Volleyball si Brasilien, d'USA, Italien a Russland. Duerno komme Japan, Serbien, Polen, Kuba, China an Däitschland. D'FIVB schätzt datt sech ronn e Sechstel vun der Weltpopulatioun als aktiv Spiller oder Zuschauer um Volleyball bedeelegt.
Déi international Federatioun, d'Fédération internationale de volleyball (FIVB), gouf 1974 gegrënnt. Schonn zënter 1963 gëtt et eng europäesch Konfederatioun, d'Confédération européenne de volleyball (CEV), déi hire Sëtz an der Stad Lëtzebuerg huet. D'Lëtzebuerger Federatioun FLVB gouf den 2. Juni 1981 gegrënnt an organiséiert all Joer souwuel d'Championnater am Hären- wéi am Dammevolleyball aus, grad wéi och d'Coupe de Luxembourg. Zënter der Saison 2008/2009 gëtt d'Coupe de Luxembourg vun der Loterie nationale ënnerstëtzt an dréit dofir hiren Numm (Loterie nationale coupe de Luxembourg).
Volleyball ass zënter 1964 olympesch Disziplin. D'Variant Beachvolleyball ass zënter 1986 vun der FIVB offiziell unerkannt a gehéiert zënter 1996 och zum olympesche Programm.
Kuckt och
[änneren | Quelltext änneren]Portal Sport
- Lëscht vu lëtzebuergesche Sportler
- Lëscht vu lëtzebuergeschen Olympionicken
- Lëtzebuergesch Sportler vum Joer
Um Spaweck
[änneren | Quelltext änneren]Commons: Volleyball – Biller, Videoen oder Audiodateien |
- Volleyball-Weltmeeschterschaften fir d'Hären (fr)
- Volleyball-Weltmeeschterschaften fir d'Dammen (fr)
- Site vun der FLVB
- Site vun der CEV
- Volleyballreglement op der Websäit vun der FIVB
Referenzen an Notten
[änneren | Quelltext änneren]- ↑ FIVB Directory. www.fivb.com. Gekuckt de(n) 2023-12-27.
- ↑ (en)Exploring The Growing Popularity Of Volleyball Around The World | VanguardVolleyball.com (2023-12-26) Archivéiert de(n) 2023-12-27. Gekuckt de(n) 2023-12-27.