John Opie

John Opie
John Opie
Genys	16 Me 1761 ; Trevelles
Mernans	9 Ebrel 1807 ; Loundres
Kenedhlogeth	Breten Veur
Galwesigeth	lymner, portrayansydh, bewskrifer
Gis	lymna istorek, art tirwedh, portrayans
Pries	Amelia Opie
Eseleth	Akademi Riel Artys

John Opie RA (16 Me 1761 – 9 Ebrel 1807) o lymner kernewek a lymnansow istorek ha portrayansow. Ev a lymnas lies den ha benen mas a'y dhydh, ow komprehendya eseli a deylu riel bretennek hag erel o a vri yn aga galwesigethgow awennek ha liennek.

Bewnans hag ober

Genys veu Opie yn Krowji Harmony, Trevelles, yntra Breanek ha Porthpyran yn Kernow. Ev o an yowynkka a bymp flogh Edward Opie, penn ser pren, ha'y wreg Mary (née Tonkin). Pur roasek o avel flogh yn delinya hag awgrym, hag erbynn dewdhek bloodh, ev re wrussa maystri war Euclid hag ygeri skol gorthugher rag fleghes boghosek may hwrug dyski redya, skrifa ha niveronieth. Ny wrug y das kennerthi y allos, hag restra kynserneth dhodho avel ser pren yn le.

Wortiwedh an medhek ha gesyer leel Dr John Wolcot, (Peter Pindar), a wrug attendya dhe deythi Opie, ha dos dhe'y weles y'n velin heskenna mayth esa owth oberi yn 1775. Owth aswon roas meur, Wolcot a dheuth dhe vos 'mentor' Opie. Ev a'n brenas yn-mes a'y gynserneth, hag ynia warnodho dhe driga ganso yn Truru. Wolcot a brovias kennerth, kussul, dyskans ha gweres hewul yn resegva a-varr Opie.

Yn 1781, wosa lower a brevyans avel portrayansydh yn Kernow, Opie a removas dhe Loundres gans Wolcot. Ena i a driga war-barth, gans ambos a gevranna budhow. Kyn tegemeras Opie adhyskans dhyworth Wolcot, an medhek a'y dhiskrifas avel marth honan-adhyskys. Portrayans a vaw diskwedhys orth an Skol Lymnoryon an vledhen gyns, a veu diskrifys y'n rolas avel "ober awenydh, neb na welas lymnans bythkweth." Wolcot a gomendyas an "Marth kernewek" dhe lymnoryon a vri, ow komprehendya Syr Joshua Reynolds, a'n komparyas dhe Caravaggio ha Velazquez, hag dhe brenoryon possybyl. An akord ma a dhuryas bledhen, ha wosa hemma Opie a leveris dhe'n medhek ev dhe vynnes bos war y honan.

Dre dhelanwes neb Mrs Boscawen, Wolcot a restras Opie dhe vos komendys yn lys Myghtern Jori III. An myghtern a brenas onan a'y lymmnansow, ha govyn dhodho liwa portrayans a Mary Delany. Opie a gavas kommysyon dhe bayntya Duk ha Duges Kerlew, Arlodhes Salisbury, Arlodhes Charlotte Talbot, Arlodhes Harcourt hag arlodhesow erel an lys. Chi Opie o leun a dus jentyl pub dydh. Yn 1782 ev a omdhiskwedhas y'n Akademi Riel, hag yn mis Kevardhu an keth bledhen ev a dhemedhas Mary Bunn. Nyns o an demedhyans unn lowen, hag yn 1796 i a gavas didhemedhyans wosa hi dhe dhiank gans den aral.

Ober Opie, wosa termyn kott a gerensa an bobel, eth yn-mes a is. Drefen henna, ev a oberas war wellhe y deknek, ha dyski Latin, Frynkek ha lien Sowsnek ynwedh. Yn 1786 ev a omdhiskwedhas y desten istorek posek kynsa, Moldrans Jamys I, hag y'n vledhen awosa Moldrans Rizzio. Drefen an ober ma, ev a veu etholys skoodhyer an Akademi Riel (hag esel leun yn 1788). Alenna bys dhe'y vernans, y ober a gomprehendyas portrayansow hag oberyow istorek. Yn mis Me 1798 ev a dhemedhas Amelia Alderson, demedhyans moy lowen a lower ages an huni kynsa.

Opie a lymnas lies den ha benen a vri ow komprehendya Mary Wollstonecraft, Samuel Johnson, Francesco Bartolozzi, John Bannister (gwarier), Joseph Munden, Charles James Fox, William Betty, Edmund Burke, John Crome, James Northcote, Henry Fuseli, Thomas Girtin, Robert Southey, Samuel Parr, Elizabeth Inchbald ha Mary Shelley; 508 portrayans yn sommen, an brassa niver yn oyl, ha 252 a lymnansow erel.

Dyski ha skrifa

Yn 1805, apoyntys veu Opie avel Professor an Akademi Riel, ha a-dhia Me 1806 ev a wrug kevres a beder areth dyllys avel lyver wosa y vernans, gans kovyon gans y wedhwes Amelia Opie, yn 1809. Y dhyskoryon y'n Akademi a gomprehendas Henry Thomson. Opie o aswonnys ynwedh avel skrifer war art drefen y ober Bewnans Reynolds ha Lyther war kennertha an artys fin yn Pow Sows, a wrug kampoll furvyans Mirva Genedhlek ynno.

Mernans

Opie a verwis yn Ebrel 1807, yn 46 bloodh, yn y ji yn Stret Berners, Loundres, hag ynkleudhys yn Penneglos Sen Pol, y'n kladhgell nessa dhe Joshua Reynolds, avel y vodh. Diflogh ova.