Schabau

Dä Lemma-Titel he es op Kölsch buchstabeet nohm Wrede.

Hee die Sigg es op Kölsch
(mih kölsche Sigge)
un jeschrevve wie beim Wrede
(mih Sigge jeschrevve wie beim Wrede)

Schabau (och Schnaps) es jet för ze drenke, dat us verjoren Jesumms jebrannt weed.

Schabau hätt normal zwesche 36% un 42% Alkohol. Hä kann us Obs (z. B. Prumme, Quetsche, Mirabell oder Äppel), Beere, Jetreide, Trester oder Woozele jemaat weede. Mer kann de Schabau och us diverse Schabausoote zesammemixe, zem Beispill Appelkorn, Bessen Jenever, oder zem Beispill och wat dä Weßfälinger jän drink, dat es dä Saure Paul. Wenn dä Schabau kei Färv hätt es et ene Klore, zem Beispill Koon oder Quetsch.

Et jitt Schabau för ze kippe un för ze nippe. Rungerschlotze moss mer de Koon, langsam drinke doot mer en Marc.

Wat ene Schabau es, rejelt hück de EWG-Verordnung Nr. 1576/89 des Rates vom 29. Mai 1989 zur Festlegung der allgemeinen Regeln für die Begriffsbestimmung, Bezeichnung und Aufmachung von Spirituosen. Die jitt et leider nit op Kölsch.

Wo kütt dat Woot he

Schabau kütt vum lateinische vinum sabaudum (Savoyer Wing). Sigg em 18. Johrhungert säät mer en Kölle och Schnaps.

Beispill för Schabau

• us Ops:
  • us de Maische: Quetsch, Mirabell, Keesch
  • vum Saff: Calvados
• us Druve:
  • vum Trester: Trester, Grappa, Marc, Ouzo
  • vum fädije Wing: Mariacron, Cognac, Asbach
• us Koon:
  • met Adäppel: Aquavit, Wodka, Jenever un Gin
  • nur us Koon: Koon unn Dubbelkoon, Whisky un Whiskey
• us Zuckerrohr: Rum
• us Agave: Tequila

Mieh Aatikkel üvver Esse & Drinke fingste op dä Pooz:Esse & Drinke