ផ្សោតច្រមុះដបខ្លីវែង
ភិនភាគ៖ ថនិកសត្វទាំងពីរប្រភេទនេះមានរូបរាងប្រហាក់ប្រហែលគ្នា មានព្រុយខ្នងខ្ពស់ឡើងទៅលើ និងស្ថិននៅចំពាក់កណ្តាលខ្នង ហើយស្ថិតក្នុងអំបូរតែមួយ។ ផ្សោតច្រចុះដបចំពុះខ្លី អាចរស់នៅក្បែរ និងឆ្ងាយពីឆ្នេរ។ វាមានចំណុចអុចទំហំតូច ចំពុះខ្លី និងមានទម្ងន់ពេញវ័យ ១៨០គ.ក។ ចំណែកឯផ្សោតច្រមុះដបចំពុះវែងមានទំហំធំមាំរស់នៅឆ្ងាយពីច្រាំង និងមានទម្ងន់រហូតដល់ ៥០០គ.ក។ វាមានជ្រោយខ្នងពណ៌ប្រផេះខ្មៅ។ ផ្នែកចំហៀងសងខាងមានពណ៌ប្រផេះស្រាល និងពោះមានពណ៌ផ្កាឈូក។ ជីវសាស្ត្រ៖ សត្វផ្សោតទាំងពីរប្រភេទនេះរស់នៅជាក្រុម ដែលមានចំនួនរហូតដល់១៥ក្បាល។ ផ្សោតជាសត្វសកម្ម និងមានលក្ខណៈរហ័ស ហើយចូលចិត្តហែលដេញតាមក្បាលទូក។ ចំណីអាហាររបស់វាមានដូចជាត្រី មឹក និងបង្គា។
រប៉ាយរស់នៅ៖ ក្នុងដែនសមុទ្រកម្ពុជា វាមានវត្តមាននៅកោះរុង កោះរុងសាលឹម និងកោះតាងនៅតំបន់ភាកខាងលិច និងខាងកើតនៃមហាសមុទ្រឥណ្ឌា មហាសមុទ្រប៉ាស៊ីហ្វិក និងតាមតំបន់ឆ្នេរនៃប្រទេសផ្សេងៗ។
ស្ថានភាពអភិរក្ស៖ ផ្សោតច្រមុះដបចំពុះខ្លី និងផ្សោតច្រមុះដបចំពុះវែង ត្រូវបានចុះក្នុងបញ្ជី IUCN (DD) ជាប្រភេទមិនទាន់មានព័ត៌មាន និងទិន្នន័យគ្រប់គ្រាន់នៅលើពិភិពលោក។ ប្រភេទនេះកំពុងរងគ្រោះថ្នាក់ ដោយសារការបាត់បង់ទីជម្រក និងការនេសាទជលផលសមុទ្រ។