Pasisir Baru

pasisir baru

Pasisir Baru (ꦥꦱꦶꦱꦶꦂꦧꦫꦸ) kaprenah wonten ing Désa Poncosari, Kapanéwon Srandakan, Kabupatèn Bantul, Daerah Istimewa Yogyakarta tebihipun kirang langkung 35 kilometer saking punjering kutha Yogyakarta. Pasisir Baru dipunparingi nama Baru (enggal) amargi pasisir menika gantosipun Pasisir Parangkusuma ingkang sampun boten dipunupakara dening warga dados papan wisata utawi papan plesir. Pasisir Baru dipunbikak utawi dipunresmèkaken déning pamaréntah Bantul dados papan wisata enggal rikala wulan Mei 2010.

Informasi Mirunggan Bab Pasisir Baru

1. Saderengipun mlebet wonten ing pasisir para wisatawan saged mirsani kincir angin ingkang kaginakaken kangge Pembangkit Listrik Tenaga Hibrida (PLTH). Kincir angin ingkang kathah menika dipunpasang wonten ing grumbulan sacaketing Pasisir Baru, dene PLTH menika dipunmumpangaten kangge nyekapi kabetahanipun listrik para warga ing sakiwa tengenipun Pasisir Baru.
2. Mlebet ing gapura Pasisir Baru para wisatawan mangke dipuncegat dening petugas kangge nyaosaken tiket parkir. Papan parkiran ing pasisir menika kapetang jenggar dados boten prelu kuwatos menawi mbekta kendaraan kados mobil menapa bis saged parker kanthi sekeca.
3. Kalebet pasisir ingkang tapel watesipun langsung kalihan Samudra Hindia nggadhahi wedhi utawi pasir werni cemeng ingkang saged nyerep hawa bentèr saking srengéngé langkung kathah katimbang pasisir kanthi wedhi werni pethak. Bab menika ndadosaken Pasisir Baru boten patosa bentèr satemah para wisatawan saged ngraosaken éndahing segara kanthi sakéca.
4. Sadawané Pasisir Baru dipuntanemi cemara udang ingkang sampun inggil-inggil lan radi rungkut pramila kénging kanggé lèyèh-lèyèh nyawang pasisir. Wontenipun cemara udang saged dipunginakaken kanggé nyegah abrasi pasisir awit oyod-oyod cemara menika kiyat kados déné tanduran mangrove.
5. Sasanesipun ugi wonten séwan ATV ingkang saged dipunginakaken sesarengan kalihan kulawarga ingakng samangké mubeng sapinggiring pasisir kanthi margi ingkang sampun dipundamelaken dening pengelola satemah boten badhé nggangu para wisatawan sanès ingkang nembe sekéca lelenggahan.
6. Kolam slulum bocah ugi wonten menawi rumaos boten aman dolanan toya ing sapinggiring pasisir saged dolanan toya wonten ing séwan kolam sinambi ngawasi lare-lare ugi saged mundhut unjukan menapa dhaharan wonten ing wandèn sacedhakipun kolam menika.
7. Salajengipun ugi wonten papan sadéan ulam seganten kados peyek ulam, peyek jingking, peyek rumput laut, lan ugi sadean kados krupuk mentah asiling para warga sakiwa tengenipun pasisir ingkang saged dipuncobi déning para wisatawan ingkang nembé plesir.

Jam Bikak lan Regi Tiket

• Pos retribusi Pasisir Baru bikak saben dinten wiwit tabuh 06.00 – 17.00 WIB. Déné regi tiket inggih menika.
• Tiket mlebet panggen wisata saben pawongan  Rp. 10.000 ananging tiket menika saged dipunginakaken kangge mlebet pasisir sanes ing sacedhaling Pasisir Baru, kados ta Pasisir Pandhansari, Dhepok, lan Parangkusuma.
• Tiket Parkir Motor: Rp. 5000,-

Papan Wisata ing Sacedhaking Pasisir Baru

• Pasisir Parangtritis
• Pasisir Pandhansima
• Pasisir Parangkusuma
• Pasisir Guwa Cemara
• Pasisir Kuwaru
• Paisir Dhepok
• Gumuk Pasir Parangkusuma

Pratelan

• Pantai Baru Bantul. detiktravel. Diakses pada 15 September 2023
• Pantai Baru Bantul Yogyakarta. gudegnet. Diakses pada 15 September 2023
• Pantai Baru Bantul. tribunnews.com. Diakses pada 15 September 2023