Cibulan

Cibulan punika satunggaling objèk wisata ingkang awujud pemandian kanthi toya ingkang adhem ing wewengkon lèrèng Gunung Ciremai, Kabupatèn Kuningan, Jawa Kulon^[1]. Papan pariwisata punika kalebet satunggaling papan pariwisata tuwa dhéwé ing Kuningan ^[2]. Objèk wisata punika resmi ing tanggal 27 Agustus 1939 déning Bupati Kuningan kala punika, ya iku R.A.A. Mohamand Achmad ^[2]. Minangka cathetan objek wisata sanès ingkang wonten ing Kuningan inggih punika Kolam Linggarjati ing komplèks Taman Linggarjati Indah, Kacamatan Cilimus ; Kolam Cigugur ing Kacamatan Cigugur; lan Kolam Darma Loka ing Kacamatan Darma.

Sajarah

Miturut cariyos ingkang wonten ing kalangan masarakat Désa Maniskidul lan masarakat Kuningan, ulam déwa ingkang wonten ing kolam Cibulan punika rumiyinipun prajurit-prajurit ingkang boten setya kaliyan pamaréntahan Prabu Siliwangi ^[3]. Lajeng prajurit mau dipuntumak déning Prabu Siliwangi saéngga dados ulam. Wonten mitos malih bilih ulam ingkang wonten ing kolam punika saking rumiyin dumugi sapunika boten kirang lan boten nambah dados ajeg makaten kemawon. Manawi kolam dipunkuras, ulam-ulam punika ical boten ngertos dhateng pundi, anaging manawi kolam sampun dipunisi toya banjur kondur malih kados mula buka.

Kawontenan Kolam

Ing objek wisata Cibulan punika wonten kalih kolam ageng awujud persegi panjang. Kolam ingkang kapisan gadhah ukuran 35x15 mèter persegi kanthi jero kirang langkung 2 mèter. Déné kolam ingkang kaping kalih punika kanthi ukuran 45x15 mèter persegi ingkang kapérang dados kalih pérangan. Pérangan kapisan punika kanthi jero 60 cm déné ingkang angka kalih punika kanthi jero 120 cm. Kalih kolam punika asring dipunkuras saben kalih minggu sapisan, saged ugi langkung gumantung kawontenan toyanipun.

Saben kolam ing Cibulan punika wonten puluhan ulam kanthi warni klawu radi ireng ingkang dipunwastani kancra bodas (Labeobarbus Dournesis) utawi iwak déwa (Cyprinus carpico) ^[2]. Ukuranipun manéka warni wiwit saking 20-an cm dumugi satunggal mèter. Ulam déwa punika dipunanggep keramat déning warga ing kiwa-tengené wewengkon Désa Maniskidul amargi dipunpitadosi gadhah kaistimewaan tartamtu. Sanajan kathah ulam kancra bodas lan ulam déwa, kolam-kolam ing Cibulan kabikak minangka kolam kanggé pemandian umum.

Ing sisih kulon pemandian punika wonten pitu sumber mata air ingkang keramat kanthi nama ‘’Tujuh Sumur’’. Pitung mata air punika awujud kolam alit kanthi nama ‘’Sumur Kejayaan’’, ‘’Sumur Kemulyaan’’, ‘’Sumur Pengabulan’’, ‘’Sumur Cirancana’’, ‘’Sumur Cisadane’’, ‘’Sumur Kemudahan’’, lan ‘’Sumur Keselamatan’’ ^[3]. Ing antawisipun pitung sumur punika, miturut mitosipun wonten salah satunggaling sumur ingkang wonten Kepiting emas inggih punika ‘’Sumur Cirancana’’, bilih sinten ingkang saged mirsani wujud kepiting utawi yuyu punika sadaya kekajengan saged kelajengan.

Cathetan suku

↑ Pemandian Cibulan dipadati pengunjung^{[pranala mati permanèn]} (dipunakses tanggal 21 Januari 2013)
↑ ^a ^b ^c Misteri Ikan déwa di Cibulan^{[pranala mati permanèn]} (dipunakses tanggal 21 Januari 2013).
↑ ^a ^b Pemandian Cibulan Archived 2013-06-26 at the Wayback Machine. (dipunakses tanggal 21 Januari 2013).

[cibulan1-1] Pemandian Cibulan dipadati pengunjung^{[pranala mati permanèn]} (dipunakses tanggal 21 Januari 2013)

[cibulan2-2] Misteri Ikan déwa di Cibulan^{[pranala mati permanèn]} (dipunakses tanggal 21 Januari 2013).

[cibulan3-3] Pemandian Cibulan Archived 2013-06-26 at the Wayback Machine. (dipunakses tanggal 21 Januari 2013).

[1]

[2]

[3]