Wn/scn/Lu nùmmiru di birrifici artiggianali sta criscennu

sabbatudìa 26 di sittèmmiru 2015

Sicilia: Nta l'ìsula lu nùmmiru di birrifici artiggianali sta criscennu assai. N sulu setti anni si passau di quattru a trentottu mprisi. Sti birrifici nichi prudùcinu la birra pi cummircializzàrila fora cu l'etichetta propia ma utilizzannu àutri mpianti. N Sicilia ci sunnu tanti pruduttura d'oriu, lu ciriali usatu pi fari sta vìppita, ca c'è puru un pruggettu di sviluppu dâ filiera isulana di l'oriu. Lu ntiressu è veru granni pirchì na birra pruduciuta cu materi primi siciliani attira l'attinzioni dô cunzumaturi. Si li prudutti sunnu siciliani pòrtanu n iddi di manera autumàtica la storia, la cultura, li tradizzioni, l'origginalità dâ Sicilia agghiuncennu un valuri ntrìnzicu e nun matiriali â birra stissa. Li cunzumatura sunnu sempri cchiù nfurmati, cchiù cunzapèvuli, cchiù esiggenti macari ; arricèrcanu la birra artiggianali e stannu sviluppannu na cultura birrara lucali. Comegghiè la pruduzzioni e la vìnnita sunnu pirò cchiù cuncintrati ntâ parti orientali dâ Sicilia.