Lena

Lena

Лена, Өлүөнэ
Při Lenskich stołpach w Jakutskej
ćeče přez	Rusku (Sibirsku, Irkutska oblasć a republika Sacha)
žórło	w Bajkalskich horinach (53° 55′ 58″ S, 108° 5′ 5″ W53.932777777778108.08472222222 )
wysokosć	1465 m
wuliw	z deltu do Laptewskeho morja (72° 24′ 2″ S, 126° 41′ 31″ W72.400555555556126.69194444444 )
wysokosć	0 m
mórski basenk	Arktiski ocean
rěčina	Wiljuj, Aldan, Oljokma, Witim
dołhosć	4294 km
přestrjeń rěčiny	2.490.000 km²

Lena (rusce Лена, jakutsce Өлүөнэ, Ölüöne) je wulka aziska rěka, kotraž čeće přez wuchodnu Sibirsku do Arktiskeho oceana. Ze 4.294 kilometrami słuša wona k najdlěšim rěkam na swěće. Jeje přitočnišćo wopřima wulki dźěl wuchodneje Sibirskeje a je z 2.490.000 km² sydom króć wjetše hač Němska.

Karta přitočnišća (rus.)

Wona wužórli so w njewobsydlenej kónčinje jenož pjeć kilometrow wot pobrjoha Bajkalskeho jězora w Bajkalskich horinach we wysokosći wot 1465 metrow. Wot sydlišća Ust-Kut je rěka pławna. Běži dale přez Srjedźosibirski hórski kraj do republiki Sacha (Jakutskeje). Za 80 kilometrow dołhimi a 300 metrow wysokimi Lenskimi skałami, słušacymi do swětoweho přirodneho herbstwa, zastupi Lena do Srjedźojakutskeje nižiny, hdźež přeběži jakutsku stolicu Jakutsk. Mjez Wjerchojanskimi horinami na wuchodźe a Srjedźosibirskim hórskim krajom ćeče wona dale do sewjerneho směra a wuliwa so z 45.000 km² wulkej rěčnej deltu do Laptewskeho morja, pódlanskeho morja Sewjerneho polarneho oceana.

W zymje je rěka po cyłej dołhoće zamjerznjena a słuži wobchadej jako lodowa dróha.

Přerězny wotliw Leny při wuliwje wučinja w januarje něhdźe 3100 m³/s, po taću sněha w juniju pak 62.000 m³/s (přerězny wotliw Łobja we Wittenbergu: 365 m³/s).

Najwažniše přitoki su:

• Wiljuj (2650 km, 454.000 km², wuliw wotlěwa pola km 1102)
• Aldan (2273 km, 729.000 km², wuliw wotprawa pola km 1311)
• Oljokma (1436 km, 210.000 km², wuliw wotprawa pola km 2089)
• Witim (1837 km, 225.000 km², wuliw wotprawa pola km 2714)

Wotkaz

 Commons: Lena – Zběrka wobrazow, widejow a awdiodatajow