Lheeahid glooie
![](http://upload.wikimedia.org/wikipedia/commons/thumb/1/1b/Slime_mold_stemonitis_fusca.jpg/220px-Slime_mold_stemonitis_fusca.jpg)
![](http://upload.wikimedia.org/wikipedia/commons/thumb/2/2b/Fuligo_septica_on_dead_wood.jpg/220px-Fuligo_septica_on_dead_wood.jpg)
![](http://upload.wikimedia.org/wikipedia/commons/thumb/9/9d/Haeckel_Mycetozoa.jpg/220px-Haeckel_Mycetozoa.jpg)
She ennym neuvaghtal eh lheeahid glooie, ta çheet er protista ta geddyn sliught liorish sporragyn. Hoshiaght, v'ad currit mastey ny fungyssyn, agh cha nel ad goit rish 'sy reeriaght shen jiu.[1] Ta'n ennym çheet er earish 'sy chorys bea tra ta kuse jeu ry-akin myr glooie; shen Mycsomycota son y chooid smoo.
Son y chooid smoo, ta lheeahidyn glooie nyn nooieyn Mycetosoa 'sy phylum Amoebosoa. Ta tree possanyn mooarey dy lheeahidyn glooiey:
- Mycsogastria (lheeahidyn glooiey plasmoidjagh)
- Dictyosteliida (lheeahidyn glooieyn killagagh)
- Protosteliales (eddyr y ghaa horçh)
Ta dooie elley ass Acrasida, Plasmodiophorida, Labyrinthulomycota as Fonticula currit marish lheeahidyn glooie ny keayrtyn. Cha nel rang-oardraghey baghtal ayn.
Corys bea
[reagh | edit source]![](http://upload.wikimedia.org/wikipedia/commons/thumb/f/f1/Slime.mold.jpg/220px-Slime.mold.jpg)
Ta daa horçh mooar ayn: lheeahidyn glooiey killagagh, as lheeahidyn glooiey plasmoidjagh. Ta'n jees oc geddyn sliught liorish sporragyn, as ta jargaght oc dy yannoo mynheane dys tannaghtyn bio ayns çhymbyllaght neuvondeishagh.[2][3]
Killagagh
[reagh | edit source]Son y chooid smoo, she Dictyosteliida t'ayn. Ta lheeahidyn glooiey killagagh goaill toshiaght myr killag amoebagh, as eh haploidagh son y chooid smoo. Ta'n killag bishaghey as scarrey choud's ta bee (bacteyryn son y chooid smoo) ry-gheddyn. Tra ta bee goan, t'ad cur magh stoo kemmigagh ta cur orroo çhaglym cooidjagh myr dhossan yl-chillagagh. Ta dooie yn dhossan croghey er stayd çhymbyllagh: ta coryssyn gientynagh keintyssagh as neucheintyssagh oc. Dy cadjin, ta'n corys neucheintyssagh ry-akin ayns çhymbyllaght çhirrym, as y corys keintyssagh ayns buill hashey.
'Sy chorys neucheintyssagh, ta ny killagyn haploidagh çhaglym cooidjagh myr pseudoplasmodium. Ta glaare as jerrey echey, t'eh gaareggyrt da soilshey as çhiassid, as t'eh garraghey. T'eh shirrey boayl cooie as jannoo sporocarp jeh hene, as gass cummal seose sorus ny sori. Ta ny sporragyn aynsyn coadit liorish boallaghyn killagagh; t'ad nyn gadley, agh t'ad caghlaa dys amoebae noa tra ta bee ry-gheddyn reesht. Ayns Acytostelium ta'n ghass jeant jeh kellaloys, agh ayns dooieyn elley t'ee jeant jeh killagyn hene. 'Sy chooid smoo dy ghooieyn, t'ad geddyn baase trooid troggal gass.
'Sy chorys keintyssagh, ta ny killagyn covestey. Ta unnanee yn-rheynn ayns caghlaaghyn strooh gientynagh, beggan gollrish keintyssyn. Ta daa chillag ass daa stroo gientynagh covestey myr killag diploidagh. Ta'n killag diploidagh soo stiagh killagyn amoebagh elley as lheie ad.[4] T'eh taaley troggal boalley kellaloyshagh mygeayrt y mysh; ta'n strughtoor shoh ny macroheane[noa] (macrocyst). Çheusthie jeh'n vacroheane, ta'n killag foawragh rheynn liorish meiosis ayns daa chillag as çhaglym noa dy yienntagyn oc. T'adsyn gaarheynn liorish mitosis dys ymmodee sporragyn haploidagh ta goll er skeaylley magh. T'ad gaase dys amoebae as toshiaghey y corys bea ass y noa.
Plasmoidjagh
[reagh | edit source]Son y chooid smoo, she Mycsogastria t'ayn. Ta lheeahidyn glooiey plasmoidjagh toshiaght myr killag amoebagh haploidagh ta bishaghey as scarrey choud's ta bee ry-gheddyn. T'ad jeh caghlaaghyn strooh gientynagh, as tra ta unnanee jeh daa stroo çheet ny quaiyl y cheilley, t'ad covestey myr sigoat diploidagh. Cha nel y sigoat (ny killag agamagh) scarrey, agh ta'n çheshvean killag echey scarrey ymmodee keayrtyn, derrey she killag yl-heshveanagh t'ayn, ny plasmodium as millioonyn dy heshveanyn echey dy mennick. T'eh feer vooar ny keayrtyn, wheesh as meader er crantessen.[5] Fy-yerrey, tra nagh vel bee ry-gheddyn ny rere brod elley, ta'n plasmodium jannoo sporocarp jeh hene, as skeaylley sporragyn vees breh amoebae noaey.
Ta tree saase gientynagh oc: strooghyn gientynagh ta tessen-sheelraghey (heterothallaght), strooghyn ta ynsheelraghey (homothallaght), as shaghney sheelraghey (agamaght).[5] Ta dooie agamagh tannaghtyn ny chillag haploidagh gyn covestey dys saigoat.
Imraaghyn
[reagh | edit source]- ↑ Introduction to the "Slime Molds". University of California Museum of Paleontology. Feddynit er 2009-04-04.
- ↑ H. Hagiwara (1989). The Taxonomic Study of Japanese Dictyostelid Cellular Slime Molds. Tokyo: National Science Museum.
- ↑ E.W. Olive (1902). "Monograph of the Acrasieae". Proc Boston Soc Nat Hist 30.
- ↑ María Romeraloa; Ricardo Escalanteb, Sandra L. Baldaufa (Mee ny Boaldyn 2012). "Evolution and Diversity of Dictyostelid Social Amoebae". Protist 163 (3): 331. doi: .
- ↑ a b Bruce Ing (2008). The exciting world of the slime moulds, Inaugural and professorial lectures (Baarle). University of Chester. ISBN 9781905929627. “The largest I ever encountered, at Loggerheads, near Mold, was a metre square, two centimetres thick and probably weighed twenty kilograms. This has to be the largest single cell ever recorded! Usually plasmodia are just a few centimetres in diameter and less than one millimetre thick.”
Kianglaghyn çheumooie
[reagh | edit source]- Caslyssyn
- Lheeahid glooie feaysley cartage
- Ymmyd lheeahid glooie ayns ronsaghey arraghee
- Robot goll er stiurey liorish lheeahid glooie: Robot moved by a slime mould's fears. New Scientist (2006). Feddynit er 2012-05-03.