Illa de São Miguel

Illa de São Miguel
	(pt) São Miguel
Tipo	illa
Parte de	arquipélago dos Açores (pt)
Situado na entidade xeográfica	Azores
Localización
División administrativa	Azores, Portugal
Localización	Océano Atlántico
	37°48′N 25°30′O / 37.8, -25.5
Bañado por	Océano Atlántico
Características
Dimensións	16 () × 90 () km ;
Punto máis alto	Pico da Vara (pt) (1.103 m )
Superficie	744,55 km²

São Miguel é a maior das illas Azores, e tamén a máis importante. Cunha superficie de 746,82 km², mide 90 km de leste para oeste e a súa anchura oscila entre 8 e 15 km. Conta cunha poboación de aproximadamente 157.830 habitantes (datos de 2011), repartida entre os municipios de Lagoa, Nordeste, Ponta Delgada, Povoação, Ribeira Grande e Vila Franca do Campo.

São Miguel é tamén coñecida como Illa Verde, debido ás súas grandes pradarías. Nos outeiros atópanse tamén bosques de laurisilva. A illa é o refuxio da ave Pyrrhula murina, paxaro endémico en grave perigo de extinción.

Xeografía

A illa componse dun antigo macizo no extremo leste (o Complexo de Povoação-Nordeste), e de tres estratovolcáns: Sete Cidades, Fogo e Furnas. Estes macizos volcánicos están unidos entre eles por aliñamentos recentes de conos de escouras. O estratovolcán de Sete Cidades é coñecido sobre todo pola súa gran caldeira, de 5 km de diámetro e 350 m de profundidade media. Nela atópanse dúas lagoas (Lagoa Verde ao sur e Lagoa Azul ao norte, así como numerosos volcáns de natureza traquítica.

O estratovolcán Fogo ocupa o centro da illa, cunha caldeira duns 3 km de diámetro. A última erupción de Fogo produciuse en 1653. O terceiro estratovolcán é o de Furnas, que sufriu dúas erupcións en época histórica, en 1440 e 1630. A última produciu a morte dunhas 200 persoas.

Na zona leste da illa atópase o Pico da Vara, o punto máis alto da illa con 1.103 metros de altitude. Na zona central, está a serra de Água de Pau con 940 m de altura e na zona oeste sitúase a Caldeira das Sete Cidades, a 850 m de altitude.

As súas fértiles terras producen cereais, té, viño e froita, e alimentan ao gando bovino.

Historia

Crese que a illa foi descuberta entre 1426 e 1439, aínda que podería ser a sinalada en cartas portulanas de mediados do século XIV como "Illa Verde".^[1]

A primeira capital da illa foi Vila Franca do Campo, que foi arrasada por un terremoto en 1522, momento en que a capitalidade foi transferida a Ponta Delgada. Ponta Delgada é unha cidade en constante desenvolvemento, onde aínda se manteñen as súas igrexas e palacios dos séculos XVI e XIX.

No contexto da crise de sucesión de 1580, aquí tiveron lugar loitas entre os partidarios de Antonio I de Portugal e os de Filipe II de España. Culminaron na batalla naval de Vila Franca, que se desenvolveu ao longo da costa sur da illa (26 de xullo de 1582), coa vitoria dos segundos. Logo da batalla, Álvaro de Bazán, marqués de Santa Cruz de Mudela, desembarcou en Vila Franca do Campo, onde estableceu o seu cuartel xeral e onde aforcou a uns 800 prisioneiros franceses e portugueses. Foi o masacre máis brutal xamais ocorrida nos Azores.

Coa restauración da independencia portuguesa (1640), a illa recuperou a súa función de centro comercial, estreitando contactos co Brasil, a onde emigraron moitos colonos.

Moitos edificios históricos da illa datan do século XVIII, incluíndo mansións e igrexas. Mostran elaborada cachotaría, tellas e ricas esculturas delicadas, que aínda se poden gozar na actualidade. Esta expansión arquitectónica xustifícase polas ganancias da produción de laranxas para a exportación, cuxo principal mercado era Gran Bretaña.

Na primeira guerra mundial, a cidade de Ponta Delgada e as súas bisbarras foron bombardeadas por 50 obuses do "Deutschland", un submarino do Imperio alemán, clase U-155 (4 de xullo de 1917), baixo o mando do capitán Karl Meusel. A partir dese ataque, instalouse unha base naval estadounidense en Ponta Delgada, que se mantivo en funcionamento ata setembro de 1919. Neste período, uns 2.000 barcos utilizaron o porto. O fornezo a estes buques e aos miles de soldados en tránsito, preservou á economía da illa das dificultades da guerra e permitiu a formación dalgunhas pequenas fortunas.^[2]

En xeral, o desenvolvemento da industria pesqueira e de transformación de produtos agrícolas axudaron a impulsar a economía da illa ata hoxe. Actualmente, São Miguel é un dos centros políticos e administrativos máis dinámicos do arquipélago e é a sede do Goberno Rexional dos Azores.

A principal festividade relixiosa dos Azores ten lugar nesta illa, concretamente na cidade de Ponta Delgada, onde se reúnen todos os anos miles de persoas. Son as festas do Senhor Santo Cristo dos Milagres, que se realizan cada ano o quinto domingo logo de Pascua.

Outra manifestación relixiosa da illa son as romarías. Ao achegarse a Semana Santa, grupos dalgunhas decenas de persoas percorren a illa a pé, durante oito días, rezando e cantando en todas as igrexas e ermidas que atopan no seu camiño.

Clima

Do mesmo xeito que outras illas do arquipélago, São Miguel está influenciado polas correntes e ventos oceánicos e, en particular, pola corrente do Golfo. Funciona como unha forza moderadora nas illas, mantendo as temperaturas entre 14 °C e 26 °C durante todo o ano. A situación da illa tamén a fai susceptible a moitas tormentas atlánticas, e a precipitación tende a ser elevada durante os períodos de inverno.

Datos climáticos para Ponta Delgada, Azores (1981–2010)
Mes	Xan	Feb	Mar	Abr	Mai	Xuñ	Xul	Ago	Set	Out	Nov	Dec	Anual
Temperatura máxima en °C	20,2	20,4	22,8	22,6	24,0	25,6	28,2	28,8	28,6	26,2	25,5	22,6	28,8
Media máxima en °C	16,8	16,6	17,0	17,7	19,1	21,4	23,9	25,3	24,3	21,9	19,4	17,8	20,1
Media diaria en °C	14,5	14,1	14,5	15,1	16,4	18,6	20,9	22,1	21,4	19,2	16,9	15,4	17,43
Media mínima en °C	12,2	11,5	12,0	12,3	13,6	15,8	17,8	19,0	18,4	16,5	14,3	12,9	14,69
Temperatura mínima en °C	4,4	3,5	4,2	5,3	6,6	8,3	11,9	11,9	9,6	8,6	7,4	5,7	3,5
Chuvia media mm	96,9	84,0	87,7	76,7	72,0	39,6	26,6	46,1	91,9	108,5	108,7	146,9	985,6
Media de días con chuvia (≥ 0.1 mm)	19,7	18,4	19,5	17,5	12,2	9,3	8,9	8,1	12,5	16,5	17,9	17,7	178,2
Humidade relativa media (%)	82	82	81	79	80	80	78	79	80	80	82	83	80
Media de horas de sol mensuais	97	103	120	141	174	163	208	213	175	142	109	93	1 738
Fonte: Instituto de Meteorologia,^[3] Weatherbase (some records)^[4]

As dúas lagoas de Sete Cidades
Ponta Delgada
Furnas

Notas

↑ Será descrita, posteriormente, por Gaspar Frutuoso, do mesmo modo, que sobre ela principia: "Esta Ilha de S. Miguel em que, Senhora, estamos, é montanhosa e regada de ribeiras, e era logo, quando se achou, coberta de arvoredo (…) por ser húmida com as águas das chuvas e ribeiras e quente do sol (…)." (in: Saudades da Terra)
↑ BENTO, 2003:63-65.
↑ "Normais Climatológicas – 1981–2010 (provisórias) – Ponta Delgada" (en Portuguese). Instituto de Meteorologia. Consultado o 18 de marzo de, 2013.
↑ "Weatherbase: Historical Weather for Ponta Delgade". Consultado o 18 de marzo de 2013.

Véxase tamén

Outros artigos

Illas Azores

Ligazóns externas

Guia Turístico dos Açores e São Miguel
Transporte para Turismo em São Miguel - Açores
Guia do Turismo de São Miguel
Portal dos Açores
Mapa Virtual da Ilha Arquivado 03 de decembro de 2016 en Wayback Machine.
Fotos de Ponta Delgada
http://siaram.azores.gov.pt/centros-interpretacao/mi-furnas/_texto.html
http://www.azoresweb.com/flora_fauna_pt.html Arquivado 08 de novembro de 2017 en Wayback Machine.
Mapa de lugares naturais da Ilha

[1] Será descrita, posteriormente, por Gaspar Frutuoso, do mesmo modo, que sobre ela principia: "Esta Ilha de S. Miguel em que, Senhora, estamos, é montanhosa e regada de ribeiras, e era logo, quando se achou, coberta de arvoredo (…) por ser húmida com as águas das chuvas e ribeiras e quente do sol (…)." (in: Saudades da Terra)

[2] BENTO, 2003:63-65.

[INMET-3] "Normais Climatológicas – 1981–2010 (provisórias) – Ponta Delgada" (en Portuguese). Instituto de Meteorologia. Consultado o 18 de marzo de, 2013.

[weatherbase-4] "Weatherbase: Historical Weather for Ponta Delgade". Consultado o 18 de marzo de 2013.

[1]

[2]

[3]

[4]