Ángel Ansareo Grandas
| Biografía | |
|---|---|
| Nacemento | 1912  Penouta, España |
| Morte | 17 de febreiro de 1985 (72/73 anos) Cidade de México |
| Actividade | |
| Ocupación | maquis, enfermeiro |
Ángel Ansareo Grandas, nado en Penouta (Baralla) en 1912 e finado en Cidade de México o 17 de febreiro de 1985, foi un practicante e político galego.
Traxectoria
[editar | editar a fonte]Practicante no Hospital da Facultade de San Carlos de Madrid. Co golpe de Estado do 18 de xullo de 1936 participou na toma do Cuartel da Montaña e combateu nas frontes de Guadarrama, Teruel e Cataluña. Fuxiu a Francia ao rematar a guerra. Permaneceu en Francia 10 meses, ata que foi entregado a Franco e encarcerado en Reus. Escapou, pero foi detido o 5 de maio de 1940 e ingresou na Prisión de Lugo. O 7 de xuño foi trasladado á prisión de Madrid. Condenado a morte en Madrid, foi indultado en 1943.
Inmediatamente volveu a unirse á guerrilla e presidiu o congreso celebrado en Cobas (A Coruña). Co nome de guerra de A. Ribas organizou varios grupos guerrilleiros e mantivo enfrontamentos armados con falanxistas e gardas civís. Ante a persecución á que se viu sometido en Baralla, refuxiouse a primeiros de maio de 1946 en Larín (Láncara) onda Hilario López Díaz, que o trasladou á casa da súa filla en Céltigos (Sarria), onde permaneceu oito días, ata que David López Arias o levou con el para Verín coa falsa identidade de Camilo Rodríguez López. Cruzou a fronteira de Portugal, e chegou a Lisboa en agosto de 1946. Foi procesado con Ramón Rodríguez Varela "Curuxás" e José Vázquez Otero na causa 177/46 pola morte do párroco de Meixente (Sarria) Pedro Páramo Arias o 2 de setembro de 1946.[1] Obtivo un visado de asilado político e marchou a México arrivando ao porto de Veracruz o 28 de decembro de 1946.[2] Foi declarado en rebeldía o 15 de abril de 1947. Morreu en México en 1985.
Notas
[editar | editar a fonte]- ↑ El Progreso, 9-11-1946, p. 2.
- ↑ Ficha en Departamento de Migración de México
Véxase tamén
[editar | editar a fonte]Bibliografía
[editar | editar a fonte]- Parrado, Carlos (2009). Curuxás, o guerrilleiro que non cazou Franco. Vigo: A Nosa Terra. pp. 204–210. ISBN 84-87783-79-1.
