.cat

O dominio .cat é un dominio de internet xenérico que forma parte do sistema de dominios de internet patrocinados (sponsored TLD en inglés) para a lingua catalá e a súa cultura. Foi aprobado oficialmente o 15 de setembro do 2005 pola ICANN. Está xestionado pola Fundación puntCat.

O dominio .cat é o primeiro que se concede a unha comunidade lingüística. Os criterios para que un sitio web teña o dominio .cat son que estean en catalán ou que estea relacionada coa cultura catalá. A ICANN prohibiu expresamente que se utilice o dominio .cat para páxinas de gatos (cat en inglés), a non ser que estean en catalán ou teña que ver coa cultura catalá.

O alfabeto catalán nos nomes de dominio

Desde o seu inicio, o dominio .cat implementa a especificación IDN (Internationalized Domain Names, nomes de dominio internacionalizados), permitindo a utilización de caracteres de linguas diferentes ao inglés. Deste xeito, os nomes de dominios .cat poden levar calquera carácter do alfabeto catalán, a excepción do apóstrofo. Isto inclúe nomes de dominio con tiles, o punto medio, a diérese ou a cedilla. O dominio .cat é un dos primeiros dominios en implementar IDN, xunto co de Chile (.cl).

Rexistro progresivo

O dominio .cat tivo un calendario de rexistro en tres fases:

• A primeira fase de rexistro abriuse o 13 de febreiro de 2006 e durou ata o 21 de abril. Esta fase estivo restrinxida ás entidades que tivesen unha especial vocación coa promoción da lingua e a cultura catalás.
• A segunda fase de rexistro aberta a todo o mundo, empezou o 20 de febreiro de 2006 e durou ata o 21 de abril. Reservouse a entidades de todo tipos con presenza en catalán en Internet.
• A terceira fase, comezou o 27 de febreiro ata o 21 de abril de 2006, en paralelo á segunda, e reservouse ás máis de 68.000 persoas, entidades e empresas que se achegaron á campaña de apoio á candidatura do .cat.

Historia

En 1996 creouse a Asociación en Defensa do Dominio .ct (ADD.CT). Esta petición implicaba a homologación do código territorial de dúas letras para Cataluña na norma ISO 3166-1. Aprobouse unha proposición non de lei no Parlamento de Cataluña que instaba á Generalitat de Catalunya a lograr esta homologación. En 2001 creouse a Asociación puntCAT, na cal participa ADD.CT, para conseguir un dominio, agora de tres letras e referido á comunidade lingüística e cultural de lingua catalá, aproveitando as posibilidades dos novos dominios patrocinados. O 16 de marzo de 2004 a Asociación puntCAT presentou a candidatura do dominio .cat ante a ICANN. A candidatura recibiu o apoio de 68.000 persoas, empresas e entidades, número nunca logrado por outra candidatura.

O 15 de setembro de 2005 o dominio foi aprobado oficialmente.

Véxase tamén

Outros artigos

• .gal

Ligazóns externas

• Fundación puntCat (en catalán)
• Páxina de información e rexistro
• Campaña por un dominio puntCAT (en catalán)
• Entrevista de Vicent Partal a Amadeu Abril i Abril no programa de Catalunya Ràdio e Vilaweb, o internauta, no que explica todos os detalles do proceso de rexistro do dominio .cat (real audio).
• 20 preguntas sobre o dominio .cat (en catalán)
• Observatorio da implantación do puntCat en Fes-ho-cat