UTC-12:00
UTC-12 estas horzono kiu subtrahas dek du horojn de la Universala Tempo Kunordigita. Okcidente limas la internacia datlinio.
Principe la horzono validas en la neloĝataj insuloj Baker kaj Howland, apartenantaj al Usono, sed ĉar la insuloj kiel indikite ne havas homajn loĝantojn, tiu horzona valideco ne havas apartan praktikan signifon.
Praktikan signifon por ŝipoj havas la naŭtika horzono UTC-12 kiu kovras larĝan zonon de la Pacifika Oceano inter 180° kaj 172° 30' okcidenta longitudo. Ŝipoj kiuj uzas tiun tempon estas la lastaj kiuj komencas novan kalendaran tagon.
Krom la insuloj Baker kaj Howland kaj aliaj neloĝataj insuloj, ankaŭ pluraj home loĝataj insuloj kuŝas ene de la longitudaj limoj de tiu horzono, sed neniu el ili tenas la daton kaj tempon de la horzono UTC-12. Anstataŭe, ili observas la tempon kaj daton de unu el la apudaj zonoj, kutime ĉar ili apartenas, politike, al insularo kies aliaj membroj kuŝas ĉefe en la apuda horzono.
Ĉar la horzono reprezentas la lastan lokon en la tero kie unuopa dato ekzistas, ĝi estas kelkfoje uzata por tempolimoj (limdatoj) kaj nomata "Ie ajn sur Tero" (aŭ angle Anywhere on Earth, AOE).