Microwave Massacre
|
C'l artìcul chè 'l è scrit in
Miranduléś |
 Microwave Massacre
| ||
 La Claire Ginsberg in na figùra dal film | ||
| Masèl a micruóndi 1975 | ||
|---|---|---|
| Regìa: Wayne Berwick | ||
| Scritōr: Thomas Singer • Craig Muckler | ||
| Atōr: Jackie Vernon • Loren Schein • Al Troupe Marla Simon • Claire Ginsberg • Anna Marlowe Lou Ann Webber • Cindy Gant • Sarah Alt | ||
| Müsica: Leif Horvath | ||
| Léngua: Ingléś | ||
| Dürä dal film: 76 minüt | ||
| Nasiōṅ: Stat Unî | ||
Microwave Massacre (Masèl a micruóndi) l'è na cumèdia ad scarésa americàna dal 1975 ad Wayne Berwick.
L'è stada giràda a Los Angeles c'n un budget stimâ ad stanta-sincmìla dòlar.
Sunt
Donald (Jackie Vernon), insém a i sò amìg Roosevelt (Loren Schein) e Phillip (Al Troupe), al fà 'l muradōr. Quànd al tórna a cà la sira al gh'à di prubléma cun sò mujēr May (Claire Ginsberg) ch'la s è misa a far ad cuntìnuv di magnàr gourmet preparâ c'n un fór'n a micruóndi ch'a lò al n gh piàś pròpria minga esénd ch'al preferirév piutòst murtadèla e furmàj.
Na sira, dòp èsar-'s imbariagâ, al s litga sèg e al la masa schisànd-la c'n un maśna-pēvar, pò al la taja a cunsèṅ c'n un śghét. Donald al la mét in frîg tuta anvlupàda in dla carta stagnóla prima ad métar-'s a védar la televiśiòṅ cuma s'a n fus sucès gnint. Chè di espèrt i dìśan ch'al delìt parfèt al n eśìst minga, a gh'è stâ sōl òṅ ch'al l'à fata franca, un làd'r ad caviàł ch'al n éra mia stâ bcâ parchè al 'l iva magnâ tut, dònca tut al próvi cónt'r ad lò i èran dvintàdi di pét.
Vèrs meśanòt a 'l óm a gh vîṅ fam, al và a tōr quèl in frîg magnànd-al vluntéra. Sōl a la fiṅ al fà a mènt ch'la carna ch'l à magnâ 'l éra la maṅ ad sò mujēr. Donald al dvènta acsè un canìbal, tacànd a masàr dal putàni ch'al s purtàva a cà. Un dè a riva a 'l impruvìś l′Evelyn (Sarah Alt) ch'la vōl savēr parchè sò surèla May la n rispónd piò a 'l telèfun.