Don Jon
|
C'l artìcul chè 'l è scrit in
Miranduléś |
 Don Jon
| ||
| Don Jon | ||
 Joseph Gordon-Levitt in na figùra dal film | ||
| Don Śvan 2013 | ||
|---|---|---|
| Regìa: Joseph Gordon-Levitt | ||
| Scritōr: Joseph Gordon-Levitt | ||
| Atōr: Joseph Gordon-Levitt • Scarlett Johansson Julianne Moore • Rob Brown • Tony Danza Glenne Headly • Brie Larson • Paul Ben-Victor Jeremy Luke • Italia Ricci • Lindsey Broad | ||
| Müsica: Nathan Johnson | ||
| Léngua: Ingléś | ||
| Dürä dal film: 90 minüt | ||
| Nasiōṅ: Stat Unî | ||
Don Jon (Don Śvan) l'è na cumèdia dramàtica americàna dal 2013 ad Joseph Gordon-Levitt ch'al l'à anc scrita e recitàda. L'è stada preśentàda a 'l Sundance Film Festival e a 'l 63śum Fèstival ad Berlîṅ.
Custâ tri migliòṅ ad dòlar, al film 'l à pò purtâ a cà déś vòlti tant.
Sunt
Jon Martello Jr. (Joseph Gordon-Levitt), ma tut i al ciàman Don Jon, 'l è 'n ragàs italo-americàṅ ch'al n à minga finî i sò studi e ch'al tîṅ sèmp'r adrē a i stés quèi tut al stmani: al và a mésa e in palèstra, in dua 'l diś al préghi mént'r al fà i pēś, al và a balàr in discutéca c'n i sò amìg Danny (Jeremy Luke) e Bobby (Rob Brown), al magna macaròṅ, spaghét e laśàgni, al và in gir c'n adòs sōl na canutéra biànca o, a 'l màsim, dal camìśi fini scalvìdi o strichi par far véd'r i mùscui, al pòrta i cavìi pîṅ ad gèl a la Pompadour e 'l tîṅ un ruśàri in màchina in du al tira anc di cànc'r a tut mént'r al guìda, in pòchi paròli 'l è pròpria 'n guido patintâ.
I gh piàś'n anc cal dóni che lò al càmbia ad cuntìnuv ma vō't mét'r al gust ch'a gh'è piutòst a guardàr di sit pòr'n a 'l computer? A n gh'è mia paragòṅ c'n al sès qvél véra, par lò 'l è acsè parchè in di filmâ i s càtan dal fémni dimóndi malnéti c'n al diav'l adòs ch'i faṅ incòsa. Quànd al và a cunfesàr-as, dgénd ch'in na stmana al gh'à abû dū gusàdi fóra da 'l matrimòni e ch'l à vdû di vìddeo pòran mnand-as 'l uśèl darsèt vòlti, al prēt 'l al pardòna in cambi ad déś Ave Maria e 'd déś Pàdar Nòstar, dònca lò 'l è a pòst.
Na sira in discutéca Jon al cgnós na “bèla figa da déś”, la Barbara Sugarman (Scarlett Johansson), e 'l pèrd la tèsta sèg ma chi lē la n è minga una 'd qvili ch'la vèra 'l gambi subìt, l'è una ch'la gh la fà sudàr anc parchè i gh piàś'n i film rumàntic. La Barbara la decìd 'd andàr fóra a séna sèg parchè p'r èsar bèl 'l è bèl anc se na sò amìga la s dmandàva s'al n sia minga par caś òṅ ad chi tisi pîṅ ad mùscui che quànd i al fànan i s guàrdan sèmp'r in dal méntar.
Dòp ès'r-as mis insém Jon al la fà cgnósar a sò pàdar (Tony Danza), a sò màd'r Angela (Glenne Headly) e a sò surèla Monica (Brie Larson) che però la pasa tut al sò tèmp, cum la fà sèmpar, a scrìvar di mesaǵ a 'l telefunèṅ, anc a tavla mént'r i màgnan.
Quànd finalmènt i dū muruśèṅ i ciùlan dabòṅ, la Barbara la bèca Jon a 'l computer subìt dòp mént'r al guàrda 'n vìddeo spurcaciòṅ e la s arlìa dimóndi ma lò par diféndar-'s al diś ch'l è tut un schèrs fat da i sò amìg ch'i gh 'l aṅ mandâ sénsa che lò al saìs gnint. La ragàsa la 'l pardòna, anc parchè lò al gh prumét ch'l'è l'ultma vòlta, ma pò la decìd listés ad mulàr-al quànd la véd la crunulugìa dal sò computer e la capìs ch'al gh'à sōl cuntâ dal bali.
Jon in cal méntar 'l iva tacâ 'n cōrs ad sira par ciapàr al diplóma parchè la gh 'l iva dmandâ la Barbara. A scōla al cgnós na dóna più granda 'd lò, l’Esther (Julianne Moore), una ch'la piànś da spés da par lē da quànd l'à pardû in 'n incidènt in màchina sò marè e sò fiōl. Giusà ch'la n sia minga cla milf lè la dóna bòna par lò.