གསེར་ལུང་པད་དཀར་ཆོས་གླིང་དགོན་འཛིན་གྲྭ་ཚང་།

གསེར་ལུང་དགོན་འཛིན་གྲྭ་ཚང་། ཚོགས་ཁང་ཆེན་མོ།

གསེར་ལུང་དགོན་འཛིན། དགུན་གྱི་མཐོང་སྣང་།

གསེར་ལུང་དགོན་པ། ཞབས་དྲུང་ངག་དབང་རྣམ་རྒྱལ་ལ་ན་མོ།

གྲྭ་ཚང་གི་ངོ་སྤྲོད།

གསེར་ལུང་པད་དཀར་ཆོས་གླིང་དགོན་འཛིན་གྲྭ་ཚང་འདི་ སྤ་རོ་རྫོང་ཁག་ རྡོ་དཀར་རྒེད་འོག་ ས་ལ་ི་སྤྱི་འོག་ནང་ཆགས་འདི་མི་ལོ་ ༦༠༠ དེ་ཅིག་སོང་ཡོདཔ་ཨིན། གསེར་ལུང་གྲྭ་ཚང་འདི་སྤྱི་ལོ་༢༠༡༨ ལུ་དགོན་འཛིན་གྲྭ་ཚང་སྦེ་གཞི་བཙུགས་འབད་ཡོདཔ་ཨིན་མས། སྤྱི་ལོ་ ༢༠༢༣ ལུ་༧སྐྱབས་རྗེ་རིན་པོ་ཆེ་ཞབས་ནས་གྲྭ་ཚང་གི་མཚན་ལོག་ དགོན་འཛིན་འདུས་སྡེ་ལུགས་རྟོགས་ཆོས་གླིང་ཟེར་བསྒྱུར་བཅོས་མཛད་གནང་ཡོདཔ་ཨིན།

གསེར་ལུང་དགོན་པ་དེ་ཡང་སྤྱི་ལོ་ ༢༠༡༨ ལས་མགོ་བཟུང་ དཔག་བསམ་ཁ་ཨྱོན་རྡོ་རྗེ་ཆོས་འཁོར་གླིང་སློབ་གྲྭ་འདི་ རྗེ་མཁན་ཁྲི་རབས་བདུན་བཅུ་པའི་ཐུགས་དགོངས་ལས་འཁྲུངས་པའི་དགོན་འཛིན་གྲྭ་ཚང་སྦེ་མགོ་བཙུགས་ཞིམ་ལས། གསེར་ལུང་པད་དཀར་ཆོས་གླིང་འདི་ཡང་ སློབ་གྲྭ་དེའི་གནམ་བྱཱར་གྱི་བཞུགས་གནས་སྦེ་སྒྲུབ་ཡོད། གྲྭ་ཚང་དེ་སྔོན་མ་ལྷ་ཁང་ཆུང་ཀུ་ཅིག་ལས་མེད་པ་ཨིན་རུང་ གྲྭ་ཚང་དེའི་བཞུགས་གནས་སྦེ་སྒྲུབ་ཞིནམ་ལས་ཚུར་ གྲྭ་ཚང་དེའི་སྦྱིན་བདག་ གཙོ་བོ་མཁན་པོ་ཀརྨ་བློ་གྲོས་དང་ཚོགས་ཀྱི་སློབ་དཔོན་སངས་རྒྱས་མཁའ་འགྲོ་རྣམ་གཉིས་ཀྱིས་ སྦྱིན་བདག་མཛད། ནང་གི་་ཕྱག་ལྭ་དང་འཛིན་སྐྱོང་གཙོ་བོ་ དབུ་འཛིན་བགྲེསཔ་ཀུན་བཟང་སྟོབས་རྒྱས་རྣམ་རྒྱལ་གྱིས་མཛད་དེ་ད་ལྟོ་ཚོགས་ཁང་ཆེན་པོ་དེ་ཡང་དེ་སྦེ་གྲུབ་ཡོདཔ་ཨིན།

གཡུས་ཚན་དེ་ ཕྱི་མཐའ་འཁོར་ཚུ་ག་ར་གངས་རི་གིས་བསྐོར། ནང་ལྷ་ཤིང་ཤུགས་པ་གིས་གང་། བར་ན་ བྱ་དང་བྱི་ཅུང་གི་སྐད་དང་། བདུད༌རྩིའི༌ཆུ༌རྒྱུན་མ་ཆད་པར་ རིམ་གྱིས༌འབབས་ཏེ་ རི༌དྭགས༌སེམས་ཅན་ཚུ་ཡང་ གཅིག་གིས་གཅིག་ལུ་བྱམས་པ་དང་བརྩེ་བའི་སྒོ་ལས་ བག་འཕེབས་ཏོག་ཏོ་སྦེ་འཁྱམས། འདི་ཁར་ གཞི་ཆགས་ཏེ་སྡོད་མི་ འགྲོ་བ་མི་ཚུ་ཡང་ སེམས་དམ་པའི་ཆོས་ཀྱིས་བཏུལ་ཏེ་ ལུས་དགེ་བ་བཅུ་དང་མཐུན་པའི་ལཱ་ལུ་བརྩོན་ཏེ་ ཕྱིའི་བྱ་སྤྱོད་དང་། ནང་སེམས་ཁམས་གཉིས་ཆ་ར་ ལྷ་དང་ལྷ་མོ་དངོས་སུ་ཨིན་པའི་ འཚོར་ཉམས་བྱིན་ཚུགས་མི་གི་ མི་ངོམ་ཙང་ཙ་འཛོམས་ཏེ་འདུག།

གཡུས་ཚན་དེ་ འཕགས་མཆོག་ཕྱག་ན་པདྨོའི་གདུལ་ཞིང་། ཨོ་རྒྱན་གུ་རུ་རིན་པོ་ཆེའི་སྦས་གནས། དཀར་བརྒྱུད་ཀྱི་བླམ་ཚུ་གིས་ བསྟན་པ་དང་སེམས་ཅན་གྱི་འགྲོ་དོན་རྒྱ་སྦོམ་སྦེ་མཛད་ས་དང་། དེ་ལས་ དབེན་པའི་ཡོན་ཏན་ཚུ་ག་ར་ཚངམ་སྦེ་ཡོད་པའི་ས་གནས་ཅིག་ཨིན་པ་གི་མ་ཚད། སྔོན་མཁས་གྲུབ་ཀྱི་བླ་མ་ལེ་ཤ་ཅིག་བྱོན་ཏེ་ དྲན་པ་ཙམ་གྱིས་ངན་སོང་གསུམ་ལས་འགྲོལ་ཚུགས་པའི་ ལུང་དང་རྟོགས་པའི་ཆོས་དང་། རེག་པ་ཙམ་གྱིས་བྱང་ཆུབ་ཀྱི་གོ་འཕང་འཐོབ་ཚུགས་པའི་ བྱིན་ཅན་གྱི་ལྷ་ཁང་དགོན་སྡེ་ལེ་ཤ་ཅིག་ ཕྱག་བཏབ་མཛད་གནང་ནུག།

ཆགས་རབས།

གསེར་ལུང་དགོན་པ། གསེར་ལུང་པད་དཀར་ཆོས་གླིང་དགོན་འཛིན་གྲྭ་ཚང་ན་ཝི་ཀི་པི་ཌི་ཡའི་སྦྱོང་བརྡར་འབད་བའི་བསྒང་།

སངས་རྒྱས་གཉིས་པ་ཨྱོན་གུ་རུ་རིན་པོ་ཆེའི་སྤྲུལ་པ་ གྲུབ་ཐོབ་ཐང་སྟོང་རྒྱལ་པོའི་གདན་ས་ཅིག་ཨིན། ཕྱིས་སུ་རྗེ་ངག་དབང་འབྲུག་པའི་བཞུགས་གནས་ཅིག་ཡང་ཨིན།