Costituzione corsa 1755

Preambulu di a Custituzione di a Corsica

A Custituzione corsa, aduttata da i riprisentanti corsi u 18 di nuvembre di u 1755 mentre a "Cunsulta generale di Corti", hè cunsiderata da certi autori cum'è essendu a prima custituzione demucratica di a storia muderna. Ridatta in talianu, organizeghja l'istituzione di a Ripublica corsa, pruclamata à listessu tempu.

Iniziata da Pasquale Paoli, era stata preceduta da un rigulamentu, vutatu à u cunventu San Antone di Casabianca u 30 di ghjinnaghju 1735, quandu era statu per a prima volta pruclamata l'indipendenza corsa.

Fundata annantu à a siparazione da u putere esecutivu, da una parte è da u putere à tempu ghjudiziariu è legislativu, da l'altra parte, è ancu annantu à un suffraghju indirettu da tutti i capi di casa, 'ssa custituzione fubbe in vigore da u 1755 à u 1769 (battaglia di Ponte Novu è scunfitta militare di fronte à e truppe francese). Visava à dà u putere assolutu à u Guvernu di a Nazione corsa.

Hè cunsiderata cum'è a prima custituzione in u mondu accurdendu u drittu di votu à e donne quandu elle diventanu capi di casa, ma ùn ci hè micca statu elezzione insin'à l'abrugazione di 1769. 'Ssa tesi hè eppuru da mitigà : tutti l'omini di più vinti cinque anni sò elettori. U testu di 1755 ùn a dice micca, chì tutta a tradizione và dighjà in 'ssu sensu. In cuntrariu di ciò ch'è omu dice à spessu, "e donne" in generale ùn votanu micca. Certe a facenu in u quatru d'assemblea di paese, quandu u votu si face per famiglia è ch'è, veduve, riprisentanu a soia. U so rollu hè dunque dighjà più maiò ch'è in a maiò parte di i Stati di tandu, ma era dighjà u casu innanzu à Pasquale Paoli.

Citazione, inspirazione, riferimenti

Citazione

A dice Jean-Jacques Rousseau, in u Prugettu di custituzione per a Corsica di u 1763 :

"Senza amichi, senza appoghji, senza dinaru, senza armata, asserviti à i maestri terribuli, soli voi avete scuzzulatu a so coppia. Avete visti ligà si contru à voi, tacca à tacca, e più trimende praputenze di l'Europa, bagnà a vostra isula d'armate straniere : avete tuttu superatu... Si tratta menu di diventà altri ch'è voi ùn site, ma di sapè firmà voi stessi."

Difatti, u Prugettu di custituzione per a Corsica ùn hè mai statu ultimatu da Rousseau. U manuscrittu hè attualmente dipostu à a Bibbiuteca di Geneva, eccituatu un abbozzu di a prefazione chì si trova à a Bibbiuteca di Neuchâtel. U titulu "Prugettu di custituzione per a Corsica" hè statu aduttatu da i primi editori di 'ssa opera in u 1861.

Bibliugrafia

• Marie-Thérèse Avon-Soletti, A Corsica di Pasquale Paoli : Assaghju annantu à a Custituzione di a Corsica, 2 vol., Marge, 1999 (in francese).
• Pasquale Constanzo, Costituzione della Corsica 1755. Testo a fronte, Macerata, Liberlibri, coll. Il monitore Costituzionale 7, 2008.
• Antoine-Marie Graziani, Pasquale Paoli, Babbu di a patria corsa, Tallandier, Paris, 2002 (in francese).
• Michel Vergé-Franceschi, Paoli, un Corsica di e Luce, Fayard, Paris, 2005 (in francese).

Da vede dinò

-Costituzione di u Regnu di Corsica