Loncat ke isi

Bir pletok

Deri Wikipédi
Bir pletok
CourseMinuman
Place of originIndonésia
DaérahJakarta[1]
Serving temperaturePanas atawa dingin
Main ingredientsaèr, cengké, jahé, daon pandan, garem, gula secang, seré

Bir pletok entu ada orang Betawi punya atu minuman nyang dibikinnya paké rempah beragem-ragem. Ni minuman terdisionil udah diakuin jadi Indonésia punya pusaka budaya traujud wayah taon 2014.[1] Ama guwernemèn Jakarta, ni minuman juga' dijadiin atu deri lapan orang Betawi punya lambang budaya wayah taon 2017.[2]

Nama

[permak | permak sumber]
Bir pletok disuguhin dingin-dingin ama batu ès

Adapun bir pletok punya nama entu kalo dijelujurin rada kaga' jelas juntrungnya. Entu nama bir mentak dicomot deri basa Welanda punya setilah bier 'bir',[3] ya biar kata ni minuman kaga' bikin tèlèr[4] èn dia punya campuran kaga' ada sama-samanya ama bir.[3] Bagèn gitu, ada juga' nyang nganggep kalo ni nama bir benernya dicomot deri basa Arab punya setilah biʼrun atawa 'sumber aèr'.[5] Nama pletok entu mentak lantaran bunyi bletok wayah notok dia punya bahan bikin sebelon digodok,[6] wayah entu campuran dikocok paké bungbung bangbu[7][8] atawa belèk bakal ngasih dia punya busa,[9] wayah sumpel botol entu minuman dibuka',[8][10] atawa deri gletak-gletuk batu ès di dalem téko nyang dipaké buat nyuguhin ni minuman.[7]

Aturan penamaan bikinan pangan keluaran LPPOM Majelis Ulama Indonesia ada ngomongin kalo nama bikinan pangan bakal sertipikasi halal kaga' bolé ada unsur haram atawa dilarang buat orang Selam, kaya' misal kata bir nyang asalnya punya ma'na minuman sebangsa aèr serani.[11] Cumannya, ni bir pletok kaga' kena entu aturan, bahna dia udah keanggep ʻurf atawa kedemenan orang sini, èn juga' udah kesohor jadi minuman buat ngangetin badan nyang kaga' ada haram-haramnya kalo diliat deri dia punya jat.[12][13]

Sejarah

[permak | permak sumber]
Menir pada ngeriung di Betawi wayah jaman Hindia Welanda

Kaga' ada catetannya nyang bilangin kapan awal mulanya enni bir pletok nongol,[6] tapi ni minuman paling kaga' udah ujud jaman kumpeni dah.[7] Ahli sejarah JJ Rizal bilang kalo ni bir pletok mulanya dibikin ama masarakat Betawi bakal jadi tiruan serènta tandingan buat orang Peringgi punya minuman.[14] Wayah jaman kumpeni, orang Betawi gedongan saban ari mantengin orang-orang Welanda punya kedemenan nenggak bir bakal ngangetin awak.[8] Belon lagi, entu keriaan-keriaan Welanda dianggep semarak kapan dia punya suguhan aèr anggur ampé ngelubèr-lubèr.[14][15] Pan orang Betawi pada ogah kalah tuh. Dia pada pèngèn juga' minuman nyang bisa disuguhin saban ada keriaan. Cuman lantaran orang Betawi punya igama entu banyak nyang Selam, dia pada kaga' bolé minum khamer. Bahnanya, dikejalah entu bir pletok, ya entu atu minuman ngangetin awak nyang dia punya warna méra rada coklat kaya' bir, tapi kaga' ada alkoholnya acan.[14][16] Bolé dikata ni minuman entu peranakan deri bangsa Peringgi punya budaya nenggak ama Nusantara punya budaya ngadonin rempah.[17]

Bir pletok mulain pating seliweran ditanjain paké pikulan kuliling semprakan taon 1900-an.[18] Cumannya kalo ngrikut sejarahnya, dia punya pamor mulain ngeriep wayah taon 1970-an, keruruban ama minuman Kulon nyang derak di toko atawa warung madang, pan tu penanaman modal asing di Jakarta pada masup.

Bahan bikin

[permak | permak sumber]
Apa-apa campuran bakal bikin bir pletok dikasi unjuk di Musium Betawi

Bahan bakal bikin bir pletok bisa laèn-laèn ngikut daèrah ama tukang nyang bikin. Nyang tetep sama cuman jahé ama kayu secangnya doang.[19][20] Ni bir pletok bédanya ama Bogor punya bir kocok entu cuman pekara bir kocok kaga paké secang aja.[21] Adapun barang beberapa rempah seger nyang dipaké bakal bir pletok punya campuran entu ada daon pandan wangi, daon jeruk purut, ama seré,[22][23] sedengken rempah keringnya entu kaya' misal ades manis, cabé arei, cengké, jinten item, kepolaga, kayu angin, kayu manis, kayu mesoyi, merica, ampé biji pala.[24][22][25] Rimpang selaènnya jahé, kaya' kencur, temu lawak, ama temu kunci juga' bolé dipaké bakal ni minuman punya campuran biar mingkin mantep dia punya rasa.[26]

Ruju'an

[permak | permak sumber]

Tukilan

[permak | permak sumber]
  1. ↑ a b "Bir pletok". Warisan Budaya Takbenda. 2014-01-01. Dipungut 2024-06-26.
  2. ↑ Wiguna, Dewa Ketut Sudiarta (2022-06-25). "Para perawat ikon Betawi". Antara News. Diarsipin deri nyang asli tanggal 2024-06-27. Dipungut 2024-06-27.
  3. ↑ a b Reijst & Pereira (2022), hlm. 86.
  4. ↑ Teviningrum dkk. (2016), hlm. 57.
  5. ↑ Attas (2021), hlm. 589–590.
  6. ↑ a b Rezkisari, Indira (2017-07-11). "Berbagai versi sejarah lahirnya bir pletok". Republika Online. Diarsipin deri nyang asli tanggal 2024-06-27. Dipungut 2024-06-27.
  7. ↑ a b c Attas (2021), hlm. 589.
  8. ↑ a b c Yuniar, Nanien (2020-06-23). "Apa arti "pletok" dalam bir pletok?". Antara News. Diarsipin deri nyang asli tanggal 2024-06-27. Dipungut 2024-06-27.
  9. ↑ Habsari (2007), hlm. 47.
  10. ↑ Silalahi, Wahyuningtyas & Kalima (2023), hlm. 335.
  11. ↑ Pangastuti dkk. (2021), hlm. 20.
  12. ↑ Pangastuti dkk. (2021), hlm. 21.
  13. ↑ Ramadani, Adysha Citra; Rostanti, Qommarria (2024-05-21). "Meski pakai kata 'bir', bir pletok bisa disertifikasi halal, ini beberapa produknya". Republika Online. Diarsipin deri nyang asli tanggal 2024-06-27. Dipungut 2024-07-01.
  14. ↑ a b c Afrisia, Rizky Sekar (2015-06-22). "Sejarah bir pletok Betawi, tiruan anggur Barat tanpa alkohol". CNN Indonesia. Diarsipin deri nyang asli tanggal 2024-06-27. Dipungut 2024-06-27.
  15. ↑ Attas (2021), hlm. 590.
  16. ↑ Sultani, Anastasia & Yuliswara (2020), hlm. 144–146.
  17. ↑ Attas (2021), hlm. 591.
  18. ↑ Gardjito, Putri & Dewi (2017), hlm. 113–114.
  19. ↑ Ishartani, Kawiji & Khasanah (2012), hlm. 35.
  20. ↑ Kholishoh dkk. (2019), hlm. 160.
  21. ↑ Sudarsono, Ratih P. (2019-02-15). "Sihir rasa dari Suryakancana". Kompas.id. Diarsipin deri nyang asli tanggal 2024-06-27. Dipungut 2024-06-27.
  22. ↑ a b Dewantara & Levyta (2022), hlm. 75.
  23. ↑ Putra dkk. (2023), hlm. 84.
  24. ↑ Giyatmi (2018), hlm. 275–276.
  25. ↑ Pirlo, Reza Antares (2020-03-16). "Disebut anti corona, bir pletok Tangsel tembus luar negeri". Tagar.id. Diarsipin deri nyang asli tanggal 2024-07-03. Dipungut 2024-07-03.
  26. ↑ Kholishoh dkk. (2019), hlm. 159.

Daptar sumber

[permak | permak sumber]
Didapetin deri https://bew.wikipedia.org/w/index.php?title=Bir_pletok&oldid=24789